Mɛni Kwraa Eba ‘Okɛ Woo Áha Ofɔlɔi’ lɛ Nɔ?
TSƐ ko wie ebihii enyɔ lɛ ahe akɛ: “Be fɛɛ be ni matsɔɔ mijwɛŋmɔ lɛ, amɛfeɔ amɛnii tamɔ nɔ ni amɛbɛ tsui tsɔ kɛha mi. Mɛni kwraa eba ‘Okɛ Woo aha Ofɔlɔi’ lɛ nɔ?” Nakai nɔŋŋ hu onukpa ko ni kwɛɔ weku shihilɛ nɔ kɛɛ akɛ: “Yɛ nɛkɛ gbii nɛɛ amli lɛ, jeee akɛ gbekɛbii jieɔ saji ni amɛfɔlɔi kɛ amɛ wieɔ he lɛ anaa kɛkɛ, shi moŋ amɛteɔ shi amɛwoɔ hegbɛ ni amɛyɔɔ lɛ yɛ be fɛɛ mli.”
Kɛji akɛ oji gbekɛ aloo onukpa lɛ, ekolɛ oyoo akɛ gbekɛbii pii yɛ ni ŋmɛnɛ amɛbuuu amɛfɔlɔi ni amɛkɛ woo haaa amɛ. Enɛ ji sane ko ‘ni esa akɛ akɔ ohe, kɛji akɛ oji gbekɛ aloo fɔlɔ. Mɛni hewɔ?
Ejaakɛ fɔlɔ kɛ ebi teŋ bei ni onaa lɛ ji nɔkwɛmɔ nii, nibii ni baa lɛ ahe mfonirii ni atsara, ni kadiɔ nɛkɛ bei nɛɛ akɛ naagbee gbii. Taakɛ Biblia lɛ tsɔɔ lɛ, be ni atsɛɔ lɛ “naagbee gbii” lɛ baa dani jeŋ fɛɛ nibii agbɛjianɔtoo lɛ naagbee hiɛkpatamɔ lɛ baa. (2 Timoteo 3:1) Shi kɛlɛ, mɛi komɛi baaje mli ni amɛbaaná shihilɛ mli ŋɔɔmɔ yɛ ŋwɛi nɔyeli diɛŋtsɛ shishi—Daniel 2:44; Kpojiemɔ 21:1-4.
Shi nɛgbɛ ji he ni fɔlɔi anɔ toigbele lɛ baa nɔ ni Biblia lɛ kɛɔ yɛ ŋmɛnɛŋmɛnɛ kɛ wɔsɛɛ be he lɛ mli yɛ? Wɔtsɔ hiɛ wɔsusu Yesu Kristo gbalɛ ni yɔɔ Mateo 24, Luka 21 kɛ Marko 13 lɛ he yɛ Buu-Mɔɔ ni tsɔ hiɛ lɛ amli. Yesu gbala jwɛŋmɔ kɛtee jeŋ saji ni baakadi “nibii agbɛjianɔtoo lɛ naagbee” lɛ nɔ: kɛ wɔɔtsi fioo ko ta lɛ, tai, shikpɔŋhosomɔi kɛ mlakwamɔ. Shi amrɔ nɛɛ lɛ wɔmiigbala jwɛŋmɔ kɛmiiba gbalɛ ko ni atsɔɔ mli ni kɔɔ be nɛɛ he, ni anaa yɛ 2 Timoteo 3:1-5 lɛ nɔ. Ní eeewie hewalɛi ni jɛɔ sɛɛgbɛ ni naa adesai anɔ hewalɛ lɛ pɛ he lɛ, Biblia lɛ maa subaŋ ni gbɔmɛi ni nibii nɛɛ baa amɛnɔ lɛ jieɔ lɛ kpo lɛ nɔ mi. Ekɛɔ akɛ:
“Shi na enɛ ole akɛ naagbee gbii lɛ anɔ lɛ Jaramɔ bei baaba. Ejaakɛ gbɔmɛi aaatsɔmɔ hesuɔlɔi, shikasuɔlɔi, shwalɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, . . . tsi ohe kɛjɛ nɛkɛ gbɔmɛi ahe.”
