Yehowa Kɛ Musuŋtsɔlɛ Yeɔ Nɔ

ADESAI nɔyelɔi babaoo kɛ nɔyeli hewalɛ etsu nii yɛ gbɛ ni musuŋtsɔlɛ bɛ mli nɔ, yɛ yinɔsane be fɛɛ mli ni amɛbuuu piŋmɔ ni amɛshishibii lɛ tsɔɔ mli lɛ. Shi kɛlɛ, Yehowa kɛ sɔrɔtofeemɔ hã kɛtsɔ maŋ ko ni ehala—Israel—ni ekɛ musuŋtsɔlɛ ye amɛnɔ lɛ nɔ.

Beni Israelbii lɛ ji nyɔji lolo yɛ blema Mizraim lɛ, Yehowa nu amɛbolɔmɔi kɛha yelikɛbuamɔ lɛ he. “Amɛhaomɔi lɛ fɛɛ mli lɛ, lɛ hu ehao; . . . ekpɔ̃ amɛ yɛ esuɔmɔ kɛ emɔbɔnalɛ hewɔ.” (Yesaia 63:9) Yehowa baa Israel yi, ekɛ naakpɛɛ niyenii ha amɛ, ni ekpɔ̃ amɛ kɛtee amɛ diɛŋtsɛ amɛshikpɔŋ lɛ nɔ.

Yehowa su ni ji musuŋtsɔlɛ lɛ baje kpo ekoŋŋ yɛ mlai ni ekɛha nɛkɛ maŋ nɛɛ lɛ mli. Efã Israelbii lɛ koni amɛkɛ awusai, okulafoi, kɛ mɛi kpɔji ni batoɔ gbɔ lɛ aye yɛ musuŋtsɔlɛ naa. Esaaa akɛ amɛkɛ mɛi ni eje kpa lɛ yeɔ yɛ gbɛ ni ejaaa nɔ.

Mla lɛ bi ni ajie musuŋtsɔlɛ kpo atsɔɔ mɛi ni ehia amɛ lɛ. Ohiafoi lɛ baanyɛ aye kpɛkpɛo yɛ nikpamɔ be lɛ sɛɛ. Afolɔɔ nyɔji amli yɛ Hejɔɔmɔ afi (ni gbeɔ yi feɔ kpawo) lɛ nɔ. Esa akɛ akɛ gboshinii tamɔ shikpɔji fɛɛ ni ahɔ̃ɔ aku sɛɛ aha nɔtsɛmɛi yɛ afi (50) Nyamɔ lɛ nɔ. Ancient Israel—Its Life and Institutions bɔ amaniɛ akɛ: “Yɛ Israel lɛ, kwasafoŋ shihilɛ mli kui ehiko shi yɛ ŋmɛnɛŋmɛnɛ beaŋ shishinumɔ naa dã.” “Kɛ hooo lɛ Israelbii lɛ fɛɛ ná shihilɛ kome too lɛ nɔŋŋ mli ŋɔɔmɔ.”—3 Mose 25:10; 5 Mose 15:12-14; 24:17-22; 27:18.

Yehowa Musuŋtsɔlɛ lɛ Kasemɔ

Nyɔŋmɔ tsuji náa kanyamɔ kɛjɛɔ emusuŋtsɔlɛ lɛ mli. Akɛ nɔkwɛmɔnɔ lɛ, maŋtsɛmɛi komɛi ni atoɔ amɛ ehee lɛ egbe tsutsu maŋtsɛmɛi awekukpaa lɛ mli bii ni yɔɔ wala mli lolo lɛ yɛ yinɔsane be fɛɛ mli. Shi Yehowa tsulɔ David efeee enɛ. Maŋtsɛ Saul gbele sɛɛ lɛ, David baa Mefiboshet, Saul nabi kɛ gboshiniyelɔ lɛ yi. “Maŋtsɛ lɛ jie musuŋtsɔlɛ kpo etsɔɔ Saul bi Yonatan bi Mefiboshet lɛ.”—2 Samuel 21:7, NW.

Adesa ko ekaseko Yehowa musuŋtsɔlɛ lɛ tamɔ Yesu fee lɛ. Naakpɛɛ nii babaoo ni efee lɛ ji nɔ ni musuŋtsɔlɛ ni Nyɔŋmɔ gbeyeishemɔ yɔɔ mli kanya. Be ko lɛ, kpitiyelɔ ko kpa lɛ fai akɛ: “Kɛji oosumɔ lɛ, oonyɛ oha mihe atse.” Yesu kɛ musuŋtsɔlɛ ta ehe ni ekɛɛ: “Miisumɔ, ohe atse!” (Marko 1:40-42) Yɛ be kroko mli lɛ, asafoi babaoo ko nyiɛ Yesu sɛɛ. Yɛ hoofeemɔ lɛ mli lɛ, Yesu gbala ejwɛŋmɔ kɛtee hii shwilafoi enyɔ komɛi anɔ ni bolɔɔ akɛ: “Naa wɔ mɔbɔ, Nuntsɔ, David bi! . . . Ni Yesu musuŋ tsɔ lɛ yɛ amɛhewɔ, ni etara amɛhiŋmɛii lɛ ahe, ni amrɔ lɛ amɛna nii.”—Mateo 20:29-34.

