Sanebimɔi Ni Biblia Lɛ Ehã Hetoo / Weku / Mɛni Biblia Lɛ Wieɔ Yɛ Mɛi Ni Jɛ Maŋ Kroko Nɔ Loo Amɛhiɛ Hewolo Nɔ Su Kroko Ni Akɛboteɔ Gbalashihilɛ Mli Lɛ He?
Hetoo ni Biblia lɛ kɛhãa
Nyɔŋmɔ kpɛlɛɔ gbalashihilɛ ni yaa nɔ yɛ nuu kɛ yoo ni esoro amɛhewolo nɔ su, amɛwiemɔ, loo maŋ nɔ ni amɛjɛ lɛ nɔ, ejaakɛ yɛ ehiɛ lɛ gbɔmɛi kome ji wɔ fɛɛ. Biblia lɛ kɛɔ akɛ: “Nyɔŋmɔ kɛ mɔ fɛɛ mɔ yeɔ yɛ gbɛ kome too lɛ nɔŋŋ lɛ nɔ . . . , ekɔɔɔ he eko maŋ nɔ ni ejɛ loo ehewolo nɔ su.”—Bɔfoi 10:34, 35, Good News Translation.
Naa Biblia mli shishitoo mlai krokomɛi ni tsɔɔ akɛ gbɔmɛi fɛɛ lɛ ekome ni, ekɔɔɔ he eko amɛhewolo nɔ su, ni amɛbaanyɛ amɛkɛ amɛhe abote gbalashihilɛ mli.
Gbɔmɛi fɛɛ jɛ he kome
Adesai fɛɛ jɛ klɛŋklɛŋ gbɔmɔ, ni ji Adam kɛ eŋa Hawa ni Biblia lɛ tsɛɔ lɛ “hiɛkãalɔi fɛɛ anyɛ” lɛ mli. (1 Mose 3:20) Enɛ hewɔ lɛ, Biblia lɛ wie Nyɔŋmɔ he akɛ: “Gbɔmɔ kome mli ejɛ efee gbɔmɛi ajeŋmaji fɛɛ.” (Bɔfoi 17:26) Ekɔɔɔ he eko maŋ nɔ ni mɔ ko jɛ lɛ, adesai fɛɛ ji weku kome mli bii. Kɛ́ yɛ he ni oyɔɔ lɛ ajieɔ nii amli waa loo anaa mɛi komɛi akɛ amɛnɔ kwɔlɔ fe mɛi krokomɛi hu?
Mɛi ni hiɛ kã shi lɛ ‘biɔ ŋaawoo’
Nyɔŋmɔ kpɛlɛɔ nɔ akɛ mɛi ni jɛ maji srɔtoi anɔ loo esoro amɛhewolo nɔ su lɛ baanyɛ amɛkɛ amɛhe aboteɔ gbalashihilɛ mli, shi jeee gbɔmɛi fɛɛ kɛ lɛ kpãa gbee yɛ enɛ he. (Yesaia 55:8, 9) Kɛ́ oosumɔ ni okɛ mɔ ko ni jɛ maŋ kroko nɔ loo esoro ehewolo nɔ su abote gbalashihilɛ mli lɛ, esa akɛ nyɛyi enyɔ lɛ fɛɛ nyɛfee ekome kɛsusu sanebimɔi ni nyiɛ sɛɛ nɛɛ ahe:
Te nyɛbaafee tɛŋŋ nyɛkpee naagbai ni nyɛkutsoŋbii loo nyɛwekumɛi kɛbaaba nyɛnɔ lɛ anaa?
Te nyɛbaafee tɛŋŋ nyɛye nyɛbua nyɛbii lɛ koni kɛ́ akɛ amɛ yeee jogbaŋŋ lɛ, amɛnyɛ amɛkpee naa?
Kɛ́ ‘nyɛbi ŋaawoo’ lɛ ebaaye ebua nyɛ ni nyɛgbalashihilɛ lɛ baaye omanye.—Abɛi 13:10; 21:5.