Yai Ni Mɛi Kɛhɛ Loi

Yesu kaselɔi lɛ ekomɛi ji wolɛi. (Mar. 1:​16-20) Amɛkɛ yai hɛ loi yɛ Galilea Ŋshɔ lɛ mli.

Te afeɔ yai ahãa tɛŋŋ yɛ Yesu beiaŋ? Bei pii lɛ, aloɔ kpãi ni ana kɛjɛ flaks tsei amli kɛfeɔ yai. Kɛ́ wolɛɛnyo ko miitao ni ehɛ loi bibii lɛ, ekɛ yai ni mli fɔji daraaa lɛ baatsu nii. Shi kɛ́ eetao ehɛ loi agboi lɛ, ekɛ yai ni mli fɔji lɛ dara baatsu nii. Bei pii lɛ, akɛ sumui loo tɛi woɔ yai ni mli fɔji lɛ daraaa lɛ ahe koni kɛ́ afɔ̃ awo nu lɛ mli lɛ, enyɛ eya nu lɛ shishi ni edu loi. Shi agbalaa yai ni dara loo tsãanii lɛ awoɔ nu lɛ mli koni edu loi lɛ. Akɛ nibii ni tsii woɔ tsãanii lɛ shishi koni enyɛ eya nu lɛ shishi, ni akɛ nibii woɔ eŋwɛigbɛ koni yaa lɛ fɛɛ akaya nu lɛ shishi.

Yai ajara wa waa, ni ebi ni ahiɛ amɛ jogbaŋŋ koni amɛkafite. Mɛni hewɔ? Ejaakɛ tɛi ni yɔɔ nui lɛ amli lɛ baanyɛ agbála amɛ. Agbɛnɛ hu, kɛ́ akɛgbe loi babaoo lɛ, amɛbaanyɛ amɛgbála. (Luka 5:6) Biblia lɛ wie akɛ Yakobo kɛ Yohane ‘kpɛ amɛyai’ lɛ. (Mat. 4:21) Bei pii lɛ, wolɛi kpɛɔ amɛyai be ni amɛjɛ wuo amɛba. Luka hu wie akɛ wolɛi ‘fɔɔ amɛyai ahe.’ (Luka 5:2) Kɛ́ wolɛi lɛ fɔ amɛyai ahe lɛ, amɛkaa koni amɛkafite.—Eze. 47:10.

Yesu fɔ̃ hii komɛi ni kɛ yai hɛɔ loi lɛ nine koni amɛbatsɔmɔ “wolɛi ni hɛɔ gbɔmɛi.”