Sanebimɔi Ni Biblia Lɛ Ehã Hetoo / Nyɔŋmɔ Hiɛ Ni Abaasa / Ani Kristofonyo Baanyɛ Aya Helatsamɔhe Kɛhã Helatsamɔ?

Hetoo ni Biblia lɛ kɛhãa

Hɛɛ. Yesu tsɔɔ akɛ, esɛɛnyiɛlɔi lɛ baanyɛ aya helatsamɔhe kɛhã helatsamɔ be ni ewie akɛ “mɛi ni yɔɔ hewalɛ lɛ, datrɛfonyo he ehiaaa amɛ, shi mɛi ni bɛ hewalɛ lɛ moŋ ehe hiaa” lɛ. (Mateo 9:12) Eyɛ mli akɛ Biblia lɛ jeee helatsamɔ wolo moŋ, shi shishitoo mlai ni yɔɔ mli lɛ yeɔ ebuaa mɛi ni miisumɔ ni amɛsa Nyɔŋmɔ hiɛ lɛ.

Saji ni obaanyɛ obi ohe

1. Ani minuɔ gbɛ ni abaatsɔ nɔ atsa mi lɛ shishi? Biblia lɛ woɔ wɔ ŋaa akɛ wɔtao saji ni anyɛɔ amuɔ afɔ̃ɔ nɔ lɛ mli moŋ fe ni ‘wɔbaahe wiemɔ fɛɛ wiemɔ wɔye.’​—Abɛi 14:15.

2. Ani esa akɛ mabi datrɛfoi krokomɛi hu asusumɔ yɛ gbɛ ni akɛɛ abaatsɔ nɔ atsa mi lɛ he? “Ŋaawolɔi pii” asusumɔ baanyɛ aye abua waa, titri kɛ́ hela lɛ ji hela ko ni baanyɛ agbe bo.​—Abɛi 15:22.

3. Ani gbɛ ni abaatsɔ nɔ atsa mi lɛ baahã maku Biblia famɔ akɛ ‘atsi he kɛje lá he lɛ’ mli?​—Bɔfoi 15:20.

4. Ani akɛ mumɔi baashãra kɛtao hela ni yeɔ mi lɛ, loo atsɔ nɔ atsa mi? Biblia lɛ wieɔ eshiɔ “mumɔi kɛshãramɔ.” (Galatiabii 5:19-21) Kɛ́ ootao ona akɛ gbɛ ni abaatsɔ nɔ atsa bo lɛ baahã okɛ mumɔi ashãra lɛ, bi ohe saji nɛɛ:

• Ani helatsalɔ lɛ kɛ mumɔi shãraa koni etsa mɛi?

• Ani gbɛ ni abaatsɔ nɔ atsa mi lɛ tsɔɔ akɛ wɔji ni atɔ̃ amɛnɔ lɛ ni kɛ hela lɛ baa, loo henyɛlɔ ko ni etsu mi tsofã loo ekpɛ mi ayɛ?

• Ani ebiɔ ni ashã afɔlei komɛi, akɛɛ nibii komɛi loo aye ŋkpai, afee kusumii komɛi ni baahã mikɛ mumɔi ashãra, loo akɛ mumɔi atsɛmɔ nibii komɛi afee tsofã lɛ?

5. Ani miiye mitsui fe nine yɛ migbɔmɔtsoŋ hewalɛnamɔ he? Biblia lɛ woɔ ŋaa akɛ: “Nyɛhãa gbɔmɛi fɛɛ alea nyɛniiashishinumɔ lɛ.” (Filipibii 4:5) Kɛ́ onu nii ashishi jogbaŋŋ lɛ, ebaaye ebua bo ni okɛ ojwɛŋmɔ ama “nibii ni he hiaa waa lɛ” anɔ. (Filipibii 1:10; Mateo 5:3)