“Yɛ Kunimyeli Shifoo Mli”

KUNIMYELI shifoo ji henyɛlɔ nɔ kunim ni aye lɛ he gbijurɔ ko ni ayeɔ ni ekaaa. Woo ni fe fɛɛ ni Roma Maŋ Gwabɔɔ lɛ kɛhaa tatsɛ kunimyelɔ lɛ ji ni aŋmɛ lɛ gbɛ ni ekɛ shifoo ni fiteɔ shika babaoo yɛ mli eye ekunimyeli lɛ he gbijurɔ. Bɔfo Paulo tsi kunimyeli shifoo lɛ ta shii enyɔ yɛ eniŋmaai amli. Shi dani wɔɔsusu ewiemɔi lɛ ahe lɛ, bɔɔ mɔdɛŋ ni ofee shifoo ni tamɔ nɛkɛ he mfoniri yɛ ojwɛŋmɔ mli. Susumɔ gbɔmɛi asafoi babaoo ni amɛto srɛnɛɛ yɛ gbɛjegbɛi anɔ ni amɛnyiɛɔ blɛoo yɛ Via Triumphalis lɛ nɔ kɛbɔleɔ shi kɛkwɔɔ kɛyaa Jupiter sɔlemɔtsu loo gbatsu ni yɔɔ Roma Capitoline Ŋmeŋme lɛ nɔ lɛ mli lɛ he okwɛ.

Woloŋlelɔ James M. Freeman ŋma akɛ: “Ashaa tsofa-kɛ-ŋma ni jeɔ ŋma waa ni agbɛɔ nɛkɛ ŋma nɛɛ ashwaa sɔlemɔtsui lɛ amli kɛ gbɛjegbɛi lɛ anɔ ni amɛŋma lɛ yimɔɔ kɔɔyɔŋ obɔ. Mɛi ni fata shifoo nɛɛ he ji bɛgwafoi kɛ maŋ onukpai, ni na ni anaa amɛ yɛ jɛmɛ lɛ woɔ kunimyelɔ lɛ hiɛ nyam. Tawuu mli nihaa nii ni jara wa fe fɛɛ, tamɔ shika-futru, jwiɛtɛi, kɛ tawuu nii sɔrɔtoi fɛɛ, aflaŋai, nitɛŋmɔi loo ŋaa nitsumɔi ni ekaaa ni jara wa waa, kɛ nɔ fɛɛ nɔ ni kunimyelɔ lɛ kɛ mɔ ni aye enɔ kunim lɛ buɔ akɛ ejara wa waa lɛ fɛɛ bafeɔ nibii ni atereɔ yɛ maŋ muu lɛ fɛɛ ni gbɔmɛi eyi mli obɔ lɛ ahiɛ. Anyɛɔ tawuu mli gboklɛfoi lɛ anɔ koni amɛfata shifoo lɛ he. Tatsɛ ni lɛ ehewɔ afoɔ shi akɛwoɔ ehiɛ nyam nɛɛ taa shwiili ko ni yɔɔ sɔrɔto ni okpɔŋɔi ejwɛ gbalaa lɛ mli. Akɛ mama ni tamɔ wuɔfɔ su ebã atade yuu ni ewo lɛ naa, ni akɛ fɔfɔii ekpɛtɛkpɛtɛɛ emligbɛ atade lɛ mli. Nɔ ni yɔɔ enijejurɔ dɛŋ ji tso nine kɛ ebaa ni kpɛlɛɔ, ni nɔ ni ehiɛ yɛ ebɛku ji maŋtsɛtso; ni akɛ baa ko efee akekre akɛti eyitso ni enɛ ka ehiŋmɛiasɛɛ. Atereɔ kunimyelɔ lɛ kɛtsɔɔ gbɛjegbɛi lɛ anɔ ni akɛ lɛ yaa Jupiter sɔlemɔtsu lɛ mli ni asraafoi lɛ fɛɛ kɛ maŋbii lɛ miibɔ oshe, ni ayashaa afɔle yɛ jɛmɛ, ni no sɛɛ lɛ aŋmɛɔ okplɔ yɛ sɔlemɔwe lɛ.”

