Ninefɔ̃ɔ Krɛdɛɛ Ko
1. Mɛɛ be abaaje afi 2014 kpeei he ninefɔ̃ɔ woji lɛ ajaramɔ lɛ shishi?
1 Kɛ́ ooto gbɛjianɔ ni ohoo niyenii krɛdɛɛ ko ni hoomɔ wa ni biɔ ni afite shika pii kɛhoo ohã onanemɛi loo owekumɛi lɛ, ekã shi faŋŋ akɛ obaaná miishɛɛ waa kɛ́ ootsɛ́ amɛ ni amɛbaye. Nakai nɔŋŋ agbo deŋme kɛto mumɔŋ niyenii ni akɛbaahã wɔ yɛ afi 2014 kpokpaa wulu nɔ kpee lɛ kɛ majimaji ateŋ kpee lɛ shishi lɛ he gbɛjianɔ. Kɛ́ eshwɛ otsii etɛ ni wɔbaaya wɔkpee lɛ, wɔbaaná hegbɛ ni wɔkɛfɔ̃ mɛi krokomɛi anine kɛba shishi. Mɛni baaye abua wɔ ni wɔkɛ miishɛɛ afɔ̃ amɛ nine?
2. Mɛni baatsirɛ wɔ ni wɔkɛ wɔhe awo tafãa lɛ mli kɛmɔ shi?
2 Kɛ́ wɔjwɛŋ bɔ ni wɔnáa mumɔŋ okpɔlɔ ni Yehowa ŋmɛɔ wɔ yɛ kpokpaa wuji anɔ kpeei ashishi lɛ he lɛ, ebaatsirɛ wɔ ni wɔkɛ wɔhe awo tafãa lɛ mli kɛmɔ shi. (Yes. 65:13, 14) Esa akɛ wɔkai hu akɛ ta ni wɔfãa daa afi kɛjaraa ninefɔ̃ɔ woji nɛɛ woɔ yibii. Mɛi ni wɔfɔ̃ɔ amɛ nine lɛ ateŋ mɛi komɛi kɛ wɔ yaa kpee lɛ. Ekɔɔɔ he eko mɛi abɔ ni baaba kpee lɛ, mɔdɛŋ ni wɔbaabɔ kɛjara woji lɛ kɛ yijiemɔ baahã Yehowa, ni abaana hu akɛ Yehowa mli hi.—Lala 145:3, 7; Kpoj. 22:17.
3. Mɛɛ gbɛ nɔ wɔbaatsɔ wɔjara ninefɔ̃ɔ woji lɛ?
3 Onukpai akuu lɛ baatsɔɔ bɔ ni amɛsafo lɛ baafee ni amɛjara ninefɔ̃ɔ woji lɛ kɛkpele shikpɔŋkuku lɛ mli. Amɛbaatsɔɔ hu kɛ́ nyɛmimɛi lɛ baashi eko yɛ mɛi ni bɛ shĩa lɛ ashinai anaa loo kɛ́ amɛbaanyɛ amɛkɛtsu nii be ni amɛyeɔ maŋ odase yɛ amɛshikpɔŋkuku lɛ mli lɛ. Kɛ́ nyɛmiijara ninefɔ̃ɔ woji lɛ yɛ otsi lɛ naagbee lɛ, nyɛkɛ woji tɛtrɛbii lɛ afataa he, kɛ́ eeehi. Kɛ́ klɛŋklɛŋ Hɔɔ ni yɔɔ nyɔɔŋ lɛ mli lɛ yagbee tafãa be lɛ mli lɛ, esa akɛ nyɛjara ninefɔ̃ɔ woji lɛ titri, moŋ fe ni nyɛaaje Biblia mli nikasemɔi ashishi. Kɛ́ wɔgbe tafãa lɛ naa lɛ, kwɛ miishɛɛ ni wɔbaaná akɛ wɔkɛ wɔhe wo mli kɛ ekãa, ni akɛ wɔfɔ̃ mɛi babaoo ni wɔbaanyɛ lɛ anine kɛbafata wɔhe yɛ mumɔŋ okpɔlɔ ni Yehowa ŋmɛ wɔ lɛ shishi!