Mɛni Ji “Maŋtsɛyeli Lɛ Naa Samfei Lɛ”?

Hetoo ni Biblia lɛ kɛhãa

“Maŋtsɛyeli lɛ naa samfei lɛ,” ni bei komɛi lɛ atsɛɔ lɛ “samfei ni akɛboteɔ maŋtsɛyeli lɛ mli” lɛ damɔ shi kɛhã hegbɛ ni akɛhã, koni akɛgbele gbɛ ahã mɛi bɔ ni afee ni amɛnyɛ ‘amɛbote Nyɔŋmɔ Maŋtsɛyeli lɛ mli.’ (Mateo 16:19; The New American Bible; Bɔfoi 14:22)a Yesu kɛ “ŋwɛi Maŋtsɛyeli lɛ naa samfei lɛ” hã Petro. Enɛ tsɔɔ akɛ, akɛ hegbɛ hã Petro koni ehã mɛi ale bɔ ni kɛ́ anɔkwafoi ná Nyɔŋmɔ mumɔ krɔŋkrɔŋ lɛ, amɛbaanyɛ amɛná hegbɛ kɛbote Maŋtsɛyeli lɛ mli yɛ ŋwɛi.

Namɛi akɛ samfei lɛ tsu nii ahã?

Petro kɛ hegbɛ ni ená kɛjɛ Nyɔŋmɔ ŋɔɔ lɛ tsu nii kɛgbele gbɛ ehã kui etɛ komɛi koni amɛnyɛ amɛbote Nyɔŋmɔ Maŋtsɛyeli lɛ mli:

1. Yudafoi kɛ Yudafoi ni ebatsɔmɔ Kristofoi. Be ni Yesu gbo lɛ sɛɛ bei fioo lɛ, Petro wo Yudafoi babaoo komɛi ni sheɔ Nyɔŋmɔ gbeyei lɛ hewalɛ akɛ, amɛkpɛ̃lɛ Yesu nɔ akɛ mɔ ni Nyɔŋmɔ ehala lɛ ni eye nɔ akɛ maŋtsɛ yɛ Maŋtsɛyeli lɛ mli. Petro tsɔɔ amɛ nɔ ni esa akɛ amɛfee koni ahere amɛyiwala. Etsɔ enɛ nɔ egbele gbɛ kɛhã amɛ, kɛ mɛi akpei komɛi hu ni “mɔ ewiemɔ lɛ mli lɛ” koni amɛnyɛ amɛbote Maŋtsɛyeli lɛ mli.​—Bɔfoi 2:38-41.

2. Samariabii. Sɛɛ mli lɛ, atsu Petro kɛtee Samariabii lɛ aŋɔɔ.b Shi kome ekoŋŋ lɛ, ekɛ Maŋtsɛyeli lɛ naa samfei lɛ eko tsu nii, be ni lɛ kɛ bɔfo Yohane, “amɛyasɔle amɛhã [Samariabii lɛ] koni amɛná mumɔ krɔŋkrɔŋ” lɛ. (Bɔfoi 8:14-17) Enɛ gbele gbɛ ehã Samariabii lɛ bɔ ni afee ni amɛnyɛ amɛbote Maŋtsɛyeli lɛ mli.

3. Jeŋmajiaŋbii. Be ni Yesu gbo lɛ, afii etɛ kɛ fã sɛɛ lɛ, Nyɔŋmɔ hã Petro ná ele akɛ Jeŋmajiaŋbii (mɛi ni jeee Yudafoi) hu baaná hegbɛ ni amɛbote Maŋtsɛyeli lɛ mli. Enɛ hewɔ lɛ, Petro kɛ samfei lɛ eko tsu nii ni eshiɛ ehã Jeŋmajiaŋbii lɛ, no hã amɛná mumɔ krɔŋkrɔŋ lɛ, amɛbatsɔmɔ Kristofoi, ni no gbele gbɛ koni amɛbatsɔmɔ Maŋtsɛyeli lɛ mli bii.​—Bɔfoi 10:30-35, 44, 45.

Mɛni “Maŋtsɛyeli lɛ ni aaabote mli lɛ” tsɔɔ?

Mɛi ni “boteɔ Maŋtsɛyeli lɛ mli” lɛɛlɛŋ lɛ baafata Yesu he kɛye nɔ yɛ ŋwɛi. Biblia lɛ gba akɛ ‘amɛbaatara maŋtsɛ sɛii anɔ’ ni “amɛbaaye shikpɔŋ lɛ nɔ akɛ maŋtsɛmɛi.”​—Luka 22:29, 30; Kpojiemɔ 5:9, 10.

Susumɔi ni ejaaa ni ahiɛ yɛ Maŋtsɛyeli lɛ naa samfei lɛ ahe

Susumɔ ni ejaaa: Nyɔŋmɔ kɛ Yesu mɛ koni Petro atsɔɔ be ni ekɛ Maŋtsɛyeli lɛ naa samfei lɛ baatsu nii.

Anɔkwa sane: Be ni Yesu wie Maŋtsɛyeli lɛ naa samfei lɛ he lɛ, ekɛɛ Petro akɛ: “Nɔ fɛɛ nɔ ní ooofĩ yɛ shikpɔŋ lɛ nɔ lɛ, aaafĩ yɛ ŋwɛi; ni nɔ fɛɛ nɔ ni ooofɛ̃ne yɛ shikpɔŋ lɛ nɔ lɛ, aaafɛ̃ne yɛ ŋwɛi.” (Mateo 16:19, Ga Biblia) Mɛi komɛi susuɔ akɛ, nɔ ni sane nɛɛ tsɔɔ ji, Petro ji mɔ ni kpɛɔ yiŋ ehãa mɛi ni yɔɔ ŋwɛi lɛ, shi Greek feemɔwiemɔ ni akɛtsu nii lɛ tsɔɔ akɛ, yiŋ ni Petro baakpɛ lɛ, atsɔ hiɛ akpɛ nakai yiŋ lɛ momo yɛ ŋwɛi, jeee akɛ Petro baakpɛ yiŋ dani no sɛɛ lɛ, akpɛ nakai yiŋ lɛ yɛ ŋwɛi.c

Biblia lɛ hei komɛi tsɔɔ akɛ Petro kɛ gbɛtsɔɔmɔi ni jɛ Nyɔŋmɔ ŋɔɔ tsu nii be ni ekɛ samfei lɛ tsuɔ nii lɛ. Akɛ nɔkwɛmɔnɔ lɛ, dani ekɛ samfee ni ji etɛ lɛ baatsu nii lɛ, Nyɔŋmɔ kɛ gbɛtsɔɔmɔi hã lɛ.​—Bɔfoi 10:19, 20.