Ani Shika Ji Nibii Fɔji Fɛɛ Ashishifã?

Hetoo ni Biblia lɛ kɛhãa

Dabi. Biblia lɛ ekɛɛɛ akɛ shika lɛ, nɔ fɔŋ ni, ni ekɛɛɛ hu akɛ shika ji nɔ ni hãa afeɔ nibii fɔji fɛɛ. Wiemɔ ni ji “shika ji nibii fɔji fɛɛ ashishifã” ni afɔɔ wiemɔ lɛ ji Biblia mli sane ko ni yeko emuu ni akɛlakaa mɛi. Nɔ ni Biblia lɛ kɛɔ diɛŋtsɛ ji “nibii fɔji fɛɛ ashishifã ji shikasuɔmɔ.”a—1 Timoteo 6:10, Ga Biblia.

Mɛni Biblia lɛ kɛɔ yɛ shika he?

Biblia lɛ tsɔɔ akɛ, kɛ́ akɛ shika tsu nii yɛ hiɛshikamɔ mli lɛ, sɛɛnamɔ jɛɔ mli kɛbaa ni ebaanyɛ ‘ebu wɔhe’ po. (Jajelɔ 7:12) Kɛfata he lɛ, Biblia lɛ wieɔ mɛi ni feɔ mɛi ejurɔ, ní mɛi ni keɔ mɛi shika fata he lɛ ahe ekpakpa.—Abɛi 11:25.

Nakai beiaŋ nɔŋŋ lɛ, Biblia lɛ bɔɔ wɔ kɔkɔ koni wɔkɛ wɔjwɛŋmɔ fɛɛ akama shika nɔ. Ekɛɔ akɛ: “Shikasuɔmɔ akaba nyɛshihilɛ mli, ni nyɛmii ashɛa nibii ni nyɛyɔɔ amrɔ nɛɛ ahe.” (Hebribii 13:5) Nikasemɔ ni yɔɔ sane nɛɛ mli ji, wɔkɛ shika atsu nii jogbaŋŋ ni wɔkatiu ninámɔ sɛɛ. No najiaŋ lɛ, esa akɛ wɔkɛfee oti ni ma wɔhiɛ akɛ, wɔhiɛ baasɔ nibii ni he hiaa wɔ diɛŋtsɛ ni ji niyenii, atade, kɛ wɔɔhe.—1 Timoteo 6:8.

**Mɛni hewɔ Biblia lɛ bɔɔ kɔkɔ yɛ shikasuɔmɔ he lɛ?**

Amimyelɔi naŋ naanɔ wala. (Efesobii 5:5) Yiŋtoo kome ji akɛ, amimyeli ji amagajamɔ, loo amalejamɔ henɔ ko. (Kolosebii 3:5) Yiŋtoo kroko hu ji akɛ, akɛni amimyelɔi tswaa amɛfai shi akɛ amɛnine baashɛ nɔ ni amɛshweɔ lɛ nɔ hewɔ lɛ, bei pii lɛ, amɛhiii shi yɛ ŋaawoi ni yɔɔ Biblia lɛ mli lɛ anaa. Abɛi 28:20 lɛ kɛɔ akɛ: “Mɔ ni yeɔ ehe oyai koni ená nii lɛ he baaba sane.” Bei komɛi po lɛ, amɛwoɔ mɛi ahe gbeyei koni amɛná nɔ ko, amɛshɔ̃ɔ mɛi anii, amɛtswaa mɛi ojo, amɛmɔmɔɔ mɛi amɛtoɔ, ni amɛgbeɔ mɛi po.

Kɛ́ shikasuɔmɔ hãaa mɔ afee nɔ ko gbonyo po lɛ, ebaanyɛ ekɛ naagbai krokomɛi aba. Biblia lɛ kɛɔ akɛ “mɛi ni etswa amɛfai shi akɛ amɛbaatsɔmɔ niiatsɛmɛi lɛ gbeɔ kaa kɛ tsɔne kɛ kwashiai akɔnɔi pii ni yeɔ awui” lɛ amli.—1 Timoteo 6:9.

Te wɔbaafee tɛŋŋ wɔná ŋaa ni Biblia lɛ woɔ yɛ shika he lɛ he sɛɛ lɛ?