Paulo kɛ kunimyeli shifoo lɛ fee nɔkwɛmɔ nɔ beni eŋma ewolo ni ji enyɔ lɛ eyaha Kristofoi ni yɔɔ Korinto yɛ wɔ Ŋmɛnɛŋmɛnɛ Beaŋ afi 55 mli lɛ. Ekɛɛ: “Shi shidaa aha Nyɔŋmɔ, mɔ ni nyiɛɔ wɔhiɛ daa yɛ ekunimyeli shifoo mli yɛ Kristo mli, ni ehaa ehe nilee lɛ he ŋmajee lɛ tsɔɔ wɔ nɔ jeɔ kpo yɛ he fɛɛ he lɛ. Ejaakɛ Kristo ŋmajee kpakpa ji wɔ ha Nyɔŋmɔ yɛ mɛi ni ahereɔ amɛyiwala lɛ kɛ mɛi ni laajeɔ lɛ fɛɛ mli; sɛɛkpee bii lɛ, wɔji gbele ŋma ni jeɔ kɛyaa gbele mli ha amɛ, shi mɛi krokomɛi lɛ, wɔji wala ŋma ni jeɔ kɛyaa wala mli ha amɛ.”​—2 Korintobii 2:​14-16, NW.

Akɛ Paulo kɛ Kristofoi krokomɛi ni afɔ amɛ mu lɛ miidamɔ shi yɛ biɛ akɛ Nyɔŋmɔ tsuji ni amɛtu amɛhe amɛha Iɛ, “yɛ Kristo mli.” Amɛtamɔ bii, nitsumɔ mli onukpai, kɛ asraafoi ni fata mɛi ni amɛto kɛnyiɛ Yehowa sɛɛ lɛ ahe, ni enyiɛ amɛhiɛ yɛ kunimyeli shifoo mli yɛ gbɛ ni akɛ tsofa-kɛ-ŋma lɛ eshwa nɔ lɛ nɔ. (Kwɛmɔ wGA Vol. 111 No. 14, 1990, baafa 10-16.) Mfoniri-feemɔ gbɛ ni atsɔ nɔ akɛ shifoo nɛɛ tsu nii lɛ hu tsɔɔ akɛ gbɛkpamɔ kome pɛ ni ka mɛi ni kpooɔ Nyɔŋmɔ Maŋtsɛyeli lɛ he sanekpakpa lɛ hiɛ ji gbele. Shi kwɛ bɔ ni enɛ yɔɔ sɔrɔto yɛ Yesu sɛɛnyiɛlɔi ni afɔ amɛ mu lɛ anɔ he! Amɛyɛ hiɛnɔkamɔ akɛ amɛbaana wala ni gbele bɛ mli yɛ ŋwɛi kɛ Kristo. Ni amɛnanemɛi anɔkwafoi ni amɛjɔɔ amɛhe nɔ amɛha Nyɔŋmɔ lɛ hu? Amɛyɛ paradeiso shikpɔŋ nɔ shihilɛ he hiɛnɔkamɔ yɛ miishɛɛ mli, he ni “Nyɔŋmɔ baatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” (Kpojiemɔ 21:​1-4; Luka 23:43) Ani ofata gbɔmɛi asafo ni yɔɔ miishɛɛ nɛɛ ahe?

Akɛ mfoniri kroko tsɔɔ wɔ yɛ Kolosebii 2:​15, (NW) he ni Paulo ŋma yɛ akɛ: “Ni ekpɔlɔ nɔyelii lɛ kɛ hegbɛi lɛ ahe nii lɛ, ni [Nyɔŋmɔ] ebɔ amɛ ahora faŋŋ, akɛ aye amɛnɔ kunim, ni etsɔ enɛ nɔ enyiɛ amɛhiɛ yɛ kunimyeli shifɔɔ mli.” Afeɔ nɔyelii kɛ hegbɛi ni yɔɔ Satan Abonsam hewalɛ shishi lɛ ahe mfoniri akɛ gboklɛfoi ni aŋɔ amɛ nom ni yɔɔ kunimyeli shifɔɔ mli. Yehowa ni ji kunimyelɔ lɛ ekpɔlɔ amɛhe nii ni eha amɛnyiɛ yayai ekɛ amɛ miitsɔɔ yɛ faŋŋ akɛ aye amɛnɔ kunim. “Etsɔ enɛ nɔ,” ni ji Yesu “sɛŋmɔtso” lɛ nɔ eye amɛnɔ kunim. Egbele yɛ sɛŋmɔtso nɔ lɛ kɛ nɔ ni abaadamɔ nɔ ajie “wolo ni aŋma” (Mla kpaŋmɔ) lɛ kɛya lɛ ha, ni eha efee nɔ ni abaanyɛ aha Kristofoi aye amɛhe kɛjɛ Satan duŋ hewalɛi lɛ mli nyɔŋyeli shishi (Kolosebii 2:​13, 14) Kwɛ bɔ ni esa akɛ wɔhiɛ asɔ nɛkɛ Kristofoi aheyeli nɛɛ jogbaŋŋ wɔha!