Te Yehowa Odasefoi Kɛ Oniai Ni Amɛnine Shɛɔ Nɔ Lɛ Tsuɔ Nii Amɛhãa Tɛŋŋ?
Wɔkɛ oniai lɛ fĩɔ wɔjamɔ lɛ gbɛjianɔtoi lɛ kɛ nibii ni wɔfeɔ kɛyeɔ wɔbuaa mɛi lɛ asɛɛ. Nibii nɛɛ fata oti titri ni ma wɔhiɛ lɛ he, ni no ji, wɔye wɔbua mɛi koni amɛbatsɔmɔ Yesu Kristo kaselɔi.—Mateo 28:19, 20.
Wɔkɛ oniai nɛɛ yeee wɔbuaaa mɔ ko koni etsɔ niiatsɛ. Wɔbɛ asafoŋ onukpai loo osɔfoi ni awoɔ amɛ nyɔmɔ yɛ amɛnitsumɔ lɛ hewɔ, ni kɛ́ Yehowa Odasefoi tsu shiɛmɔ nitsumɔ lɛ, awooo amɛ nyɔmɔ. Awooo mɛi ni sɔmɔɔ yɛ wɔnitsumɔhe niji kɛ wɔnitsumɔhe yitso lɛ, ni Yehowa Odasefoi A-Gbɛtsɔɔmɔ Kuu lɛ mli bii hu fata he lɛ nyɔmɔ.
Nibii Komɛi Ni Wɔtsuɔ
Woji Kɛ Nibii: Daa afi lɛ, wɔtsɔɔ woji kɛ nibii ashishi kɛyaa wiemɔi srɔtoi amli, wɔprintiɔ woji, wɔkɛ majeɔ, ni wɔjaraa Bibliai kɛ Biblia kasemɔ woji wɔhãa mɛi akpekpei abɔ ni wɔheee shika. Agbɛnɛ hu, akɛ wɔwoji kɛ nibii ni abaanyɛ adaunlodi ewo jw.org wɛbsaiti lɛ kɛ JW Library app lɛ nɔ, ni awooo he nyɔmɔ.
Tsũmaa Nitsumɔ Kɛ Kuramɔ: Wɔmamɔɔ jamɔhei ni sa jogbaŋŋ yɛ je lɛŋ hei srɔtoi, ni wɔsaa jamɔhei nɛɛ koni mɛi ni yɔɔ asafoi lɛ amli lɛ aná hei ni amɛkpe yɛ jɛmɛ kɛjá Nyɔŋmɔ ni amɛjie eyi. Nakai nɔŋŋ wɔmamɔɔ nitsumɔhe niji kɛ wiemɔ shishitsɔɔmɔ ɔfisii ni sa jogbaŋŋ, ni wɔsaa tsũi nɛɛ. Mɛi titri ni tsuɔ nitsumɔ nɛɛ ji mɛi ni kɛ amɛhe ehã ni awooo amɛ nyɔmɔ, ni enɛ hãaa abɔ nyɔmɔ babaoo.
-
Shiɛmɔ Nitsumɔ Lɛ: Awooo Yehowa Odasefoi lɛ nyɔmɔ yɛ sane kpakpa lɛ ni amɛshiɛɔ lɛ loo “Nyɔŋmɔ wiemɔ lɛ” ni amɛtsɔɔ mɛi lɛ hewɔ. (2 Korintobii 2:17) Kɛ̃lɛ, tamɔ bɔ ni klɛŋklɛŋ afii oha lɛ mli Kristofoi lɛ tsu amɛsɔɔmɔ nitsumɔ lɛ, ahalaa mɛi ni kɛ bei babaoo tsuɔ shiɛmɔ nitsumɔ lɛ ateŋ mɛi komɛi ni atsɔseɔ amɛ, ni ahãa amɛ wɔɔhe ni sa kɛ nibii ni he baahia amɛ koni amɛnyɛ amɛtsu nitsumɔ ni akɛwo amɛdɛŋ lɛ jogbaŋŋ.—Filipibii 4:16, 17; 1 Timoteo 5:17, 18.
Nitsɔɔmɔ Nitsumɔ: Akɛ oniai ni mɛi tsuɔ lɛ eko toɔ kpeei bibii kɛ kpeei wuji ahe gbɛjianɔ. Oniai lɛ eko nɔŋŋ wɔkɛtsuɔ nii kɛfeɔ nibii ni atswaa aboɔ toi kɛ vidioi srɔtoi lɛ. Kɛfata he lɛ, wɔfeɔ skul srɔtoi hu kɛtsɔseɔ asafoŋ onukpai kɛ be fɛɛ sɔɔlɔi koni amɛnyɛ amɛtsu amɛnitsumɔi lɛ jogbaŋŋ.
Yelikɛbuamɔi Ni Wɔkɛhãa Mɛi Be Ni Oshãra Ko Eba: Kɛ́ nɔ ni mɛi tsɛɔ lɛ adebɔɔ naa oshãra ba loo osharai krokomɛi ba ni efite nii lɛ, wɔkɛ oniai nɛɛ eko toɔ niyenii, nu, kɛ wɔɔhei ahe gbɛjianɔ wɔhãa mɛi ni oshãra eba amɛnɔ lɛ. Jeee “mɛi ni etsɔmɔ wɔwekumɛi yɛ hemɔkɛyeli lɛ mli” lɛ pɛ náa yelikɛbuamɔi nɛɛ ahe sɛɛ, shi mɛi ni jeee Odasefoi lɛ hu náa he sɛɛ.—Galatiabii 6:10.