Ani Yehowa Odasefoi Nyɛɔ Amɛbii Anɔ Koni Amɛ Hu Amɛtsɔmɔ Yehowa Odasefoi?

Dabi, ejaakɛ kɛ́ mɔ ko baajá Nyɔŋmɔ loo ejáaa Nyɔŋmɔ lɛ, lɛ eyiŋkpɛɛ ni. (Romabii 14:12) Yehowa Odasefoi tsɔɔ amɛbii Biblia mli shishitoo mlai, shi kɛ́ gbekɛbii lɛ dara lɛ, amɛ diɛŋtsɛ amɛbaakpɛ amɛyiŋ kɛji amɛbaatsɔmɔ Yehowa Odasefoi loo amɛtsɔmɔŋ.—Romabii 12:2; Galatiabii 6:5.

Taakɛ eji yɛ fɔlɔ fɛɛ fɔlɔ gbɛfaŋ lɛ, Yehowa Odasefoi sumɔɔ ni amɛbii aná shihilɛ kpakpa. Amɛtsɔɔ amɛbii lɛ nibii ni amɛsusuɔ akɛ gbekɛbii lɛ baaná he sɛɛ: ekomɛi ji, bɔ ni atsuɔ nii jogbaŋŋ, jeŋba he mlai, kɛ jamɔŋ hemɔkɛyelii. Yehowa Odasefoi heɔ amɛyeɔ akɛ, Biblia mli ŋaawoo ni akɛtsuɔ nii lɛ hãa anaa shihilɛ kpakpa, no hewɔ lɛ, amɛbɔɔ mɔdɛŋ amɛkɛtsɔseɔ amɛbii lɛ, no ji, amɛkɛ amɛ kaseɔ Biblia lɛ ni amɛkɛ amɛ yaa Kristofoi akpee. (5 Mose 6:6, 7) Kɛ́ gbekɛbii lɛ dara lɛ, amɛteŋ mɔ fɛɛ mɔ yɛ hegbɛ ni ekpɛɔ eyiŋ kɛji ebaasumɔ ni etsɔ Yehowa Odasefonyo loo etsɔŋ.

Ani Yehowa Odasefoi baptisiɔ abifabii?

Dabi. Biblia lɛ fĩii sɛɛ akɛ abaptisi abifabii. Akɛ nɔkwɛmɔnɔ lɛ, etsɔɔ akɛ, dani abaptisi klɛŋklɛŋ afii oha lɛ mli Kristofoi lɛ, amɛnu sane ni ashiɛ atsɔɔ amɛ lɛ, amɛkɛ ‘miishɛɛ mɔ wiemɔ lɛ mli,’ ni amɛtsake amɛtsui. (Bɔfoi 2:14, 22, 38, 41) No hewɔ lɛ, dani abaabaptisi mɔ ko lɛ, esa akɛ efee mɔ ko ni eda ni baanyɛ anu nɔ ni Biblia lɛ tsɔɔ lɛ shishi, ehe nɔ ni Biblia lɛ tsɔɔ lɛ eye, ni ekpɛ eyiŋ akɛ ebaahi shi yɛ nakai tsɔɔmɔi lɛ anaa. Abifabii nyɛŋ afee nibii nɛɛ.

Be ni gbekɛbii lɛ daraa lɛ, be baashɛ ni amɛbaahã abaptisi amɛ. Kɛ̃lɛ, ebaabi ni amɛnu yiŋ ni amɛkpɛɔ akɛ abaptisi amɛ lɛ shishi.

Ani Yehowa Odasefoi kpoɔ amɛbii kɛji gbekɛbii lɛ hãaa abaptisi amɛ?

Dabi. Eyɛ mli akɛ edɔɔ fɔlɔi ni ji Odasefoi kɛ́ amɛbi ko hala akɛ esumɔŋ akɛ etsɔ Yehowa Odasefonyo moŋ, shi amɛyaa nɔ amɛsumɔɔ amɛbi lɛ, ni amɛkɛ lɛ efooo tako mli.

