Kɛɛmɔ Amɛ Akɛ Osumɔɔ Amɛ

Yoo ko ni atsɛɔ lɛ Ong-li lɛ ji Yehowa Odasefonyo, ni eyɛ Bulgaria. Ekɛ oblayoo ko ni atsɛɔ lɛ Zlatka lɛ bɔi Biblia lɛ kasemɔ, shi Zlatka wu ekaseee nii lɛ eko. Ong-li wie akɛ: “Be ni wɔkaseɔ weku shihilɛ he sane lɛ, mihã ele akɛ ehe miihia ni wɔkɛɛ wɔhefatalɔi kɛ wɔbii akɛ wɔsumɔɔ amɛ waa. Zlatka fee ehiɛ mɔbɔmɔbɔ kɛkwɛ mihiɛ ni ekɛɛ mi akɛ; ekɛko ewu loo ebiyoo ni eye afii nɛɛhu lɛ akɛ esumɔɔ amɛ dã!”

Zlatka wie akɛ: “Miisumɔ ni mafee nɔ fɛɛ nɔ mahã amɛ, shi minyɛŋ makɛɛ amɛ akɛ misumɔɔ amɛ.” Ekɛfata he akɛ, “Mimami ekɛko mi akɛ esumɔɔ ni dã, ni minaa hu ekɛko mimami akɛ esumɔɔ lɛ dã.” Ong-li jɛ Biblia lɛ mli ehã Zlatka le akɛ, Yehowa wie yɛ faŋŋ mli akɛ esumɔɔ Yesu. (Mateo 3:17) Ewo Zlatka hewalɛ akɛ esɔle ehã Yehowa yɛ sane nɛɛ he koni ekɛfee oti ni ma ehiɛ akɛ ebaakɛɛ ewu kɛ ebiyoo lɛ akɛ esumɔɔ amɛ.

Ong-li wie akɛ: “Gbii enyɔ sɛɛ lɛ, Zlatka kɛ miishɛɛ kɛɛ mi akɛ, esɔle koni Yehowa aye abua lɛ. Be ni ewu ba shĩa lɛ, ekɛɛ lɛ akɛ Biblia lɛ ni ekaseɔ lɛ ehã ele akɛ, ehe miihia ni ŋa ajie suɔmɔ kɛ bulɛ kpo etsɔɔ ewu. No sɛɛ lɛ, emɛ fioo kɛkɛ ni ekɛɛ ewu lɛ akɛ esumɔɔ lɛ waa diɛŋtsɛ! Be ni ebiyoo lɛ ba shĩa lɛ, Zlatka fua lɛ waa ni ekɛɛ lɛ akɛ esumɔɔ lɛ! Zlatka kɛɛ Ong-li akɛ: ‘Amrɔ nɛɛ mihe ejɔ mi waa. Afii abɔ nɛɛ fɛɛ lɛ, mitsĩ misuɔmɔ lɛ naa miwo mimli, shi Yehowa yelikɛbuamɔ naa lɛ, amrɔ nɛɛ minyɛ mikɛɛ miweku lɛ akɛ misumɔɔ amɛ.’

Ong-li tsa sane lɛ nɔ akɛ: “Otsi sɛɛ lɛ, mikɛ Zlatka wu kpe ni ekɛɛ mi akɛ: ‘Mɛi babaoo ekɛɛ mi akɛ mikaŋmɛ gbɛ ni okɛ Zlatka kase Biblia lɛ, shi miina faŋŋ akɛ, Biblia lɛ ni ekaseɔ lɛ eye ebua wɔweku lɛ waa. Bianɛ lɛ, suɔmɔ kɛ miishɛɛ yɛ wɔweku lɛ mli.’”