Bɔ Ni Ooofee Odamɔ Amanehulu Naa

“TSUISHIŊMƐƐ nyɛkɛ aaahere nyɛsusumai lɛ.” Yesu Kristo wie nɛkɛ wiemɔi nɛɛ beni ekɛ egbalɛ ni kɔɔ “naagbee be” lɛ he lɛ haa lɛ. (Luka 21:​19; Daniel 12:⁠4) Saji otii enyɔ nɛɛ je kpo faŋŋ yɛ ewiemɔ lɛ mli: (1) Tsuishiŋmɛɛ he miihia yɛ wɔyiwalaheremɔ mli, ni (2) abaanyɛ ahiɛ mli kɛyawula shi.

Te ooofee tɛŋŋ ohiɛ mli kɛyawula shi lɛ? Yɛ sanebimɔ nɛɛ hetoohamɔ mli lɛ, klɛŋklɛŋ lɛ, esa ni wɔle nɔ hewɔ ni Yehowa ŋmɛɔ yiwaa kɛ piŋmɔ gbɛ ni amɛbaa etsuji anɔ.

Piŋmɔ Kɛ Yiwaa​—Mɛni Hewɔ?

Yiŋtoo ni yɔɔ enɛ he lɛ ji akɛ Satan tswa ja ni Yehowa nɔyeli lɛ ja kɛ ejalɛ lɛ mpoa. (1 Mose 3:​1-19) Yehowa eto gbɛjianɔ kɛha nɛkɛ mpoatswaa nɛɛ hetoohamɔ yɛ egbɛi lɛ kɛ mɛi krokomɛi ahewɔ.

Asaŋ, Nyɔŋmɔ eŋmɛ gbɛ koni etsuji ana nɔ yɛ yiŋtoi komɛi ni he baaba sɛɛnamɔ aha wɔ kɛ́ wɔkwɛ nakai nɔnaa lɛ yɛ gbɛ ni ja nɔ lɛ. Akɛ nɔkwɛmɔ nɔ lɛ, kɛ́ wɔto wɔtsui shi yɛ kaa shishi ni wɔdɔmɔɔɔ ŋtsɔi yɛ haomɔi ni baa wɔnɔ nɛɛ ahewɔ lɛ, belɛ, wɔmiijie wɔhe kpo wɔmiitsɔɔ akɛ wɔyɛ anɔkwale hemɔkɛyeli, nɔ̃ hemɔkɛyeli ni saa Nyɔŋmɔ hiɛ lɛ. (1 Petro 1:​6, 7; Hebribii 11:⁠6) Shi nɔnaa baanyɛ ajie gbɔmɔtso lɛ shigbeemɔi aloo sui fɔji komɛi akpo tamɔ henɔwomɔ, tsuishitoo ni bɛ kɛ anihaofeemɔ nɛkɛ. Shi yɛ Nyɔŋmɔ mumɔ lɛ yelikɛbuamɔ naa lɛ, wɔbaanyɛ wɔtsu nii wɔkɛye nakai sui fɔji lɛ anɔ beni ‘wɔwoɔ gbɔmɔtso hee’ lɛ.​—Kolosebii 3:​9-14.

Lalatsɛ lɛ ma sane oti nɛɛ nɔ mi jogbaŋŋ kɛha wɔ, beni ekɛɛ akɛ: “Ehi hami akɛ abami shi, koni makase ogbɛnaai lɛ.” (Lala 119:71) Kwɛ bɔ ni akwɛɔ nɔnaa ahaa yɛ gbɛ ni ja nɔ! Huhuuhu wiemɔ aloo ŋtsɔidɔɔmɔ ko bɛ mli. Pɛsɛmkunya susumɔ ko bɛ enɛ mli yɛ nɔ ni ekolɛ nɔnaa eha alaaje hewɔ. Shi moŋ, nilee gbɛ lɛ tsɔɔ akɛ nɔ ni Yehowa ŋmɛ gbɛ ni eba lalatsɛ lɛ nɔ lɛ ye ebua lɛ koni ele Yehowa gbɛnaai lɛ babaoo. Ani wɔŋmɛɔ gbɛ koni nɔnaa ana hewalɛ ko ni tamɔ nɛkɛ yɛ wɔnɔ?

