Feemɔ Biblia Mli Saji Lɛ Ahe Mfoniri

Saji ni awie he yɛ Biblia lɛ mli lɛ tee nɔ lɛɛlɛŋ, ni obaanyɛ okase nibii babaoo yɛ mli. Kɛ́ ofee saji ni okaneɔ yɛ Biblia lɛ mli lɛ ahe mfoniri lɛ, ebaaye ebua bo ni onu shishi jogbaŋŋ, ni oná he sɛɛ waa hu. Naa nibii komɛi ni baaye abua bo koni onyɛ ofee saji ni okaneɔ yɛ Biblia lɛ mli lɛ ahe mfoniri.

• Kanemɔ ni eje kpo. Kɛ́ okane Biblia lɛ ni eje kpo lɛ, ebaaye ebua bo ni ofee nɔ ni okaneɔ lɛ he mfoniri jogbaŋŋ. Kɛ́ okɛ oweku lɛ miikane Biblia lɛ, nyɛbaanyɛ nyɛja mɛi ni yɔɔ sane ni nyɛkaneɔ lɛ mli lɛ nyɛhã nyɛhe. Enɛ baawa nyɛ ni nyɛfee sane lɛ he mfoniri jogbaŋŋ.

• Feemɔ bɔ ni nibii tee lɛ lɛ he mfoniri. Kwɛmɔ akɛ, mɛni eeenyɛ efee akɛ eyaa nɔ yɛ mɛi ni okaneɔ amɛhe sane lɛ ajwɛŋmɔ mli, ni te amɛnuɔ he amɛhãa tɛŋŋ? Akɛ nɔkwɛmɔnɔ lɛ, obaanyɛ obi ohe akɛ: ‘Mɛni hewɔ mɔ nɛɛ wie nɔ ni ewie lɛ, loo efee nɔ ni efee lɛ? Eji mi miyɔɔ shihilɛ nɛɛ mli kulɛ, mɛni baaya nɔ yɛ mijwɛŋmɔ mli, ni te manu he mahã tɛŋŋ?’

• Tɛŋmɔ sane lɛ he mfoniri. Kɛ́ oleee nitɛŋmɔ jogbaŋŋ po, shi obɔ mɔdɛŋ otɛŋ bɔ ni nibii tee nɔ lɛ he mfoniri lɛ, ebaawa bo ni ofee nibii ni tee nɔ lɛ he mfoniri, ni obaakai sane lɛ jogbaŋŋ.