Aye Abua Mɛi Ni Osharai Enina Amɛ Yɛ Afi 2022 Mli—Ajie Nyɛmimɛi Asuɔmɔ Kpo

Biblia lɛ gba efɔ̃ shi akɛ tai, shikpɔŋhosomɔi, tsɛŋemɔ helai kɛ “gbeyei nibii” baaba yɛ wɔgbii nɛɛ amli. (Luka 21:10, 11) Gbalɛi nɛɛ kã he eeba mli lolo, ni wɔna emlibaa lɛ eko yɛ afi 2022 sɔɔmɔ afi lɛ mli.a Akɛ nɔkwɛmɔnɔ lɛ, ta ni yaa nɔ yɛ Ukraine lɛ sɛɛ efooo, egba mɛi akpekpei abɔ anaa waa. No mli lɛ kpaako maji babaoo jeɔ naagbai ni tsɛŋemɔ hela ni ji COVID-19 lɛ kɛba lɛ mli. Kɛfata he lɛ, mɛi babaoo kɛ naagbai ni mɛi tsɛɔ lɛ adebɔɔ naa oshãrai kpe, ekomɛi ji shikpɔŋhosomɔi ni ba yɛ Haiti lɛ, kɛ nugbɔnɛmɔ kɛ ahum ni naa wala ni fite nii waa yɛ Central America, Philippines, kɛ Afrika wuoyi-bokagbɛ lɛ. Mɛni Yehowa Odasefoi fee kɛye amɛbua mɛi ni oshãrai nɛɛ ba amɛnɔ lɛ?

Yɛ afi 2022 sɔɔmɔ afi lɛ mli lɛ, Yehowa Odasefoi asafo lɛ ye ebua mɛi yɛ oshãrai srɔtoi aaafee 200 mli! Fɛɛ mli lɛ, wɔfite shika aaafee Amerika dɔlai miliɔn 12 yɛ yelikɛbuamɔ ni wɔkɛhã mɛi lɛ mli.b Naa bɔ ni wɔkɛ oniai ni atsu lɛ eko ye ebua mɛi yɛ osharai enyɔ komɛi ni ba lɛ amli.

Shikpɔŋhosomɔi Ni Ba Haiti

Yɛ August 14, 2021 lɛ, shikpɔŋhosomɔ ko ni naa shɛɔ nɔ ni Blɔfo tsɛɔ lɛ magnitude 7.2 ba yɛ Haiti wuoyigbɛ. Dɔlɛ sane ji akɛ, wɔnyɛmimɛi etɛ gboi​—yei enyɔ kɛ nuu kome. Mɛi ni je mli lɛ ekomɛi pila waa, ni amɛmiipiŋ yɛ awui ni shikpɔŋhosomɔ lɛ ye lɛ hewɔ. Nyɛmi nuu ko ni atsɛɔ lɛ Stephane lɛ wie akɛ: “Mɛi gboi yɛ maŋ lɛ mli aahu akɛ, daa otsi lɛ afeɔ yara babaoo, ni enɛ tee nɔ nyɔji enyɔ kɛ sɛɛ.” Nyɛminuu ko hu ni atsɛɔ lɛ, Éliézer lɛ wie akɛ: “Odasefoi pii ashiãi fite, amɛtadei, tokotai, kɛ amɛnibii krokomɛi ŋmɛɛ amɛ. Gbi ni shikpɔŋ lɛ hoso lɛ sɛɛ lɛ, fioo kɛkɛ lɛ ehoso ekoŋŋ, ni nakai sɔŋŋ efee nyɔji abɔ.”

Yehowa asafo lɛ he fee oya kɛye ebua. Haiti nitsumɔhe nine lɛ kɛ niyenii ni naa shɛɔ tɔn 53, tɛnt, tapoliŋ, matrɛs, kɛ sola tsaja ni akɛtsajiɔ mobail foŋ hã mɛi ni oshãrai nɛɛ nina amɛ lɛ. Kɛfata he lɛ, shĩai hee ni amamɔ kɛ ekrokomɛi ni asaa yɛ afi 2022 sɔɔmɔ afi lɛ mli lɛ fa fe oha. Afite shika Amerika dɔlai akpekpe kome kɛ sɛɛ kɛye abua yɛ shihilɛ nɛɛ mli.