Bɔfo lɛ ná amanehului ni ba enɔ yɛ Asia kpokpai lɛ anɔ lɛ ahe sɛɛ. Nɔ kome ji akɛ, haomɔi ni ba enɔ Iɛ ha ekɛ ehe fɔ Yehowa nɔ babaoo. Asaŋ enɛ waje bɔfo lɛ hiɛnɔkamɔ yɛ gbohiiashitee lɛ mli, ejaakɛ enyɛ emia ehiɛ kɛtsɔ haomɔi nɛɛ amli yɛ hekɛnɔfɔɔ ni yeɔ emuu ni ena yɛ “Nyɔŋmɔ ni teɔ gbohii ashi” lɛ mli lɛ hewɔ. (2 Korintobii 1:​8-10) Hɛɛ, Paulo na sɛɛnamɔi amli ŋɔɔmɔ yɛ etsuishitoo yɛ nɔnaa mli lɛ hewɔ.

Nakai nɔŋŋ eji anɔkwale yɛ Kristofoi ni yɔɔ nɔnaa he jwɛŋmɔ ni ja lɛ ahe ŋmɛnɛ hu. Yɛ Zimbabwe, maŋ ko ni tawuu te shi yɛ mli lɛ, ajie Yehowa webii asafo ko kɛtee akrowa ko ni anyɛɔ abuɔ he mli. Yɛ tawuu ni yaa nɔ lɛ hewɔ lɛ, asafo lɛ mli onukpai etɛ ni ahala amɛ lɛ ateŋ mɔ fɛɛ mɔ bi gbo. Shi, maŋ lɛŋ bii Iɛ kɛ nɔnyɛɛ babaoo ba fɔlɔi ni ji Kristofoi nɛɛ anɔ koni amɛfite amɛhemɔkɛyeli kɛtsɔ mumɔi ni akɛɛ amɛmli efu lɛ afaikpamɔ nɔ. Te onukpai nɛɛ nu enɛ he amɛha tɛŋŋ? Amɛteŋ mɔ kome wie eha amɛyi etɛ lɛ fɛɛ akɛ: “Beni jeŋmaji Iɛ wuɔ ta lɛ, wɔ hu wɔkɛ mumɔi fɔji lɛ miiwu. Wɔbaanyɛ wɔye henyɛlɔ [mumɔi fɔji asafoi] lɛ nɔ, ejaakɛ wɔyɛ hiɛnɔkamɔ, nɔ ni hiɛ ka diɛŋtsɛ. No hewɔ lɛ, kɛji akɛ wɔgboi yɛ nɔmɔ nɛɛ mli lɛ, bei abɔ ni wɔgboi yɛ anɔkwayeli mli wɔha Yehowa lɛ, abaatee wɔ shi. No mli lɛ wɔye henyɛlɔ lɛ nɔ kunim.” Yehowa hewalɛ ni kɛ kpɔmɔ baa lɛ yɛ nakai hii anɔkwafoi etɛ nɛɛ ajwɛŋmɔ mli. Yɛ be mli ni wɔyoo bɔ ni amɛdamɔ shi shiŋŋ nɛɛ lɛ, wɔ hu, esa akɛ wɔna nɔmimaa akɛ wɔbaanyɛ wɔhiɛ mli kɛyawula shi!

Beni Yiwaa Naa Ewa

Ekolɛ ooobi akɛ: ‘Shi kɛ́ yiwaa lɛ naa wa, ni aapii mɔ yɛ gbɛi sɔrɔtoi anɔ lɛ hu? Ani wɔbaanyɛ wɔhiɛ mli ni wɔŋmɛŋ wɔ hemɔkɛyeli lɛ he?’ Ojogbaŋŋ, mra be mli Kristofoi lɛ nyɛ amɛdamɔ niseniianifeemɔ ni yɔɔ musuŋshaa naa ni amɛŋmɛɛɛ amɛhemɔkɛyeli he.

