Wɔ-Maŋtsɛyeli Asai Lɛ Akuramɔ

Nyɛmi yoo ko ni atsɛɔ lɛ Nicole ni eye afii 17 ni ejɛ Colombia lɛ wie akɛ, “Misumɔɔ wɔ-Maŋtsɛyeli Asa lɛ!” “Eji he ko ni mikɛ minyɛmimɛi hii kɛ yei lɛ baanyɛ abɔ yɛ.” Ani bo hu onuɔ he nakai nɔŋŋ?

Yehowa Odasefoi kpeɔ yɛ Maŋtsɛyeli Asai aaafee 63,000 amli yɛ je lɛŋ fɛɛ. Kɛ́ wɔmiijá Nyɔŋmɔ yɛ tsũi nɛɛ amli lɛ, wɔhe jɔɔ wɔ. Shi sɛɛnamɔi krokomɛi hu yɛ Maŋtsɛyeli Asai lɛ ahe. David ni eji daa gbɛgbalɔ yɛ Colombia lɛ wie akɛ: “Wɔ-Maŋtsɛyeli Asa lɛ hãa mɛi nyaa sane ni wɔshiɛɔ lɛ he. Gbɔi ni baa wɔ-Maŋtsɛyeli Asa lɛ nɔ lɛ ateŋ mɛi babaoo anaa kpɛɔ amɛhe kɛ́ amɛna bɔ ni wɔkuraa tsũ lɛ jogbaŋŋ lɛ.” Enɛ baaa kɛkɛ. Wɔtsuɔ nii waa kɛsaa wɔ-Maŋtsɛyeli Asai lɛ anɔ, ni wɔkuraa amɛ hu. Mɛni yeɔ ebuaa wɔ ni wɔnyɛɔ wɔtsuɔ enɛ?

Mɛɛ Gbɛjianɔ Ato Kɛhã Maŋtsɛyeli Asai Lɛ Akuramɔ?

Eji asafoi ni kpeɔ yɛ Maŋtsɛyeli Asa ko nɔ lɛ asɔ̃ akɛ amɛkura asa lɛ. Enɛ hewɔ lɛ, nyɛmimɛi lɛ saa amɛ-Maŋtsɛyeli Asa lɛ nɔ daa. Agbɛnɛ hu lɛ, yɛ be kɛ beiaŋ lɛ amɛkwɛɔ akɛ nibii ni yɔɔ asa lɛ nɔ miitsu nii jogbaŋŋ lo, ni amɛsaa nibii bibii ni efite lɛ.

Bɔ ni afee ni asafoi lɛ anyɛ akura amɛ-Maŋtsɛyeli Asai lɛ jogbaŋŋ lɛ, Local Design/Construction Department (LDC) lɛ, ehala nyɛmimɛi hii komɛi ni amɛtsɔse asafoŋbii lɛ yɛ enɛ gbɛfaŋ, atsɛɔ nyɛmimɛi hii nɛɛ akɛ maintenance trainers. Mɛi nɛɛ ateŋ mɔ fɛɛ mɔ kwɛɔ Maŋtsɛyeli Asai ekpaa kɛmiimɔ nyɔŋma anɔ. Eyaa Maŋtsɛyeli Asai nɛɛ anɔ ni etsɔseɔ nyɛmimɛi lɛ koni amɛnyɛ amɛkura amɛ-Asa lɛ. Daa afii etɛ lɛ, eyakwɛɔ asa lɛ diɛŋtsɛ kɛ ehewɔ nibii lɛ fɛɛ, ni ekadiɔ nibii ni miifite loo nibii ni baanyɛ amɛkɛ oshãra aba lɛ.

Wɔnyɛmimɛi lɛ ahiɛ sɔɔ tsɔsemɔ ni maintenance trainers lɛ kɛhãa amɛ lɛ waa. Nyɛmi yoo ko ni yɔɔ India ni atsɛɔ lɛ Indhumathi lɛ wie akɛ: “Tsɔsemɔ lɛ nɔ bɛ kwraa. Eŋɔɔ wɔnaa waa akɛ wɔkase bɔ ni wɔbaafee wɔkura wɔ-Asa lɛ jogbaŋŋ.” Nyɛmi nuu ko ni jɛ Kenya ni atsɛɔ lɛ Evans lɛ hu wie akɛ: “Wɔbana akɛ, bɔ ni afee ni wɔkafite shika pii kɛsaa nibii ni fiteɔ yɛ asa lɛ nɔ lɛ, esa akɛ wɔtsu naagbai bibii ahe nii oya, koni nibii akafite kwraa.”