Wɔnyɛmimɛi lɛ ahiɛ sɔ yelikɛbuamɔ ni akɛhã amɛ lɛ waa. Lorette wie akɛ: “Shikpɔŋhosomɔ lɛ fite wɔshĩa lɛ kwraa ni efite wɔnitsumɔ lɛ hu. Wɔnáaa niyenii wɔye. Shi Yehowa asafo lɛ baye ebua wɔ, ahã wɔ nɔ fɛɛ nɔ ni he hia wɔ.” Micheline wie akɛ: “Shikpɔŋhosomɔ lɛ fite shĩa ni mikɛ mibihii enyɔ lɛ yɔɔ lɛ. No mli lɛ mileee nɔ ni mafee, nɔ pɛ ni mifee ji, misɔle mibi Yehowa koni eye ebua mi, ni Yehowa tsɔ esafo lɛ nɔ etsu minibimɔ lɛ he nii. Amrɔ nɛɛ ama shĩa kpakpa ko ahã wɔ, ni no mli wɔyɔɔ. Mikpɛ miyiŋ akɛ, mafee nɔ fɛɛ nɔ ni manyɛ kɛtsɔɔ Yehowa akɛ mihiɛ sɔɔ nɔ ni efee ehã mi lɛ.”

Amraloi lɛ yɔse nitsumɔi ni wɔtsu kɛye wɔbua wɔnyɛmimɛi lɛ. Maŋtiase kpeehe ko ni yɔɔ L’Asile lɛ nɔkwɛlɔ lɛ kɛɛ akɛ: “Nyɛbɔ mɔdɛŋ waa yɛ bɔ ni nyɛhe fee oya kɛbaye nyɛbua lɛ. Miijie nyɛyi ejaakɛ nyɛbuɔ amraloi lɛ waa. Mina akɛ jeee shika nyɛtao hewɔ nyɛtsuɔ nii lɛ, ni enɛ ŋɔɔ minaa waa. Moŋ lɛ nyɛsumɔɔ ni nyɛye nyɛbua mɛi. Suɔmɔ mli nyɛjɛɔ nyɛfeɔ nibii ni nyɛfeɔ lɛ.”

Ahum Kɛ Nugbɔnɛmɔ Ko Ni Atsɛ Lɛ Ana Lɛ Fite Nii Waa Yɛ Malawi Kɛ Mozambique

Yɛ January 24, 2022 lɛ, ahum kɛ nugbɔnɛmɔ wulu ko ni atsɛ lɛ Ana lɛ, fite nii waa yɛ Mozambique kɛkɛ ni ewo ehiɛ nɔ ewo Malawi anaigbɛ hu ni eyafite nii waa yɛ jɛmɛ. Nugbɔ nɛ gbeyeigbeyei ni ahum lɛ naa wa waa diɛŋtsɛ (100 kilometers per hour). Efite ilɛktrisiti kpãi babaoo kɛ brijii, ni ehã nu afua ba jɛmɛ niiaŋ fɛɛ.

Ahum kɛ nugbɔ ni nɛ gbeyeigbeyei nɛɛ sa Odasefoi 30,000 kɛ sɛɛ ahe yɛ Malawi kɛ Mozambique. Nyɛmi nuu ko ni atsɛɔ lɛ Charles, ni efata mɛi ni tsu nii kɛye ebua nyɛmimɛi lɛ ahe lɛ kɛɛ akɛ: “Be ni mina bɔ ni nyɛmimɛi miina nɔ, kɛ amɛnibii abɔ ni eŋmɛɛ amɛ lɛ, miwerɛ ho mihe aahu akɛ minaaa nɔ ni mafee.” Nɔ ni wo amɛshihilɛ lɛ mli wu waa ji akɛ nugbɔ loo amɛniyenii fioo ni amɛyɔɔ lɛ kɛ niyenii ni amɛdu lɛ fɛɛ kɛtee. Mɛi pii ashĩai ŋmɛɛ amɛ. Dɔlɛ sane ji akɛ nyɛmi nuu ko ŋa kɛ ebiyei bibii enyɔ gboi be ni lɛlɛ ni akɛyahole amɛ lɛ butu lɛ.

Ahum ni tswa kɛ nugbɔ ni nɛ lɛ yɛ gbeyei waa diɛŋtsɛ. Maŋkɛ be ni atswa ŋmɛlɛ 1 yɛ Nchalo yɛ Malawi lɛ, Sengeredo weku lɛ nu nɔ ko tamɔ faa loo nu babaoo ko ni miiho waa gbɛɛmɔ, ni eyɛ gbeyei naakpa. Asomoaŋ faa enyɔ komɛi ejwa, ni amɛmiiho! Nyɛminuu Sengeredo kpɛ eyiŋ akɛ ekɛ eweku lɛ baashi shĩa lɛ. Yiŋ ni ekpɛ lɛ hi waa, ejaakɛ be ni amɛshi shĩa lɛ, etsɛɛɛ nɔŋŋ ni nu ni hoɔ kumɔ shĩa lɛ. Amɛnibii lɛ ekomɛi fite, ni ekomɛi hu lɛ, nu lɛ wó kɛtee. Amɛtee Maŋtsɛyeli Asa ni bɛŋkɛ amɛ lɛ nɔ; kulɛ bei pii lɛ, kɛ́ amɛnyiɛ lɛ eheɔ amɛ minitii 30. Shi nakai gbi lɛ ehé amɛ ŋmɛlɛtswai enyɔ dani amɛshɛ jɛmɛ. Be ni amɛshɛ jɛmɛ lɛ, amɛfɔ tsɔɔ, ni etɔ amɛ bliboo, shi amɛyɛ shweshweeshwe.

