Ès Bondyé sèvi èvè lévolisyon pou kréyé tousa ki vivan ?
Mi sa Labib ka di
Non. Labib ka di on mannyè ki klè kè Bondyé kréyé lézimen men osi tout kalité zannimo é plant « sèlon èspès a yo »a (Jénèz 1:12, 21, 25, 27 ; Révélasyon 4:11). I ka di osi kè tout moun ki asi latè ka vin dè Adan é Èv, prèmyé paran an nou (Jénèz 3:20 ; 4:1). Labib pa ka soutyenn anponjan sa yo ka kriyé lévolisyon téyis (l’évolution théiste an fwansé). Kivédi, lidé-la konmkwa Bondyé sèvi èvè lévolisyon pou kréyé tout kalité èspès. Men, Labib pa ka kontrèdi lèfètkè i pé ni dé ti chanjman adan on menm èspès, kon sèwten syantifik ka konstaté-y.
Ka yo ka kriyé lévolisyon téyis ?
Èsprésyon-la « lévolisyon téyis » ka sanblé plizyè lidé diféran. Dapré Encyclopædia Britannica, èsprésyon-lasa vlé di kè « Bondyé ka sèvi èvè diféran biten pou fè sa i vlé èvè lanati, é kè sélèksyon natirèl la (sélection naturelle an fwansé), sé yonn adan yob ».
Téori-lasa ka sanblé sé lidé-lasa osi :
Tousa ki vivan ka désann dè sé menm zansèt-la ki ègzisté ja ni bon enpé lanné.
On fòwm dè vi pé évoliyé adan ondòt fòwm dè vi ki pa ni ayen a vwè èvè prèmyé-la. Dépawfwa, yo ka kriyé sa makroévolisyon (macroévolution an fwansé). Pa ègzanp, yo ka anségné kè sé makak-la évoliyé pou vin dé nonm.
Adan on sans, sé Bondyé ki ka jéré tousa anfinaldikont.
Ès lévolisyon annakò èvè Labib ?
Dapré lévolisyon téyis, sa ki maké adan liv a Lajénèz anrapò èvè lakréyasyon pa toutafè ègzak, alòskè Jézi palé dè sa ki fèt adan Lajénèz kon on biten ki fèt vréman (Jénèz 1:26, 27 ; 2:18-24 ; Matyé 19:4-6). Labib ka aprann-nou kè Jézi té an syèl-la èvè Bondyé avan i vin asi latè é kè i édé-y kréyé « toutbiten » (Jan 1:3). Kifè, lè moun ka di kè Bondyé sèvi èvè lévolisyon pou kréyé tousa ki vivan, lidé-lasa pa annakò ditou-ditou èvè sa Labib ka di.
Sé plant-la é sé zannimo-la kapab adapté-yo. Kijan pou nou vwè sa ?
Labib pa ka di-nou jis a ki pwen sé chanjman-la pé fèt adan on menm èspès. Men, i pa kont lèfètkè sé zannimo-la é sé plant-la, kè Bondyé kréyé, pé chanjé lèwvwè yo ka démitipliyé-yo oben lèwvwè yo ka adapté-yo a nouvo lanviwonnaj a yo. Menmsi pou déotwa sa ka pwouvé kè lévolisyon ka ègzisté, anfinaldikont, sé chanjman-lasa pa ka kréyé pon nouvo èspès.
a Adan lang-la yo ékri Labib odépa, mo-la yo tradui pa « èspès » adan sé vèwsé-lasa vlé di plis biten ki sans-la sé syantifik-la ka ba-y la. Souvantfwa, lèwvwè ni dé ti chanjman adan on èspès, sé syantifik-la ka di kè i évoliyé é kè i fin pa bay on nouvo èspès. Alòskè, dapré sa ki maké adan Lajénèz, sé jis dé ti chanjman ki fèt adan on menm èspès.
b Sa yo ka kriyé sélèksyon natirèl, sé lidé-la konmkwa zannimo oben plant ki ka adapté-yo plibyen a lanviwonnaj a yo ka kontinyé viv é ka fè pitit.