Ani Okaiɔ?

Ani ónyã Buu-Mɔɔ sɔrɔtoi ni ba nyɛsɛɛ nɛɛ akanemɔ he? Ojogbaŋŋ, kwɛmɔ akɛ ooonyɛ oha sanebimɔi ni nyiɛ sɛɛ nɛɛ ahetoo lo:

◻ Mɛni ji yiŋtoo titri ni yɔɔ wolo kasemɔ sɛɛ kɛha Kristofonyo gbekɛ?

Yiŋtoo titri ni yɔɔ wolo kasemɔ sɛɛ ji ni ewula gbekɛ lɛ koni enyɛ efee Yehowa sɔɔlɔ ni he esa kɛmɔ shi. Ni wolo kasemɔ ni he hiaa fe fɛɛ ji mumɔŋ nikasemɔ.—8/15, baafa 21.

◻ Mɛni ji yiŋtoi ahewɔ ni abɔɔ efɔŋ ni hiɛdɔɔ yɔɔ mli ni naanyo Kristofonyo ko efee lɛ he amaniɛ atsɔɔ onukpai lɛ?

Yiŋtoo kome ni haa abɔɔ nɔ fɔŋ feemɔ he amaniɛ ji akɛ, ebaa asafo lɛ hetsemɔ yi. Yiŋtoo kroko ji akɛ, nakai feemɔ ji nifeemɔ ni damɔ Kristofoi ashishitoo mla ni suɔmɔ yɔɔ mli ni ajieɔ lɛ kpo atsɔɔ Nyɔŋmɔ, asafo lɛ, kɛ efɔŋfeelɔ lɛ nɔ.—8/15, baafai 28, 30.

◻ Mɛni ‘Yehowa gbi lɛ ni aaahi jwɛŋmɔ mli’ lɛ tsɔɔ? (2 Petro 3:12)

Enɛ tsɔɔ akɛ wɔkajie “Yehowa gbi lɛ,” (NW) kɛmiijɛ wɔjwɛŋmɔi amli. Esaaa akɛ wɔhiɛ kpaa nɔ akɛ gbi ni Yehowa kɛbaakpata nibii agbɛjianɔtoo nɛɛ hiɛ lɛ ebɛŋkɛ. Esa akɛ efee nɔ ni yɔɔ diɛŋtsɛ kɛha wɔ akɛ wɔmiina lɛ faŋŋ, akɛ no kã wɔhiɛ nɔŋŋ nɛɛ. (Zefania 1:7, 14)—9/1, baafa 19.

◻ Mɛni hewɔ nibii agbɛjianɔtoo nɛɛ naagbee gbii lɛ ehi shi be kakadaŋŋ fe bɔ ni mɛi pii kpa gbɛ lɛ?

Yehowa susuɔ nɔ ni hi fe fɛɛ kɛha adesai fɛɛ he. Gbɔmɛi awala he hiaa lɛ waa. (Ezekiel 33:11) Wɔbaanyɛ wɔna hekɛnɔfɔ̃ɔ akɛ naagbee lɛ baaba yɛ be ni sa pɛpɛɛpɛ mli, koni eha wɔ-Bɔlɔ ni yɔɔ suɔmɔ, ni ele nii fe fɛɛ lɛ yiŋtoo aba mli.—9/1, baafa 22.

◻ Te mɛi ni yɔɔ be-fɛɛ sɔɔmɔ lɛ mli lɛ aaafee tɛŋŋ ni amɛhiɛ amɛmiishɛɛ mli yɛ naagbai ni ekolɛ ejwere amɛhiɛ lɛ fɛɛ sɛɛ?

Esa akɛ amɛsusu jɔɔmɔi babaoo ni amɛna lɛ, kɛ gbɔmɛi akpei abɔ ni piŋɔ yɛ jaramɔi ni naa wa waa mli lɛ ahe. (1 Petro 5:6-9)—9/15, baafa 24.