Asafoi babaoo egbeee Yesu henumɔi ni eyɔɔ kɛha mɛi krokomɛi lɛ. Akɛni be saŋŋ nɛ ni amɛyeko nɔ ko hewɔ lɛ, ekɛɛ yɛ be ko mli akɛ: “Mimusuŋ miitsɔ mi yɛ asafo lɛ hewɔ.” No hewɔ lɛ, elɛ amɛ yɛ naakpɛɛ gbɛ nɔ. (Marko 8:1-8) Kɛ Yesu miikpa shi lɛ, etsɔɔɔ mɛi babaoo lɛ anii kɛkɛ, shi moŋ eyɔseɔ amɛhiamɔ nibii lɛ hu. (Mateo 9:35, 36) Yɛ nakai shikpaa lɛ eko sɛɛ lɛ, Yesu kɛ ekaselɔi lɛ náaa hejɔɔmɔ be po ni amɛkɛaaye nii. Biblia mli amaniɛbɔɔ lɛ gbaa wɔ akɛ: “Ni amɛtsɔ lɛlɛ mli kɛtee ŋa lɛ nɔ heko banee. Ni beni asafoi lɛ na amɛ ni amɛyaa lɛ, mɛi pii yoo lɛ, ni amɛjɛ maji lɛ fɛɛ mli amɛjo foi kɛtsɔ shikpɔŋ kɛtee jɛi, ni amɛho amɛnaa, ni amɛyabua amɛhe naa kɛba eŋɔɔ. Ni beni Yesu kpeleke lɛ, ena mɛi babaoo, ni emusuŋ tsɔ lɛ yɛ amɛhewɔ, ejaakɛ amɛtamɔ tooi ni bɛ kwɛlɔ; ni ebɔi amɛ nibii pii tsɔɔmɔ.”—Marko 6:31-34.

Nɔ ni tsirɛ Yesu lɛ jeee gbɔmɛi lɛ ahela kɛ ohia lɛ pɛ kɛkɛ, shi moŋ amɛmumɔŋ shihilɛ hu. Amɛhiɛnyiɛlɔi lɛ miiná amɛhe sɛɛ yɛ gbɛ ni ejaaa nɔ, no hewɔ lɛ, Yesu ‘musuŋ tsɔ lɛ yɛ amɛhewɔ.’ Hela wiemɔ kɛha “emusuŋ tsɔ lɛ” lɛ shishi ji “ni ooonu he kɛjɛ omlinii amli.” Yesu ji nuu musuŋtsɔlɔ lɛɛlɛŋ!

Musuŋtsɔlɛ yɛ Jeŋ ko ni Yi Wa Mli

Amrɔ nɛɛ, Yesu Kristo ji Yehowa ŋwɛi Maŋtsɛyeli lɛ nɔ Maŋtsɛ. Taakɛ efee yɛ blema Israel lɛ, Nyɔŋmɔ kɛ musuŋtsɔlɛ miiye ewebii lɛ anɔ ŋmɛnɛ. “Gbi ni mabafee lɛ amɛaatsɔ minɔ, Yehowa Zebaot kɛɛ, mi diɛŋtsɛ minɔ; ni mabaa amɛyi.”—Maleaki 3:17

Esa akɛ mɛi ni miisumɔ koni amɛnine ashɛ Yehowa musuŋtsɔlɛ lɛ nɔ lɛ akase egbɛ̀i lɛ. Eji anɔkwale akɛ wɔyɛ jeŋ ko ni gbɔmɛi sumɔɔ ní amɛbaa amɛshihilɛ gbɛ lɛ yi babaoo fe ni amɛaaye amɛbua mɛi ni ehia amɛ lɛ. Bei pii lɛ, nɔyelɔi lɛ kɛ nitsulɔi kɛ nihelɔi ashweshweeshwe shihilɛ shaa afɔle kɛtaoɔ sɛɛnamɔ. Yɛ 2 Timoteo 3:1-4 lɛ, Biblia lɛ tsɔɔ bɔ ni jeŋba he shihilɛ lɛ ji yɛ wɔbe nɛɛ mli ni no egbe musuŋtsɔlɛ yɛ mɛi babaoo atsuii amli lɛ he sane yɛ gbɛ ni ja nɔ.