Aabaptisi gbekɛ nuu ko, ni akɛ egbɔmɔtso muu lɛ fɛɛ ewo nu mli. — Ekɔɔɔ he eko afii abɔ ni mɔ ko eye lɛ, lɛ diɛŋtsɛ ebaakpɛ eyiŋ kɛ́ ebaahã abaptisi lɛ loo ehãŋ abaptisi lɛ

Mɛni hewɔ Yehowa Odasefoi hãa amɛbii fataa amɛhe kɛyashiɛɔ lɛ?

Yehowa Odasefoi hãa amɛbii fataa amɛhe kɛyashiɛɔ yɛ yiŋtoi srɔtoi ahewɔ.a

Biblia lɛ fãa fɔlɔi ni amɛtsɔɔ amɛbii lɛ Nyɔŋmɔ he nii, ni amɛye amɛbua amɛ koni amɛsɔmɔ Nyɔŋmɔ. (Efesobii 6:4) Akɛni jamɔ ni akɛhãa Nyɔŋmɔ lɛ biɔ ni mɔ ajaje ehemɔkɛyeli yɛ faŋŋ etsɔɔ hewɔ lɛ, shiɛmɔ fata nibii ni he hiaa waa ni esa akɛ atsɔɔ gbekɛbii koni no ahã amɛle Nyɔŋmɔ lɛ he.—Romabii 10:9, 10; Hebribii 13:15.
Biblia lɛ woɔ gbekɛbii loo oblahii kɛ oblayei hewalɛ ni “amɛjie Yehowa gbɛ́i lɛ yi.” (Lala 148:12, 13) Gbɛ kome ni sa kadimɔ waa ni wɔbaanyɛ wɔtsɔ nɔ wɔjie Nyɔŋmɔ yi ji, ni wɔbaagba mɛi krokomɛi ehe sane.b
Kɛ́ gbekɛbii fata amɛfɔlɔi ahe kɛyashiɛ lɛ, gbekɛbii lɛ náa he sɛɛ waa. Akɛ nɔkwɛmɔnɔ lɛ, amɛleɔ bɔ ni amɛbaafee amɛkɛ mɛi srɔtoi fɛɛ agba sane, ni amɛjieɔ sui kpakpai tamɔ musuŋtsɔlɛ, mlihilɛ, bulɛ, kɛ hekɛafɔleshãa kpo. Agbɛnɛ hu, amɛnuɔ Biblia mli anɔkwalei ni amɛhemɔkɛyeli lɛ damɔ nɔ lɛ shishi jogbaŋŋ.

Ani Yehowa Odasefoi kɛ amɛhe woɔ gbijurɔyelii loo gbii juji krokomɛi amli?

Yehowa Odasefoi kɛ amɛhe wooo jamɔŋ gbii juji kɛ gbijurɔyelii krokomɛi ni esaaa Nyɔŋmɔ hiɛ lɛ amli.c (2 Korintobii 6:14-17; Efesobii 5:10) Akɛ nɔkwɛmɔnɔ lɛ, wɔkɛ wɔhe wooo fɔmɔ gbijurɔyeli mli, ni wɔyeee Blonya hu ejaakɛ amɛdamɔɔɔ Biblia lɛ nɔ.

Fɛɛ sɛɛ lɛ, wɔsumɔɔ ni wɔkɛ wɔwekui lɛ aná miishɛɛ, ni wɔkeɔ wɔbii lɛ nii. Nɔ najiaŋ ni wɔbaamɛ ni gbii juji loo gbii krɛdɛi komɛi ashɛ dani wɔbua wɔhe naa akɛ weku ni wɔkekee wɔhe nii lɛ, wɔbuaa wɔhe naa kɛjieɔ wɔhiɛtserɛ ni wɔkekeɔ wɔhe nii yɛ afi lɛ mli gbi fɛɛ gbi ni wɔsumɔɔ nɔ.

