Ka Jézi té ka sanm ?
Mi sa Labib ka di
Ponmoun pa sav ègzaktèman ka Jézi té ka sanm. Labib pa’a ban-nou pon détay asi kò a Jézi. Kifè, sa ka montré kè sa Jézi té ka sanm pa ni pon enpòwtans. Men Labib ka ban-nou on ti lidé asi sa Jézi té ka sanm kanmenm.
Figi a-y : Konm Jézi té Juif, sèten i pran koté manman-y é kè i té ka sanm sé Sémit-la (Ébré 7:14). Figi a-y pa té tèlman diféran ki ta sélézòt moun-la. Lè ou té ka gadé-y, figi a-y pa té ni ayen ki té èspésyal. On jou, san di ponmoun ayen, i sòti Galilé pou rivé Jérizalèm, é ponmoun pa jen rèkonnèt-li (Jan 7:10, 11). I ka sanm sa, Jézi sé té on moun kè yo pa té ka rèmawké tèlman. É sa té ka rivé menm lèwvwè Jézi té èvè disip a-y ki té bon zanmi èvè-y. Tèlman sé vré, lèwvwè enpé moun awmé té vé arété Jézi, fò Jida té montré-yo-y (Matyé 26:47-49).
Longè a chivé a-y : I pa’a sanm sa chivé a Jézi té long, pas Labib ka di kè « lèwvwè on nonm ni gran chivé, sé on honté pou-y » (1 Korentyen 11:14).
Bab a-y : Jézi té ni on bab an figi a-y. Jézi té ka rèspèkté lwa a sé Juif-la ki té ka di kè sé nonm-la pa té ni dwa « koupé bout a bab [a yo] » (Lévitik 19:27 ; Galat 4:4). Anplisdisa, yo té ka palé dè bab a Jézi adan on pwofési ki té ka anonsé jan i té’é soufè (Izayi 50:6).
Kò a-y : Tout enfòwmasyon nou ni asi Jézi ka pèwmèt-nou di kè i té ni bon fòs. Pannan tout tan-la i té ka préché la, i fè onlo kilomèt a pyé (Matyé 9:35). Pou woufè tanp-la vin sen, a dé rèpriz, i chalviré tab a sé moun-la ki té ka chanjé lajan é i sèvi èvè on fwèt pou fè sé bèt-la sòti an tanp-la (Lik 19:45, 46 ; Jan 2:14, 15). Mi sa on ansiklopédi ka di : « Tousa ki adan Lézévanjil ka montré kè Jézi té ni bon fòs é kè i té byen doubout » (Cyclopedia a McClintock é Strong, volim IV, paj 884).
Santiman ou té pé vwè asi figi a-y : Jézi té ni onlo chalè é i té ni konpasyon. Sèten toutmoun té pé vwè sa asi figi a-y (Matyé 11:28, 29). Toutmoun té pé vin owa a-y pou i té édé-yo é pou i té konsolé-yo (Lik 5:12, 13 ; 7:37, 38). Jous sé timoun-la té ka santi-yo alèz a yo èvè-y (Matyé 19:13-15 ; Mawk 9:35-37).
Sa onlo moun ka kwè asi sa Jézi té ka sanm
Sa onlo moun ka kwè : Pou onlo moun, sé an Afrik Jézi sòti. Yo ka pansé sa pas liv a Larévélasyon ka di kè chivé a Jézi kon koton é kè pyé a-y ka sanm « bronz ki ka kléré » (Révélasyon 1:14, 15, Bible en français courant).
Mi vérité-la : Yo ka sèvi èvè « senbòl » adan liv a Larévélasyon (Révélasyon 1:1). Yo ka itilizé senbòl pou èspliké kijan chivé a Jézi é pyé a-y té yé. Si yo sèvi èvè sé senbòl-lasa, a pa pou bay on lidé asi sa Jézi té ka sanm lè i té asi latè men sé té pou montré ki kalité Jézi té ni apré i résisité. Lè Révélasyon 1:14 ka di kè « tèt a-y é chivé a-y té blan kon lèn ki blan, kon lanèj », a pa pou di ki kalité chivé i ni men sé pou palé dè koulè a chivé a-y. Sa ka rèprézanté sajès-la Jézi vin ni la difètkè i ja ni on bèl laj (Révélasyon 3:14). Vèwsé-lasa pa ka konparé kalité a chivé a Jézi èvè koton é i pa ka konparé-y èvè lanèj nonplis.
Pyé a Jézi té ka « kléré kon on bon kalité kuiv ki ka fonn adan on fouw » (Révélasyon 1:15). É figi a-y « té kon solèy-la lèwvwè i ka kléré tout fòs a-y » (Révélasyon 1:16). Konm asi latè pa ni pon ras a moun ki koulè-lasa, antoutjan, sé senbòl yo ka itilizé adan vizyon-lasa. Vizyon-lasa ka montré Jézi lè i résisité é i ka di kè i sé sila ki « ka rété adan on limyè, la ponmoun pé pa vin » (1 Timoté 6:16).
Sa onlo moun ka kwè : Jézi sé té on féba é i té tou frèl.
Mi vérité-la : Jézi pa té on moun ki lach. Pa ègzanp, lèwvwè enpé moun awmé vin pou arété-y, Jézi pa fè dèyè. Okontrè, i fè-yo sav sé li yo té ka chèché (Jan 18:4-8). Pétèt osi, i dwèt té ni bon fòs pas i té ni lokazyon travay antankè chawpantyé, é fò i té sèvi èvè fòs a dé men a-y pou i té itilizé sé zouti-la (Mawk 6:3).
Alò si sé vré, poukwa fò-yo té édé Jézi pòté poto-siplis a-y, jou-la i mò la ? É poukwa Jézi mò avan sélézòt-moun-la ki té pou mò anmenmtan ki-y ? (Lik 23:26 ; Jan 19:31-33). Avan yo té tchouyé Jézi, i té ja fèb toubònman. Lavèy-la, i pasé on nuit blanch paskè i té angwasé bon angwasé la (Lik 22:42-44). Lèswa-la, sé Juif-la té maltrété-y, é lèmaten-la, sé Women-la fè-y bon atrosité (Matyé 26:67, 68 ; Jan 19:1-3). Sé pétèt tout sé biten-lasa ki fè si i mò vit konsa.
Sa onlo moun ka kwè : Jézi té toujou tris.
Mi vérité-la : Jézi té ka imité Pap’a-y ki an syèl-la on mannyè ki pawfè. I té ni menm kalité ki-y, é Labib ka di kè Jéova sé « Dyé-la tchè a-y kontan la » (1 Timoté 1:11 ; Jan 14:9). Dayè, Jézi montré sé moun-la ka pou yo té fè pou yo té ni tchè-kontan (Matyé 5:3-9 ; Lik 11:28). Tout sé lidé-lasa ka montré-nou kè asi figi a Jézi, sé moun-la té pé vwè kè i té ni tchè-kontan.