Ni kɛlɛ wɔbaanyɛ wɔtao hegbɛi ni wɔkɛaajie musuŋtsɔlɛ kpo lolo. Ani wɔbaanyɛ ni wɔkɛ yelikɛbuamɔi komɛi ni he hiaa aha wɔnanemɛi? Ani mɔ ko yɛ ni he miiye ni wɔbaanyɛ wɔyasara lɛ? Ani wɔbaanyɛ wɔshɛje mɛi ni efee gbilinii lɛ amii, yɛ ŋaawoo nɛɛ kɛ gbeekpamɔ naa: “Nyɛshɛjea mɛi ni tsui faa lɛ amii; nyɛherea mɛi ni feɔ gbedee lɛ”?—1 Tesalonikabii 5:14.

Musuŋtsɔlɛ baaye abua wɔ hu koni wɔkwa basabasafeemɔ kɛ́ mɛi krokomɛi tɔ̃ wɔnɔ lɛ. Akɛɔ wɔ akɛ: “Nyɛhaa mlijoomɔ kɛ mlila kɛ mlifu kɛ bolɔmɔ kɛ musubɔɔ fɛɛ sɛɛ afoa yɛ nyɛteŋ, kɛ efɔŋ fɛɛ efɔŋ. Shi nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe, nyɛŋɔfafaa nyɛhe, taakɛ bɔ nɔŋŋ ni Nyɔŋmɔ ŋɔ fa nyɛ yɛ Kristo mli lɛ.”—Efesobii 4:31, 32.

Musuŋtsɔlɛ baaye abua wɔ koni wɔkwa su ni aaaha wɔkɛ hewalɛ atsu nii yɛ gbɛ ni ejaaa nɔ lɛ. Biblia lɛ kɛɛ: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijoomɔ, tsuishitoo.” (Kolosebii 3:12) Heshibaa jwɛŋmɔ haa wɔnyɛɔ wɔkɛ wɔhe woɔ mɛi ni bajeɔ wɔkwɛmɔ shishi lɛ ashihilɛ mli. Nɔ ni kɔɔ musuŋtsɔlɛ kpo ni aaajie lɛ he ji ni aaafee hiɛshikãlɔi kɛ nilelɔi, moŋ fe ni eeewa akɛ aaasa hiɛ. Esaaa akɛ wɔkɛ nitsumɔ ni aaatsu lɛ jogbaŋŋ lɛ jieɔ wɔnaa kɛha gbɔmɛi ni wɔkɛ amɛ aaaye tamɔ tsɔne he nibii kɛkɛ lɛ. Agbɛnɛ hu, yɛ weku lɛ mli lɛ, wumɛi ni yɔɔ musuŋtsɔlɛ lɛ baakai akɛ amɛŋamɛi lɛ ji nibii ni waaa tuutu ko. (1 Petro 3:7) Yesu musuŋtsɔlɛ nɔkwɛmɔnɔ lɛ hesusumɔ baanyɛ aye abua wɔ yɛ enɛɛmɛi fɛɛ mli.

Akɛni Yesu nu he waa eha gbɔmɛi yɛ eshikpɔŋ nɔ sɔɔmɔ lɛ mli hewɔ lɛ, wɔbaanyɛ wɔná nɔmimaa akɛ nakai eji amrɔ nɛɛ, ni ebaaya nɔ koni efee Nɔyelɔ ni yɔɔ musuŋtsɔlɛ. Lala 72 kɛɔ yɛ ehe yɛ gbalɛ naa akɛ: “Eeeye maŋbii lɛ ateŋ nɔnalɔi lɛ asane eha amɛ, ni eeehere ohiafoi abii ayiwala, ni eeekumɔ weiyelɔ dukuduku. Eeeye nɔ kɛaajɛ ŋshɔ nɔ kɛaatee ŋshɔ nɔ, ni kɛaajɛ faa lɛ naa kɛyashi shikpɔŋ lɛ naagbeehei lɛ. Eeena ohiafo kɛ mɔ ni efi lɛ lɛ mɔbɔ, ni eeehere mɛi ni efi amɛ lɛ asusumai ayiwala.”—Lala 72:4, 8, 13.

Nyɔŋmɔ Wiemɔ lɛ tsɔɔ hiɛ egbaa akɛ: “Eeekojo ohiafoi yɛ jalɛ naa, ni jajemɔ hu ekɛaakã mɛi lɛ, ni eeebu mɛi ni nii yɔɔ mɔbɔ yɛ shikpɔŋ lɛ nɔ lɛ atɛ̃ŋ bɔ ni ja. . . . ni ekɛ enaabu mumɔ lɛ aaagbe mɔfɔŋ lɛ.” Yɛ sɛɛ mli beni etsɔɔ bɔ ni yiwalɔi, gbɔmɛi ni tamɔ kooloi awuiyelɔi lɛ baatsake amɛgbɛ̀i lɛ, gbalɛ lɛ tee nɔ akɛ: “Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” (Yesaia 11:4-9) Nɛkɛ gbalɛ nɛɛ kɛ shiwoi diɛŋtsɛ ni kɔɔ jeŋ muu fɛɛ asafo kɛ emli gbɔmɛi ni le Yehowa ni amɛkaseɔ emusuŋtsɔlɛ gbɛ̀i lɛ haa!