Papa ko kɛ mami ko kɛ nibii komɛi ni aha he miike amɛbi nuu kɛ amɛbi yoo. — Fɔlɔi ni ji Kristofoi lɛ sumɔɔ ni amɛke amɛ bii nii

Te gbekɛbii ni atsɔse amɛ akɛ Yehowa Odasefoi lɛ nuɔ he amɛhãa tɛŋŋ?

“Shiɛmɔ nitsumɔ lɛ ye ebua mi ni mibale akɛ ekɔɔɔ he eko jamɔ mli ni mɔ ko yɔɔ loo bɔ ni ekɛ mi baaye ahã lɛ, esa akɛ mabu lɛ. Agbɛnɛ hu, bei pii kɛ́ wɔmiishiɛ lɛ, mɛi gbaa wɔ shihilɛi ni amɛkɛkpeɔ kɛ amɛnaagbai. No hewɔ lɛ, nɔ najiaŋ ni masusu mikome mihe lɛ, misusuɔ bɔ ni mɛi nuɔ he amɛhãa lɛ he, ni mikwɛɔ nɔ ni manyɛ mafee ni mikɛye mabua amɛ.”—Tara.d
“Mifɔlɔi enyɛɛɛ minɔ koni matsɔ Odasefonyo. Amɛkɛɛ mi be fɛɛ be akɛ esa akɛ mi diɛŋtsɛ makpɛ miyiŋ yɛ he. Be fɛɛ be ni mabi mimami sane yɛ nibii ni Odasefoi lɛ heɔ amɛyeɔ lɛ eko he lɛ, ebiɔ mi akɛ, ‘Ani bo diɛŋtsɛ otao mli?’ Enɛ hã mifee niiamlitaomɔ waa, ni no ye ebua mi ni miyɔse akɛ, enɛ ji anɔkwa jamɔ ni esa akɛ mahi mli, jeee akɛni mifɔlɔi yɛ mli lɛ hewɔ.”—Ellie.
“Minuuu he akɛ nɔ ko kpakpa miiŋmɛɛ mi akɛni miyeee gbii juji komɛi lɛ hewɔ. Kɛ́ eshɛ Hɔɔ kɛ Hɔgbaa lɛ, mikɛ Odasefoi krokomɛi toɔ gbɛjianɔ srɔtoi ni mináa he sɛɛ. Wɔyeɔ nii, wɔjoɔ, ni wɔtswaa geems srɔtoi. Minanemɛi ni mikɛyaa skul lɛ kɛɔ daa akɛ mikɛ misafoŋbii lɛ náa miishɛɛ fe amɛ.”—Melissa.
“Eyɛ mli akɛ no mli lɛ, mile nɔ hewɔ ni wɔyeee Blonya lɛ moŋ, shi minu he bei komɛi akɛ nɔ ko miiŋmɛɛ mi. Nɔ ni ye ebua mi ni minyɛ miye naagba nɛɛ nɔ ji, mifɔlɔi fɔ̃ɔ minanemɛi kɛ wɔwekumɛi krokomɛi anine kɛbaa wɔshĩa be kɛ beiaŋ. Mikaiɔ hu akɛ, amɛke mi nibii.”—Miguel.

a Kwɛmɔ sane ni ji “Why Don’t Jehovah’s Witnesses Celebrate Certain Holidays?” lɛ

b Biblia lɛ tsĩ gbekɛbii kɛ oblahii kɛ oblayei babaoo ni Nyɔŋmɔ ná amɛhe miishɛɛ lɛ atã, ejaakɛ amɛgba mɛi krokomɛi amɛhemɔkɛyeli lɛ he sane.—2 Maŋtsɛmɛi 5:1-3; Mateo 21:15, 16; Luka 2:42, 46, 47.

c Yɛ anɔkwale mli lɛ, dani Odasefonyo bi ko baaya shiɛmɔ lɛ, efɔlɔ loo onukpa ko ni hiɛ kã shi fataa ehe kɛyaa.

d Atsake gbɛ́i lɛ ekomɛi.