Bɔ Ni Feɔ Ni Awoɔ Nyɔji lɛ

Daa afi lɛ, akɛ shika aaafee dɔlai ohai kɛmiimɔ dɔlai akpei komɛi tsuɔ Maŋtsɛyeli Asa fɛɛ asa he nii, ni akɛwoɔ nibii ni akɛtsuɔ nii yɛ asa lɛ nɔ lɛ ahe nyɔmɔ hu. He ni asa lɛ yɔɔ, afii abɔ ni eye, kɛ asafoi abɔ ni kpeɔ yɛ asa lɛ nɔ lɛ, ji nɔ ni tsɔɔ shika abɔ ni akɛtsuɔ he nii daa afi. Te wɔfeɔ tɛŋŋ wɔwoɔ nyɔji nɛɛ?

Ajɛɔ oniai ni atsuɔ lɛ mli akuraa Maŋtsɛyeli Asai lɛ. Nyɛmi nuu ko ni jɛ Kazakhstan, ni atsɛɔ lɛ Alexander lɛ tsɔɔ mli akɛ: “Akɛ oniai lɛ eko woɔ Intanɛt, kɛ nibii komɛi tamɔ, nu kɛ kane ahe nyɔmɔ. Agbɛnɛ hu, akɛ oniai lɛ eko heɔ nibii krokomɛi ni he hiaa tamɔ, paper towels (wolo ni akɛtsumɔɔ dɛŋ), gloves, nibii ni akɛsaa asa lɛ nɔ, kɛ pɛnte.” Akɛ oniai ni shwɛɔ lɛ yafĩɔ jeŋ muu fɛɛ nitsumɔ lɛ sɛɛ, koni akɛtsu tsũi akuramɔ nitsumɔi wuji ni yaa nɔ yɛ jeŋ fɛɛ, ni ebiɔ ni akɛ shika babaoo atsu he nii lɛ ahe nii.

Tsũi Akuramɔ Nitsumɔi Wuji

Kɛ́ abaakura Maŋtsɛyeli Asa ko, ni shika ni ehe baahia ni akɛtsu he nii lɛ fa fe shika falɛ ni akɛtsuɔ Maŋtsɛyeli Asa lɛ he nii yɛ nyɔji enyɔ loo etɛ mli lɛ, esa akɛ asafoŋ onukpai lɛ abi gbɛ kɛjɛ LDC maintenance trainer lɛ dɛŋ. Kɛ́ LDC lɛ kpɛ̃lɛ nɔ akɛ atsu nakai nitsumɔ lɛ, bei pii lɛ ajɛɔ oniai ni atsuɔ kɛfĩɔ jeŋ muu fɛɛ nitsumɔ lɛ sɛɛ lɛ mli awoɔ he nyɔmɔ. Yɛ 2023 sɔɔmɔ afi lɛ mli lɛ, akɛ dɔlai miliɔn 76.6 tsu nitsumɔi nɛɛ 8,793 ahe nii. Naa nitsumɔi nɛɛ ateŋ enyɔ komɛi.

Yɛ Angola lɛ, kulɛ naagbai pii yɛ Maŋtsɛyeli Asa ko ni eye afii 15 lɛ he. Ehe bahia ni atsake kanei kɛ amɛhe kpãi lɛ fɛɛ, gbogboi lɛ egbalagbalai, ni akutsoŋbii lɛ kɛɛ nu ko hoɔ kɛjɛɔ Maŋtsɛyeli Asa lɛ nɔ kɛboteɔ amɛshĩai lɛ amli. LDC lɛ to gbɛjianɔ koni atsu naagbai nɛɛ ahe nii. Akɛ dɔlai 9,285 tsu nitsumɔ nɛɛ. Akutsoŋbii lɛ ahiɛ sɔ bɔ ni atsu nitsumɔ nɛɛ ahã lɛ, ni amɛda nyɛmimɛi ashi.

