“Mifeɔ Nɔ Ni Manyɛ”

Yoo ko ni yɔɔ Germany, ni atsɛɔ lɛ Irma lɛ eye aaafee afii 90. Egbee shi ni epila waa shii enyɔ, ni afee lɛ opireshɛŋ shii abɔ hu, no hewɔ lɛ, enyɛɛɛ eyashiɛ yɛ shĩa fɛɛ shĩa dɔŋŋ tamɔ efeɔ be ko ni eho lɛ. Amrɔ nɛɛ, Irma tsɔɔ lɛta ni eŋmalaa lɛ anɔ eshiɛɔ ehãa ewekumɛi kɛ ekutsoŋbii kɛ mɛi ni ekɛshãraa. Bei pii lɛ, mɛi ni nine shɛɔ lɛtai ni Irma ŋmalaa kɛwoɔ amɛ hewalɛ kɛ nɔ ni ekɛshɛjeɔ amɛmii lɛ anɔ lɛ, náa miishɛɛ aahu akɛ amɛtswaa lɛ amɛbiɔ lɛ be ni ekroko baaba. Mɛi komɛi hu ŋmaa lɛ lɛtai kɛdaa lɛ shi ni amɛkɛɔ lɛ koni eŋma amɛ ekoŋŋ. Irma kɛɛ akɛ, “Enɛ hãa mináa miishɛɛ ni miyaa nɔ mikɛ ekãa shiɛɔ.”

Irma ŋmalaa lɛtai kɛyahãa mɛi ni egbɔlɔ lɛ. Ewie akɛ: “Yoo onukpa ko tswa mi ni ekɛɛ mi akɛ, be ni ewu gbo lɛ lɛta ni miŋma lɛ shɛje emii waa. Ekɛ lɛta lɛ wo e-Biblia lɛ mli ni efɔɔ kanemɔ gbɛkɛ. Yoo kroko ni wu gbo nyɛsɛɛ nɛɛ hu wie akɛ, lɛta ni miŋma lɛ ewa lɛ kwraa fe esɔfo lɛ shiɛmɔ lɛ. Eyɛ sanebimɔi babaoo ni sa akɛ ená hetoo, no hewɔ lɛ ebi akɛ ebaanyɛ ebasara mi lo.”

Irma naanyo ko ni jeee Odasefonyo, ni efã kɛyahi he ko ni kɛ lɛ teŋ jekɛ waa lɛ kɛɛ lɛ ni eŋma lɛ lɛta. Irma kɛɛ akɛ, “Yoo lɛ kɛ lɛtai ni miŋmala lɛ lɛ fɛɛ to. Be ni egbo lɛ, ebiyoo ko tswa mi. Ekɛɛ mi akɛ ekane lɛtai ni miŋmala emami lɛ fɛɛ, ni ebi kɛji manyɛ majɛ Biblia lɛ mli maŋma lɛ hu eko lo.”

Irma ená gbɛ ni etsɔɔ nɔ eshiɛɔ nɛɛ he miishɛɛ waa. Ewie akɛ, “Mikpaa Yehowa fai koni eya nɔ ehã mi hewalɛ ni masɔmɔ lɛ. Eyɛ mli akɛ minyɛɛɛ mashiɛ yɛ shĩa fɛɛ shĩa dɔŋŋ moŋ, shi mifeɔ nɔ ni manyɛ.”