◻ Mɛni ji oti ni ma William Tyndale hiɛ hewɔ ni etsɔɔ Biblia lɛ shishi lɛ?

Oti ni ma Tyndale hiɛ ji ni eha Ŋmalɛi lɛ awie atsɔɔ gbɔmɔ folo lɛ yɛ wiemɔi ni ja ni yɔɔ mlɛo bɔ ni sa mli.—9/15, baafa 27.

◻ Te wɔɔfee tɛŋŋ wɔtsɔɔ akɛ wɔji Nyɔŋmɔ Wiemɔ lɛ sɛɛfilɔi anɔkwafoi?

Wɔtsɔɔ akɛ wɔji mɛi ni kɛ anɔkwayeli fãa Nyɔŋmɔ Wiemɔ lɛ he kɛtsɔɔ ekãa ni wɔkɛshiɛɔ wɔtsɔɔ mɛi krokomɛi lɛ nɔ. Wɔfeɔ nakai hu akɛ tsɔɔlɔi kɛtsɔ Biblia lɛ ni wɔkɛtsuɔ nii jogbaŋŋ lɛ nɔ, koni wɔkatsɔ̃mɔ̃ nɔ ni ekɛɔ lɛ loo wɔkɛ eko fata he bɔ ni baasa wɔsusumɔi. (2 Timoteo 2:15)—10/1, baafa 20.

◻ Mɛɛ gbɛ je lɛ mumɔ ni ebɔɔ yɔɔ mli lɛ baatsɔ nɔ agbɔjɔ wɔhemɔkɛyeli? Je lɛ mumɔ lɛ baanyɛ agbɔjɔ emuuyeli mli ni wɔhiɛ lɛ kɛtsɔ feemɔ ni eeefee wɔ mɛi ni amɛmii shɛɛɛ nɔ ni wɔyɔɔ lɛ he, ni wɔfee mɛi ni sumɔɔ ni wɔkɛ wɔ diɛŋtsɛ wɔhiamɔ nii kɛ nibii ni wɔsumɔɔ aye Nyɔŋmɔ nɔ̃ lɛ hiɛ lɛ nɔ. (Okɛto Mateo 16:21-23 he.)—10/1, baafa 29.

◻ Akɛ ajɛ susuma muu fɛɛ mli asɔmɔ Yehowa lɛ tsɔɔ mɛni? “Susuma” lɛ tsɔɔ gbɔmɔ muu lɛ fɛɛ, kɛ egbɔmɔtsoŋ kɛ jwɛŋmɔŋ nyɛmɔi fɛɛ. Wɔsusuma muu fɛɛ mli ni wɔjɛɔ wɔsɔmɔɔ Yehowa lɛ tsɔɔ wɔhe ni wɔkɛhaa, wɔjwɛŋmɔŋ nyɛmɔi fɛɛ ni wɔkɛtsuɔ nii, kɛ wɔ hewalɛi ni wɔkɛtsuɔ nii kɛyashɛɔ he ni wɔɔnyɛ yɛ Nyɔŋmɔ sɔɔmɔ mli. (Marko 12:29, 30)—10/15, baafa 13.

◻ Mɛni ji nɔ titri ni haa mɔ ko feɔ mɔ ni kɛ shishitoo taomɔ nii ni Nyɔŋmɔ gbeyeishemɔ yɔɔ mli tsuɔ nii? Nɔ titri lɛ ji ni ale Yehowa, esuɔmɔnaa nii, nibii ni esumɔɔɔ, kɛ eyiŋtoi. Kɛji akɛ shishijee nibii ni kɔɔ Nyɔŋmɔ he nɛɛ kudɔ wɔshihilɛ lɛ, amɛbatsɔmɔɔ shishitoo taomɔ nii ni yɔɔ diɛŋtsɛ. (Yeremia 22:16; Hebribii 4:12)—10/15, baafa 29.

