Te Abonsam Tamɔ Tɛŋŋ?

Hetoo ni Biblia lɛ kɛhãa

Abonsam ji mumɔŋ bɔɔnɔ, ni tsɔɔ akɛ ebɛ gbɔmɔtso ni abaanyɛ ana.—Efesobii 6:11, 12.

Mfoniri lɛ miitsɔɔ bɔ ni afɔɔ Abonsam tɛŋmɔ, ni ehiɛ faka. Etamɔ too abotia ko ni eje aklontoi kɛ lei.

Mɛi babaoo tɛŋɔ Abonsam he mfoniri tamɔ too abotia ko ni eje akloŋtoi, eje lei ni ehiɛ faka yɛ edɛŋ. Mɛi komɛi heɔ amɛyeɔ akɛ, nitɛŋlɔi komɛi ni hi shi nɔ ni fe afii 1000 ni eho nɛɛ ji mɛi ni tɛŋi Abonsam he mfonirii klɛŋklɛŋ. Ni saji ni afo atã kɛ jamɔŋ amalei ji nɔ ni hã amɛfee nakai.

Te Biblia lɛ wieɔ Abonsam he tɛŋŋ?

Biblia lɛ kɛ nibii srɔtoi tsɔɔ bɔ ni Abonsam tamɔ hã. Enɛɛmɛi waa wɔ ni wɔnaa bɔ ni efeɔ enii ehãa, shi jeee bɔ ni egbɔmɔtso yɔɔ. Ekomɛi ji:

La bɔfo. Ekwaa efeɔ enii tamɔ nɔ ni eyɛ nɔ ko kpakpa ko ni ebaahã mɛi, ni ekɛ no lakaa mɛi koni amɛhe etsɔɔmɔi lɛ amɛye moŋ fe Nyɔŋmɔ nɔ lɛ.—2 Korintobii 11:14.
Jata ni miihũu. Ekɛ hiɛdɔɔ tutuaa mɛi ni jáa Nyɔŋmɔ lɛ.—1 Petro 5:8.
Drako kpeteŋkpele. Ehe yɛ gbeyei, ehe wa, ni ekpãtãa nii ahiɛ.—Kpojiemɔ 12:9.

Biblia mli ŋmalɛi ni wieɔ Abonsam he

2 Korintobii 11:14: “Satan diɛŋtsɛ po kwaa feɔ ehe tamɔ la bɔfo.”

Nɔ ni etsɔɔ: Satan kɛ nibii kpakpai lakaa mɛi koni amɛhe etsɔɔmɔi lɛ amɛye moŋ fe Nyɔŋmɔ nɔ.
Efesobii 6:11: “Nyɛwoa tawuu hewulamɔ nii ni jɛ Nyɔŋmɔ ŋɔɔ lɛ fɛɛ koni nyɛnyɛ nyɛdamɔ shi shiŋŋ nyɛshi Abonsam ŋaatsɔi lɛ.”

Nɔ ni etsɔɔ: Abonsam tsɔɔ ŋaa gbohii ni ekɛlakaa mɛi koni amɛgbo Nyɔŋmɔ nɔ toi.
Yakobo 4:7: “Nyɛbaa nyɛhe shi nyɛwoa Nyɔŋmɔ shishi; shi nyɛtsĩa Abonsam gbɛ, ni ebaajo nyɛnaa foi.”

Nɔ ni etsɔɔ: Kɛ́ mɔ ko boɔ Nyɔŋmɔ toi ni ebooo Abonsam toi lɛ, ebaanyɛ etsĩ Abonsam gbɛ kwraa.
1 Petro 5:8: “Nyɛhenyɛlɔ, Abonsam lɛ, nyiɛ tamɔ jata ni miihũu, ni eetao mɔ ko emi.”

Nɔ ni etsɔɔ: Abonsam nyɛɔ mɛi ni boɔ Nyɔŋmɔ toi lɛ, ni esumɔɔ ni efite naanyobɔɔ ni yɔɔ mɛi lɛ kɛ Nyɔŋmɔ teŋ lɛ.