Kadimɔ akɛ nɛkɛ bɔfo Paulo wiemɔi nɛɛ miitsɔɔ bɔ ni naagbee gbii lɛ baasa gbɔmɛi ahe aha lɛ mli. Kadimɔ hu akɛ, ‘fɔlɔi anɔ toigbele’ baafee nɔ ni baaje kpo waa yɛ jaramɔ be ni atsɛɔ lɛ naagbee gbii lɛ amli.
EBA MLI YƐ WƆGBII NƐƐ AMLI
Mɛi komɛi baabi akɛ, ‘Te wɔfeɔ tɛŋŋ wɔleɔ akɛ jeee shihilɛ ni yɔɔ egbii amli lɛ pɛ he Paulo wieɔ lɛ?’ Akɛni bɔfo Paulo kɛ ŋaawoo ni ekɛha Kristofonyo ko ni atsɛɔ lɛ Timoteo lɛ nyiɛ egbalɛ nɛɛ sɛɛ hewɔ lɛ, mɛi komɛi susuɔ kɛji akɛ Paulo ŋma diɛŋtsɛ kɛha wɔgbii nɛɛ. (2 Timoteo 3:5, 14, 15) Shi, kadimɔ akɛ, Paulo kɛɔ akɛ “naagbee gbii lɛ anɔ lɛ jaramɔ bei baaba.” Ekolɛ eewie nibii ni baaba wɔsɛɛ be he. Akɛɛ Timoteo ni ‘etsi ehe’ kɛjɛ gbɔmɛi ni jieɔ sui ni esaaa kpo lɛ ahe, akɛni mɛi komɛi yɛ asafo lɛ mli ni amɛfee nakai momo. Shi Paulo wiemɔi lɛ miitsɔɔ akɛ yɛ wɔsɛɛ be ni ji naagbee gbii lɛ amli lɛ shihilɛ lɛ baafee nɔ ni mli baawa aloo jaramɔ bei.—Okɛto 2 Tesalonikabii 2:6-12; 3:6-14 he.
Shi ekolɛ, onu ni mɛi komɛi ni pɛiɔ nibii amli lɛ miikɛɛ akɛ obalaŋtai pii yɛ ni ŋmɛnɛ amɛkɛ amɛfɔlɔi miihi shi fɛfɛo bɔ ni sa. Yɛ nɔ ni 2 Timoteo 3:1-5 kɛɔ lɛ hewɔ lɛ, mɛni ji nɔ ni osusuɔ yɛ nɛkɛ saji ni awieɔ nɛɛ ahe? Dani wɔɔmu sane naa lɛ, nyɛhaa wɔkɛ Paulo gbalɛ lɛ atoa Biblia mli yinɔsane he wɔkwɛ.
“WO OTSƐ KƐ ONYƐ”
Nakai ji bɔ ni Kitai Nyɔŋma lɛ amli nɔ ni ji enumɔ lɛ kɛɛ. (2 Mose 20:12) Aha nɛkɛ wiemɔi nɛɛ ka Yudafoi abii ajwɛŋmɔi amli. (5 Mose 5:16; 6:6, 7) Anyɛŋ asusu mɔ ko ni baagbo efɔlɔi anɔ toi lɛ he—ekomɛi yɛ ni agbeɔ mɔ atoɔ najiaŋ. (5 Mose 21:18-21) Blema shihilɛ gbɛ lɛ ye bua fɔlɔi ni amɛnyɛ amɛmɔ gbɛ ni suɔmɔ yɔɔ mli shi kɛlɛ eyɔɔ shiŋŋ nɛɛ mli. Atuu weku lɛ awo tsɛmɛi akudɔmɔ kɛ gbɛtsɔɔmɔ shishi. Atsɔɔ nɔ ni esa akɛ fɔlɔi atsu lɛ mli faŋŋ. Abuɔ gbekɛbii akɛ sɛɛnamɔ, jɔɔmɔ, ni okwaayeli nitsumɔi ni yaa nɔ yɛ amɛteŋ lɛ ha amɛna nii babaoo amɛtsu.—Okɛto Lala 127:3 he.