Nakai nɔŋŋ, ŋmɛnɛŋmɛnɛ beaŋ Kristofoi ni yɔɔ shikpɔŋkuku ko ni yɔɔ banee nɔ yɛ Zimbabwe akrowa ko lɛ fee hemɔkɛyeli ni yeɔ emuu ni amɛyɔɔ yɛ Yehowa mli lɛ he nɔkwɛmɔ nɔ. Ekome too eyɔɔ shia be ko beni eŋa etee eyasara amɛbiyoo ni ebote gbalashihilɛ mli lɛ. Trukaa kɛkɛ ni hii komɛi ni hiɛ mɔgbee dadei batua lɛ ni amɛfɔlɔ enaa yɛ Kristofonyo shidaamɔ ni ehala lɛ hewɔ. Beni amɛyi lɛ jogbaŋŋ sɛɛ lɛ, hii nɛɛ fimɔ brikishi ni he edɔ amɛwo enaji ateŋ ni amɛha enyiɛ nɔ. Kɛkɛ ni amɛshi ekome too yɛ jɛmɛ koni egbo. Shi yɛ tsakemɔ ko ni ba trukaa yɛ jɛmɛ niiaŋ ni ehiii gbɛfaa hewɔ lɛ, nuu nɛɛ ŋa lɛ leee nɔ ni eba ewu lɛ nɔ. Amɛkɛɛ ekuŋbii lɛ akɛ kɛ́ amɛye amɛbua lɛ lɛ, abaagbe amɛ. No hewɔ lɛ, ashi ekome too yɛ nɛkɛ shihilɛ nɛɛ mli nyɔji etɛ sɔŋŋ, amɛmiikwɛ gbɛ daa gbi akɛ ebaagbo.

Kristofonyo nuu ni naa nɔ nɛɛ kɛ nu kɛ abele fioo ko ni eyɔɔ yɛ shia lɛ kwɛ ehe. Shi yɛ yii ni ayi lɛ lɛ hewɔ lɛ, enyɛɛɛ enyiɛ. No hewɔ lɛ, heni lai ni jwere emasɛi lɛ ta lɛ, ekumɔ sɛi kɛ okpɔlɔ ni eyɔɔ yɛ emasɛi lɛ ekɛshɛre la. Nu ni eyɔɔ lɛ bawo muji kɛ loloe. Efala lɛ hu miifa.

Nɛkɛ ji nyɛminuu nɛɛ shihilɛ beni eŋa banina lɛ yɛ nyɔji etɛ sɛɛ lɛ. Susumɔ bɔ ni ebaanu he eha beni ena lɛ lɛ! Amrɔ nɔŋŋ pɛ kɛkɛ ni esaa ehe koni ekɛ lɛ aya helatsamɔ he. Eyatao shwiili ni akɛgbalaa nii ni ekɛwo lɛ kɛtee bɔs shidaamɔ he, he ni ebaafɔ bɔs yɛ kɛya helatsamɔ he lɛ. Yɛ otsii etɛ sɛɛ lɛ, ajie lɛ yɛ helatsamɔ he lɛ ni etee ebiyoo lɛ masɛi he ni ena mumɔŋ yelikɛbuamɔ kɛ hewalɛwoo yɛ kɛjɛ Yehowa Odasefoi asafo lɛ mli bii ni yɔɔ jɛmɛ lɛ aŋɔɔ.

Mɛni ye bua Nyɔŋmɔ Maŋtsɛyeli lɛ sɛɛfilɔ anɔkwafo nɛɛ ni enyɛ edamɔ niseniianifeemɔ ni tamɔ nɛkɛ naa lɛ? Ekome too pɛ ehi shi nyɔji etɛ sɔŋŋ. Ele akɛ ebaagbo. Shi beni abi lɛ bɔ ni enu he eha beni eyɔɔ shihilɛ nɛɛ mli Iɛ, eha hetoo akɛ, “Minu he akɛ Yehowa kɛ mi yɛ be fɛɛ be.” Ewieee huhuuhu eshiii yiwalɔi nɛɛ aloo ni eeeye ŋkɔmɔ babaoo yɛ nɔ ni eba enɔ lɛ hewɔ​—yɛ shishinumɔ ni ena akɛ Yehowa kwaaa enɔkwa tsuji gbi ko gbi ko lɛ hewɔ.​—Lala 37:⁠28.

Hɛɛ, Kristofoi baanyɛ ato amɛtsui shi. Amɛle akɛ kɛ́ Yehowa ŋmɛ amanehulu gbɛ lɛ, eefee enɛ yɛ yiŋtoo kpakpa ko hewɔ, ni abaanyɛ atsɔ mli. Nyɔŋmɔ Wiemɔ lɛ kɛ mɛi krokomɛi aniiashikpamɔ maa anɔkwale nɛɛ nɔ mi kɛhaa wɔ.​—Mateo 24:​13.