Namɔ Ji Maria Magdalena?
Hetoo ni Biblia lɛ kɛhãa
Maria Magdalena hi shi akɛ Yesu Kristo sɛɛnyiɛlɔ anɔkwafo. Eeenyɛ efee akɛ aná egbɛ́i Magdalena lɛ kɛjɛ maŋ ko ni atsɛɔ lɛ Magdala (loo Magadan) ni bɛŋkɛ Galilea Ŋshɔ lɛ mli. Ekolɛ, Maria hi nakai maŋ lɛ nɔ be ko.
Maria Magdalena lɛ, eji yei krokomɛi ni fata Yesu kɛ ekaselɔi lɛ ahe kɛfã gbɛ, ni amɛkɛ amɛheloonaa nibii hu sɔmɔ amɛ lɛ ateŋ mɔ kome. (Luka 8:1-3) Be ni agbeɔ Yesu lɛ eyɛ jɛmɛ ni ena, ni be ni atee lɛ shi lɛ hu, efata mɛi ni na lɛ klɛŋklɛŋ kwraa lɛ ahe.—Marko 15:40; Yohane 20:11-18.
Ani Maria Magdalena lɛ, kulɛ ashawo yoo ji lɛ?
Biblia lɛ ewieee akɛ Maria Magdalena lɛ kulɛ ashawo yoo ji lɛ. Nɔ ni Biblia lɛ wie yɛ ehe nɔŋŋ ji akɛ, Yesu famɔ daimonioi kpawo kɛje emli.—Luka 8:2.
Nɛgbɛ aná susumɔ akɛ kulɛ eji ashawo lɛ kɛjɛ? Afii ohai komɛi yɛ egbele sɛɛ lɛ, mɛi komɛi kɛɛ, Maria Magdalena ji yoo ni atsĩii egbɛ́i tã (eeenyɛ efee ashawo yoo lɛ) ni kɛ ehiɛ yaafonui fɔ Yesu naji ahe, ni ekɛ eyitsɔi tsumɔ lɛ. (Luka 7:36-38) Kɛ̃lɛ, nɔ ko bɛ Biblia lɛ mli ni maa sane nɛɛ nɔ mi.
Ani Maria Magdalena ji “bɔfo kɛhã bɔfoi lɛ”?
Dabi. Katolik Sɔlemɔ lɛ tsɛɔ Maria akɛ “St. Mary Magdalene” ni ji “Hetselɔ Maria Magdalena” kɛ “bɔfo kɛhã bɔfoi lɛ,” akɛni efata mɛi klɛŋklɛŋ ni bakɛɛ Yesu kaselɔi lɛ akɛ atee Yesu shi lɛ ahe lɛ hewɔ. (Yohane 20:18) Shi enɛ etsɔɔɔ akɛ efata Yesu bɔfoi lɛ ahe. Agbɛnɛ hu, he ko he ko bɛ Ŋmalɛ lɛ mli ni atsɛ lɛ nakai.—Luka 6:12-16.
Agbe Biblia lɛ ŋmaa naa aaafee klɛŋklɛŋ afii 100 Ŋ.B naagbee gbɛ. Shi aaafee afi 500 Ŋ.B afii lɛ amli dani sɔlemɔ lɛ hiɛnyiɛlɔi lɛ kpɛ mli akɛ amɛbaahã Maria Magdalena hegbɛ krɛdɛɛ ko ni nɔ kwɔ. Saji komɛi ni aŋmala yɛ klɛŋklɛŋ afii 100 afii lɛ amli kɛ afii 200 afii lɛ amli—ni fataaa Biblia mli woji ni akpɛlɛ nɔ yɛ blema lɛ ahe lɛ—tsɔɔ mli akɛ Yesu bɔfoi loo ekaselɔi komɛi ye Maria he awuŋa. Saji ni afo atã nɛɛ bɛ Biblia lɛ mli kwraa.
Ani Yesu Kristo ŋa ji Maria Magdalena?
Dabi. Anɔkwa, Biblia lɛ feɔ lɛ faŋŋ akɛ Yesu boteee gbalashihilɛ mli.a
a Kwɛmɔ sane ni ji “Ani Yesu Bote Gbalashihilɛ Mli? Ani Yesu Yɛ Nyɛmimɛi?” lɛ.