Shi, beni maŋ lɛ tsi ehe kɛjɛ Yehowa gbɛ̀i ahe lɛ, weku shihilɛ fite. Beni akɛ Kitai Nyɔŋma lɛ eha lɛ sɛɛ aaafee afii 800 lɛ, gbalɔ Mika kɛɛ akɛ: “Binuu ebuuu etsɛ, biyoo hu teɔ shi woɔ enyɛ ni mɔ diɛŋtsɛ shia teŋ bii ji ehenyɛlɔi!” (Mika 7:6) Nakai nɔŋŋ hu Ezekiel wie yɛ Yerusalem maŋtiase lɛ he akɛ: “Abuuu tsɛ kɛ nyɛ yɛ omli.” (Ezekiel 22:7) Nɛkɛ bulɛ ni abɛ kɛha fɔlɔi nɛɛ ji jeŋba ni efite yɛ he fɛɛ he lɛ he okadi. No hewɔ lɛ, Nyɔŋmɔ gbala maŋ muu lɛ fɛɛ toi waa.—Yeremia 1:15, 16.
Kɛ́ odamɔ enɛ nɔ osusu he lɛ, eka shi faŋŋ akɛ ebaakpɛlɛ nɔ akɛ jeŋba ni obalaŋtai ni yɔɔ afii ohai 20 nɛɛ mli lɛ jieɔ lɛ kpo lɛ baaha Paulo he ajɔ̃ lɛ yɛ klɛŋklɛŋ afii oha lɛ mli. Gbɛ ‘ni aŋmɛ ni, afɔɔ bii kɛkɛ he jwɛŋmɔ ni ahiɛ nɛɛ ji nɔ ko ni aleee. No hewɔ lɛ, ehe miihia ni wɔha ahi jwɛŋmɔ mli akɛ nibii ni akaseɔ ni haa afeɔ ŋmɛnɛŋmɛnɛ beaŋ weku lɛ he mfoniri akɛ eyɛ fɛo lɛ kuɔ ehiɛ eshwieɔ Nyɔŋmɔ mla kɛha gbekɛbii lɛ anɔ. (Efesobii 6:1-3) Kɛ́ akɛ ŋmɛnɛŋmɛnɛ beaŋ obalaŋtai asubaŋ kɛ jeŋba to Nyɔŋmɔ taomɔ nii ahe lɛ, ebaaha wɔnu nɔ hewɔ ni Biblia lɛ tsɛɔ ŋmɛnɛŋmɛnɛ yinɔ nɛɛ akɛ “toigbolɔi” lɛ shishi. Jeee akɛ bii fɛɛ ji atuatselɔi. Shi toigbele egbɛ eshwa ni emli wa—ayooɔ yɛ he fɛɛ he.
Ani ‘fɔlɔi anɔ toigbele’ egbɛ eshwa jeŋ fɛɛ nakai? Ani odaseyeli ni fa yɛ ni baatsɔɔ akɛ fɔlɔ kɛ ebi teŋ bei tsɔɔ akɛ “naagbee gbii” lɛ amli wɔyɔɔ lɛ?—2 Timoteo 3:1, 2.
[Wiemɔ ni akɔ ni akɛmiitsu nii ni yɔɔ baafa 4]
‘Jeee gbekɛbii fɛɛ ji atuatselɔi. Shi toigbele egbɛ eshwa ni emli wa’