Sanebimɔi Ni Biblia Lɛ Ehã Hetoo / Nyɔŋmɔ Hiɛ Ni Abaasa / Mɛni Nyɔŋmɔ Sumɔɔ Ni Mafee?

Hetoo ni Biblia lɛ kɛhãa

Nyɔŋmɔ miisumɔ ni obale lɛ jogbaŋŋ, obatsɔ enaanyo, osumɔ lɛ, ni okɛ otsui muu fɛɛ ajá lɛ. (Mateo 22:37, 38; Yakobo 4:8) Kɛ́ okase bɔ ni Yesu hi shi ehã lɛ, kɛ etsɔɔmɔi lɛ, no baaye ebua bo ni ole bɔ ni afeɔ Nyɔŋmɔ suɔmɔnaa nii. (Yohane 7:16, 17) Yesu tsɔɔ mɛi nɔ ni Nyɔŋmɔ suɔmɔnaa nii ji, ni ehi shi yɛ naa hu. Anɔkwa, Yesu tsɔɔ yiŋtoo hewɔ ni eba ji shikpɔŋ nɛɛ nɔ lɛ akɛ, “koni mibafee mɔ ni tsu mi lɛ suɔmɔnaa nii, shi jeee mi diɛŋtsɛ misuɔmɔnaa nii.”​—Yohane 6:38.

Ani esa akɛ Nyɔŋmɔ atsɔ okadi krɛdɛɛ ko loo ninaa ko, loo naakpɛɛ gbɛ ko nɔ ehã male nɔ ni esumɔɔ ni mafee?

Dabi, ejaakɛ saji ni Nyɔŋmɔ miisumɔ ni adesai ale lɛ yɛ Biblia lɛ mli. Nɔ fɛɛ nɔ ni esa akɛ oná koni ofee mɔ “ni asaa lɛ jogbaŋŋ kɛhã nitsumɔ kpakpa fɛɛ nitsumɔ kpakpa” lɛ yɛ Biblia lɛ mli. (2 Timoteo 3:16, 17) Nyɔŋmɔ miisumɔ ni okɛ Biblia lɛ kɛ ‘ojwɛŋmɔ nyɛmɔ’ atsu nii kɛkase esuɔmɔnaa nii.​—Romabii 12:1, 2; Efesobii 5:17.

Ani manyɛ mafee Nyɔŋmɔ suɔmɔnaa nii?

Hɛɛ, obaanyɛ, ejaakɛ Biblia lɛ kɛɛ: “Nyɔŋmɔ kitãi lɛ anɔyeli waaa kwraa kɛhã wɔ.” (1 Yohane 5:3, Easy-to-Read Version) Enɛ etsɔɔɔ akɛ be fɛɛ be eyɔɔ mlɛo akɛ abaaye Nyɔŋmɔ kitãi lɛ anɔ. Shi kɛ́ obɔ mɔdɛŋ oye Nyɔŋmɔ kitãi lɛ anɔ lɛ, sɛɛnamɔi ni baajɛ mli aba lɛ fa kwraa fe nibii ni okɛbaashã afɔle kɛye ekitãi lɛ anɔ lɛ. Yesu diɛŋtsɛ wie akɛ: “Kwɛmɔ bɔ ni mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ yɔɔ miishɛɛ hã!”​—Luka 11:28, Good News Translation.