Yɛ Poland lɛ, kulɛ Maŋtsɛyeli Asa ko yiteŋ duɔ, ni emli kapɛt lɛ fɛɛ efite kwraa. LDC lɛ kpɛ̃lɛ ni akɛ nibii ni hãaa tsu lɛ yiteŋ adu dɔŋŋ lɛ asaa tsũ lɛ, ni atsake kapɛt lɛ. Akɛ dɔlai 9,757 tsu nitsumɔ nɛɛ. No hewɔ lɛ, ebaahe afii saŋŋ dani ehe baahia ni atsu nitsumɔ wulu ko kɛsaa Maŋtsɛyeli Asa nɛɛ.

Wɔkuraa Maŋtsɛyeli Asai Kɛwoɔ Yehowa Hiɛ Nyam

Kɛ́ akura Maŋtsɛyeli Asa lɛ, ehãa abaa oniai ni atsuɔ lɛ ayi, shi jeee no pɛ, ehãa ajieɔ Yehowa yi hu. Nyɛmi nuu ko ni yɔɔ Tonga ni atsɛɔ lɛ Shaun lɛ wie akɛ: “Akɛni wɔkuraa wɔ-Maŋtsɛyeli Asa lɛ hewɔ lɛ, wɔnyɛɔ wɔjáa Yehowa yɛ asa ni nɔ tse, ni ato he gbɛjianɔ ni etsuɔ nii jogbaŋŋ lɛ nɔ, ni enɛ hãa mɛi ni yɔɔ akutso lɛ mli lɛ wieɔ Yehowa gbɛ́i lɛ he ekpakpa. Kɛ́ wɔmiifɔ̃ mɛi nine kɛmiiba wɔ-Maŋtsɛyeli Asa lɛ nɔ lɛ, wɔhiɛ gbooo.”

Mɛni Obaanyɛ Ofee Kɛye Obua?

Wɔ fɛɛ wɔbaanyɛ wɔye wɔbua kɛsaa wɔjamɔhe lɛ, ni wɔkura lɛ. Maintenance trainer ko ni atsɛɔ lɛ Marino, ni eyɔɔ Australia lɛ wie akɛ: “Wɔ fɛɛ wɔbaanyɛ wɔfata he kɛkura wɔ-Maŋtsɛyeli Asa lɛ, ni enɛ ji hegbɛ ni nɔ bɛ ni wɔná. Kɛ́ wɔfee nakai lɛ, wɔmiiye wɔmiibua kɛbaa oniai ni atsuɔ lɛ ayi, koni anyɛ akɛtsu nii yɛ hei ni hiamɔ yɔɔ diɛŋtsɛ lɛ.”

Nyɛmi nuu ko ni yɔɔ India ni atsɛɔ lɛ Joel lɛ nyaa he waa akɛ ebaafata he kɛkura amɛ-Maŋtsɛyeli Asa lɛ. Ewie akɛ: “Kɛ́ mikɛ minyɛmimɛi lɛ miitsu nii lɛ, ehãa mifeɔ bɔ ni jeŋ hee lɛ mli shihilɛ baafee lɛ he mfoniri.” Nicole, ni wɔwie ehe kɛtsɔ hiɛ lɛ wie akɛ: “Nyɛsɛɛ nɛɛ, be ni nyɛmimɛi lɛ miisaa paipi ko ni miidu yɛ niiasɛɛyaahe lɛ, mihu miiye miibua kɛmiitsumɔ shikpɔŋ lɛ. Eyɛ mli akɛ jeee mi misaa paipi ni efite lɛ moŋ, shi miye mibua koni mɔ ko akapila.”

Kɛ́ obaasumɔ ni okɛ ohe ahã kɛwa ni akura nyɛ-Maŋtsɛyeli Asa lɛ, kɛɛmɔ osafoŋ onukpai lɛ. Kɛfata he lɛ, oniai ni otsuɔ lɛ yeɔ ebuaa ni akuraa nyɛ-Maŋtsɛyeli Asa lɛ, kɛ Maŋtsɛyeli Asai krokomɛi ni yɔɔ jeŋ fɛɛ lɛ. Obaanyɛ otsu onia owo onia adekai ni yɔɔ nyɛ-Maŋtsɛyeli Asa lɛ nɔ lɛ mli, loo otsu yɛ donate.jw.org lɛ nɔ. Wɔhiɛ sɔɔ ejurɔ ni ofeɔ nɛɛ waa.