Oya nɔŋŋ ni Malawi kɛ Mozambique nitsumɔhe niji lɛ to gbɛjianɔ koni aye abua nyɛmimɛi ni oshãrai eba amɛnɔ lɛ. Akɛɛ kpokpaa nɔkwɛlɔi kɛ asafoŋ onukpai ni amɛyakwɛ nibii ni he baahia nyɛmimɛi ni oshãrai lɛ eba amɛnɔ lɛ, ni agbɛnɛ hu amɛjɛ ŋmalɛi amli amɛwo nyɛmimɛi lɛ hewalɛ, ni amɛshɛje amɛmii. Ato yelikɛbuamɔ ajinafoi akui pii koni amɛkwɛ ni akɛ yelikɛbuamɔ ni sa ahã nyɛmimɛi lɛ. Amrɔ nɔŋŋ lɛ, kui nɛɛ je amɛnitsumɔ lɛ shishi, amɛkwɛ ni akɛ niyenii kɛ hiamɔ nii krokomɛi hã nyɛmimɛi lɛ. Afite Amerika dɔlai 33,000 kɛ sɛɛ kɛye abua nyɛmimɛi lɛ yɛ niyenii kɛ nibii krokomɛi agbɛfaŋ, ni afite Amerika dɔlai 300,000 hu kɛsaa tsũi ni fite lɛ ekomɛi, ni amamɔ ehei hu.

Yelikɛbuamɔ Ajinafoi Akui lɛ kɛ shikai lɛ tsu nii lɛ yɛ hiɛshikamɔ mli, nakai beiaŋ hu lɛ nibii ajara ewa diɛŋtsɛ. Akɛ nɔkwɛmɔnɔ lɛ, be ni ayeɔ abua nyɛmimɛi lɛ klɛŋklɛŋ nyɔji kpawo lɛ mli lɛ, abele mamu, ni eji niyenii titri ni Malawibii sumɔɔ waa lɛ ateŋ ekome lɛ, jara tee ŋwɛi waa aaafee oha mlijaa 70 sɔŋŋ. Petro kɛ ehenɔi hu ajara tee ŋwɛi waa. Bɔ ni afee ni abaa shika yi lɛ, nyɛmimɛi lɛ hé niyenii kɛ tsũmaa nibii lɛ yɛ maŋ lɛ mli nɔŋŋ, ni amɛhéɔ lɛ babaoo yɛ be kome too mli. Enɛ hã atse nibii anɔ ahã amɛ ni amɛbɔɔɔ nyɔmɔ tsɔ yɛ tsɔnefoo he.

Bɔ ni aye abua nyɛmimɛi lɛ ta Yehowa webii lɛ atsuiŋ waa. Nyɛminuu ko ni yɔɔ Mozambique ni atsɛɔ lɛ Felisberto lɛ, wie akɛ: “Minako kuu ko ni ehã mɛi nii babaoo nɛkɛ pɛŋ: tsũmaa nibii, lɔlei ni akɛmiihole nibii, tsũmaa nitsulɔi, niyenii, kɛ gbɛtsɔɔmɔi ni ajɛɔ suɔmɔ mli akɛhãa. Yelikɛbuamɔ ni akɛhã nɛɛ ji nyɛmimɛi asuɔmɔ ni Yesu wie he yɛ Yohane 13:34, 35 lɛ he nɔkwɛmɔnɔ ni sa jogbaŋŋ.” Nyɛmi yoo okulafo ko ni yɔɔ Malawi ni atsɛɔ lɛ Ester, ni eshĩa kumɔ lɛ wie akɛ: “Mihiɛnɔkamɔ fɛɛ tã ejaakɛ mibɛ shika ni manyɛ mikɛma tsũ kroko. No hewɔ lɛ be ni nyɛmimɛi lɛ ba ni amɛbama tsũ lɛ eko amɛhã mi lɛ, minu akɛ miyɛ paradeiso lɛ mli momo.”

Be ni wɔbɛŋkɛɔ jeŋ hee ni awo he shi lɛ mli lɛ, wɔle akɛ oshãrai ni fe nɛkɛ po baaba. (Mateo 24:7, 8) Fɛɛ sɛɛ lɛ, oniai ni ojɛɔ osuɔmɔ mli otsuɔ lɛ hewɔ lɛ, wɔyɛ hekɛnɔfɔɔ akɛ Yehowa webii anine baashɛ yelikɛbuamɔi ni he hiaa amɛ lɛ anɔ. Atsɔɔ gbɛi anɔ ni atsɔɔ nɔ atsuɔ onia lɛ yɛ donate.jw.org. Oyiwaladɔŋŋ yɛ ejurɔ ni ofeɔ nɛɛ hewɔ.