Kɛ́ wɔkuuu wɔhiɛ wɔshwieee nibii ni wɔle akɛ eja kɛ nibii ni Nyɔŋmɔ sumɔɔ lɛ anɔ yɛ shika hewɔ lɛ, bulɛ baaba wɔhe ni Nyɔŋmɔ baaná wɔhe miishɛɛ ni ebaaye ebua wɔ hu. Nyɔŋmɔ ewo mɛi ni miibɔ mɔdɛŋ ni amɛfee esuɔmɔnaa nii lɛ shi akɛ: “Mishiŋ bo, ni mikwaŋ bo kɔkɔɔkɔ.” (Hebribii 13:5, 6) Emaa nɔ mi ehãa wɔ hu akɛ “nuu anɔkwafo baaná jɔɔmɔi babaoo.”—Abɛi 28:20.

Ŋmalɛi Ni Kɔɔ Shika He

Jajelɔ 7:12: “Shika buɔ mɔ he.”

Nɔ ni etsɔɔ: Kɛ́ okɛ shika tsu nii yɛ hiɛshikamɔ mli lɛ, ehe baaba sɛɛnamɔ ehã bo, ejaakɛ ebaabu ohe yɛ gbɛ ko nɔ.

Luka 12:15: “Kɛji gbɔmɔ ená nii babaoo ni eteke nɔ po lɛ, jeee nibii ni eyɔɔ lɛ hãa lɛ wala.”

Nɔ ni etsɔɔ: Shika he ehiaaa fe nɔ fɛɛ nɔ yɛ shihilɛ mli, ni enyɛŋ ehere wɔyiwala hu.

1 Timoteo 6:10: “Shikasuɔmɔ ji nibii fɔji srɔtoi fɛɛ ashishifãi lɛ eko, ni akɛni mɛi komɛi di suɔmɔ nɛɛ sɛɛ hewɔ lɛ, amɛdu gbɛ kɛje hemɔkɛyeli lɛ he, ni amɛkɛ piŋmɔi babaoo egbulɔ amɛhe fɛɛ.”

Nɔ ni etsɔɔ: Shika jeee nɔ fɔŋ. Shi mɛi ni sumɔɔ shika—ni ji mɛi ni kɛ amɛjwɛŋmɔ fɛɛ maa shika nɔ lɛ, náa naagbai yɛ amɛwekui amli, ni helai hu mɔmɔɔ amɛ, ejaakɛ amɛkɛ amɛhewalɛ fɛɛ tsuɔ nii koni amɛná shika babaoo.

Hebribii 13:5: “Shikasuɔmɔ akaba nyɛshihilɛ mli, ni nyɛmii ashɛa nibii ni nyɛyɔɔ amrɔ nɛɛ ahe.”

Nɔ ni etsɔɔ: Nɔ najiaŋ ni wɔkɛ nibii hi he hiaa lɛ baashã afɔle yɛ shika hewɔ lɛ, nilee yɛ mli akɛ wɔmii baashɛ nibii ni he hiaa wɔ lɛɛlɛŋ ni wɔyɔɔ lɛ ahe.

Mateo 19:24: “Ewaaa kɛhãaa afukpɔŋɔ akɛ eeetsɔ abui hiŋmɛi mli fe nɔ ni niiatsɛ aaabote Nyɔŋmɔ Maŋtsɛyeli lɛ mli.”

Nɔ ni etsɔɔ: Be ko lɛ, Yesu fɔ̃ oblanyo niiatsɛ ko nine ni ebatsɔ esɛɛnyiɛlɔ. Shi oblanyo lɛ ebanyiɛɛɛ esɛɛ, ejaakɛ esumɔɔ nii ni eyɔɔ lɛ waa. No hewɔ lɛ, Yesu bɔ kɔkɔ akɛ, mɔ fɛɛ mɔ ni kɛ ninámɔ yeɔ Nyɔŋmɔjamɔ hiɛ lɛ, enáŋ naanɔ wala.

a Atsɔɔ ŋmalɛ nɛɛ shishi hu akɛ: “Shikasuɔmɔ ji nibii fɔji srɔtoi fɛɛ ashishifãi lɛ eko.”