Mɛni Baahã Ohã Saji Ahetoo Ni Woɔ Mɔ Hewalɛ?

Be fɛɛ be ni wɔbaaya asafoŋ kpee lɛ, wɔnáa hegbɛ ni wɔkɛbaawo wɔnyɛmimɛi lɛ hewalɛ kɛtsɔ sane hetoo ni wɔbaahã lɛ nɔ. (Heb. 10:​24, 25) Mɛni kɛ́ wɔfee lɛ ebaahã wɔhã saji ahetoo ni woɔ mɔ hewalɛ?

• Sɔlemɔ ohã Yehowa. Bi lɛ ni eye ebua bo koni onyɛ ohã sane hetoo ni baawo ehiɛnyam, ni agbɛnɛ hu, ewo nyɛmimɛi lɛ hewalɛ.—Lala 35:18.

• Bɔɔ mɔdɛŋ akɛ okaneŋ hetoo lɛ tɛ̃ɛ kɛjɛŋ wolo lɛ mli. Kɛ́ ojɛ bɔ ni onu sane lɛ shishi ohã lɛ mli ohã hetoo lɛ, nyɛmimɛi lɛ baana bɔ ni oyɔɔ hemɔkɛyeli yɛ Yehowa mli lɛ, ni amɛbaaná he sɛɛ.

• Hã osane hetoo lɛ afee kuku. Bei pii lɛ, sane hetoo ni shishinumɔ waaa ni yɔɔ kuku lɛ moŋ ni woɔ mɔ hewalɛ waa. Agbɛnɛ hu, kɛ́ wɔwieee nɔ fɛɛ nɔ ni yɔɔ sane ni asusuɔ he lɛ mli lɛ, mɛi krokomɛi hu baaná hegbɛ amɛwie.—Abɛi 10:19.

• Hã osane hetoo lɛ afee nɔ ni tswaa mɔ emaa shi. Bɔɔ mɔdɛŋ akɛ, kɛ́ oohã saji ahetoo lɛ owieŋ nyɛmimɛi lɛ ahiɛ, ni owieŋ oshiŋ amɛ hu.

Kɛ́ atsɛɛɛ bo po lɛ, loloolo lɛ obaanyɛ owo nyɛmimɛi lɛ hewalɛ. Obaanyɛ obo amɛ toi jogbaŋŋ be ni amɛwieɔ lɛ, koni sɛɛ mli lɛ ohã amɛle nɔ ni onya he yɛ amɛhetoo lɛ he.—Abɛi 10:21.