◻ Mɛɛ nifeemɔ ni ŋmɛɔ pɛpɛɛpɛ Yehowa tsuji kɛtsuɔ adesa nɔyeli he nii? Amɛkɛ amɛhe wooo maŋkwramɔŋ saji amli, akɛni amɛsɔmɔɔ akɛ Nyɔŋmɔ Maŋtsɛyeli lɛ najiaŋdamɔlɔi loo bɔfoi lɛ hewɔ. (2 Korintobii 5:20) Yɛ gbɛ kroko nɔ lɛ, amɛjɛɔ amɛ henilee mli amɛbaa amɛhe shi amɛhaa mɛi ni yeɔ nɔ lɛ.—11/1, baafa 16.

◻ Mɛni wɔbaanyɛ wɔkase kɛjɛ gbɛ ni gbalɔ Elisha tsɔ nɔ lɛ mli?

Beni afɔ̃ nine atsɛ lɛ koni ekɛ Elia abana sɔɔmɔ krɛdɛɛ mli gbɛfaŋnɔ lɛ, Elisha kɛ oyaiyeli shi eŋmɔ lɛ mli koni ebasɔmɔ Elia, eyɛ mli akɛ enitsumɔi lɛ ekomɛi baa shi. (2 Maŋtsɛmɛi 3:11) Nyɔŋmɔ tsuji ni yɔɔ ŋmɛnɛ lɛ ateŋ mɛi komɛi ejie he kɛ afɔleshãa mumɔ ni tamɔ nakai nɔŋŋ kpo kɛtsɔ amɛnitsumɔi ni amɛkɛkwɛɔ amɛhe lɛ ni amɛshi koni amɛyashiɛ sanekpakpa lɛ yɛ shikpɔŋkukuji ni yɔɔ shɔŋŋ mli lɛ nɔ.—11/1, baafa 31.

◻ Mɛɛ ŋaawoo ni sɛɛnamɔ yɔɔ he yɔɔ Yakobo wolo lɛ mli?

Etsɔɔ wɔ bɔ ni wɔɔfee wɔkpee kaai anaa, ewoɔ wɔ ŋaa ni wɔkakwɛ gbɔmɛi ahiɛaŋ, ni ewoɔ wɔ hewalɛ ni wɔkɛ wɔhe awo nitsumɔi ni ja mli. Yakobo woɔ wɔ hewalɛ ni wɔye wɔlilɛi lɛ nɔ, wɔte shi wɔshi hewalɛ ni je lɛ naa yɛ wɔnɔ lɛ, ni wɔha toiŋjɔlɛ ashwere. Ewiemɔi lɛ hu baanyɛ aha wɔŋmɛ wɔtsui shi ni wɔfee mɛi ni sɔleɔ.—11/15, baafa 24.

◻ Mɛni hewɔ Yehowa “ŋɔfaa mra” (NW) lɛ? (Lala 86:5)

Yehowa kɛ sane keɔ mra ejaakɛ ehiɛ kpaaa nɔ akɛ wɔji bɔɔ nii ni akɛ sũ fee wɔ, ni wɔhe waaa, loo wɔyɛ gbɔjɔmɔi, yɛ emuu ni wɔyeee lɛ hewɔ. (Lala 103:12-14)—12/1, baafai 10, 11.

◻ Mɛni hewɔ esa akɛ wɔsumɔ akɛ wɔkɛ sane aaake mɛi krokomɛi lɛ?

Kɛji wɔkpɛlɛɛɛ ni wɔkɛ mɛi krokomɛi ahe keɔ amɛ kɛji nɔdaamɔ nɔ yɛ kɛha mɔbɔnalɛ lɛ, ebaanyɛ esa wɔkɛ Nyɔŋmɔ teŋ wekukpaa he yɛ gbɛ fɔŋ nɔ. (Mateo 6:14, 15)—12/1, baafa 17.