Sanebimɔi Ni Biblia Lɛ Ehã Hetoo / Biblia / Mɛni Baahã Onu Biblia Lɛ Shishi?

Hetoo ni Biblia lɛ kɛhãa

Biblia lɛ tsɔɔ nɔ ni esa akɛ wɔfee koni wɔnu Biblia lɛ shishi. Ekɔɔɔ he eko maŋ nɔ ni ojɛ, loo shihilɛ mli ni oyɔɔ lɛ, sane ni yɔɔ Nyɔŋmɔ wiemɔ lɛ mli lɛ ‘jeee nɔ ko ni wa tsɔ kɛhã bo, ni ejeee nɔ ko ni onine nyɛŋ ashɛ nɔ hu.’​—5 Mose 30:11.

Nibii ni obaanyɛ ofee koni onu Biblia lɛ shishi

1. Okɛ jwɛŋmɔ ni ja kɛ su kpakpa akane. Kpɛlɛmɔ akɛ Biblia lɛ Nyɔŋmɔ wiemɔ ni. Ba ohe shi, ejaakɛ Nyɔŋmɔ tsĩɔ henɔwolɔi anaa. (1 Tesalonikabii 2:13; Yakobo 4:6) Kɛ̃lɛ, kaahe nɔ fɛɛ nɔ kɛkɛ oye​—Nyɔŋmɔ miisumɔ ni okɛ ‘ojwɛŋmɔ nyɛmɔ’ atsu nii.​—Romabii 12:1, 2.

2. Sɔlemɔ kɛbi hiɛshikamɔ. Biblia lɛ kɛɔ yɛ Abɛi 3:5 lɛ akɛ: “Okɛ ohe akafɔ̃ bo diɛŋtsɛ oniiashishinumɔ nɔ.” Shi moŋ, ‘yaa nɔ obi Nyɔŋmɔ’ hiɛshikamɔ koni onyɛ onu Biblia lɛ shishi.​—Yakobo 1:5.

3. Kasemɔ Biblia lɛ daa. Kɛ́ okaseɔ Biblia lɛ daa lɛ, obaaná he sɛɛ waa fe kɛ́ eyɛ mli aahu dani okaseɔ.​—Yoshua 1:8.

4. Kasemɔ Biblia lɛ yɛ saneyitsei anaa. Kɛ́ okase Biblia lɛ yɛ saneyitsei anaa lɛ, no ji okase nɔ ni Biblia lɛ wieɔ yɛ sane loo saneyitso pɔtɛɛ ko he lɛ, no ji gbɛ ni hi fe fɛɛ ni baahã onu nɔ ni Ŋmalɛi lɛ tsɔɔ shishi diɛŋtsɛ. Okɛ nɔ ni wɔbaatsɛ lɛ “shishijee nikasemɔi” loo tsɔɔmɔi lɛ aje shishi, koni sɛɛ mli lɛ okase “tsɔɔmɔi ni mli wawai.” (Hebribii 6:1, 2, Easy-to-Read Version) Obaana akɛ obaanyɛ okɛ ŋmalɛ ko ato ŋmalɛ kroko he, koni ona bɔ ni ŋmalɛi lɛ fãi srɔtoi lɛ gbalaa fãi krokomɛi lɛ amli, ekolɛ ŋmalɛ lɛ fãi ni “shishinumɔ wa” lɛ po.​—2 Petro 3:16.

5. Hã mɛi krokomɛi aye abua bo. Biblia lɛ woɔ wɔ hewalɛ koni wɔbi ni mɛi ni nuɔ Biblia lɛ shishi lɛ aye abua wɔ. (Bɔfoi 8:30, 31) Yehowa Odasefoi kɛ mɛi kaseɔ Biblia lɛ ni amɛheee nɔ ko. Blema Kristofoi lɛ tsɛ Ŋmalɛi ayisɛɛ koni mɛi ana nɔ ni Biblia lɛ tsɔɔ diɛŋtsɛ, ni nakai nɔŋŋ Yehowa Odasefoi hu feɔ.​—Bɔfoi 17:2, 3.

Nibii ni he ehiaaa ni oná dani onu Biblia lɛ shishi

1. Wolokasemɔ babaoo loo woloŋlee babaoo. Eyɛ mli akɛ abu Yesu bɔfoi 12 akɛ “mɛi ni leee woloŋ kɛ mɛi foji kɛkɛ” moŋ, shi amɛnu Biblia lɛ shishi jogbaŋŋ ni amɛtsɔɔ mɛi krokomɛi.”​—Bɔfoi 4:13.

2. Shika. Obaanyɛ okase nɔ ni Biblia lɛ tsɔɔ lɛ ni owooo he nyɔmɔ ko. Yesu kɛɛ ekaselɔi lɛ akɛ: “Yaka nyɛná, yaka nyɛkɛhãa.”​—Mateo 10:8.