“Shishifai ni Anyɛŋ Afamɔ”

NƆ NI fata je lɛŋ nibii ni dara fe fɛɛ ni etsɛ fe fɛɛ ni yɔɔ wala mli lɛ ahe ji sequoia tsei ni yɔɔ California lɛ. Nɛkɛ naakpɛɛ nii ni kwɔlɔ gojogojoo nɛɛ shɛɔ mitai 90 beni amɛdara loo amɛsa amɛgbe naa kwraa lɛ ni amɛnyɛɔ amɛhiɔ shi kɛyashɛɔ afii 3,000.

Eyɛ mli akɛ sequoia tso lɛ kwɛmɔ yɛ naakpɛɛ moŋ, shi eshishifai ahe gbɛjianɔtoo ni anaaa lɛ hu yɛ naakpɛɛ nakai nɔŋŋ. Sequoia tso lɛ shishifai tamɔ saa ni akɛha shikpɔŋ ni elɛɛmɔ baanyɛ ashɛ abasafai 480 kɛmiiya 640 koji ejwɛ. Nɛkɛ shishifa he gbɛjianɔtoo ni da waa nɛɛ haa edamɔɔ shi shiŋŋ yɛ nua afua naa kɛ be mli ni kɔɔyɔɔ ni naa wa waa miitswa. Sequoia tso lɛ nyɛɔ edamɔɔ shikpɔŋhosomɔ ni naa wa waa po naa!

Maŋtsɛ Salomo hala tso ni wa faji ahe gbɛjianɔtoo lɛ akɛ nɔ ni akɛtoɔ sane he yɛ ebɛbuai lɛ ekome mli. Ekɛɛ: “Gbɔmɔ ko nyɛŋ afi shi kɛtsɔ efɔŋ feemɔ nɔ, shi gbɔmɛi kpakpai yɛ shishifai ni anyɛŋ afamɔ.” (Abɛi 12:3, The New English Bible) Hɛɛ, efɔŋ feelɔi nyɛŋ adamɔ shi shiŋŋ. Omanye fɛɛ omanye ni tamɔ nɔ ni amɛye lɛ hiɔ shi yɛ be fioo ko pɛ mli, ejaakɛ Yehowa woɔ shi akɛ “mɛi fɔji agbɛkwɛmɔ lɛ baafee yaka.”—Abɛi 10:28.

Enɛ ji kɔkɔbɔɔ kɛha mɛi ni kɛɔ akɛ amɛji Kristofoi lɛ, ejaakɛ Yesu kɛɛ akɛ amɛteŋ mɛi komɛi “bɛ shishifa” ni amɛnane aaatɔtɔ. (Mateo 13:21) Agbɛnɛ hu, bɔfo Paulo ŋma yɛ gbɔmɛi komɛi ni apasa “tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosoɔ amɛ” lɛ ahe. (Efesobii 4:14) Te aaafee tɛŋŋ atsi enɛ naa?

Taakɛ bɔ ni sequoia tso shishifa lɛɛɔ yɛ shikpɔŋ su ni haa lɛ niyenii kpakpa mli lɛ, nakai nɔŋŋ ehe hiaa ni wɔjwɛŋmɔi kɛ tsuii abote Nyɔŋmɔ Wiemɔ lɛ mli vii ni elɛɛ shi ni egbala niyenii kɛjɛ enui ni haa wala lɛ amli. Enɛ baaye abua wɔ ni wɔna hemɔkɛyeli ni shishifa ma shi shiŋŋ. Shi wɔbaanu kaai ni tamɔ ahum he moŋ. Wɔhe baakpokpo po tamɔ tso, yɛ fimɔ bei amli. Shi kɛ wɔhemɔkɛyeli ma shi shiŋŋ lɛ, wɔbaafee mɛi ni yɔɔ “shishifai ni anyɛŋ afamɔ.”—Okɛto Hebribii 6:19 he.