Mɛni Biblia Lɛ Tsɔɔ Yɛ Tongues He?

Hetoo ni Biblia lɛ kɛhãa

Wiemɔi srɔtoisrɔtoi wiemɔ loo “tongues wiemɔ” ji nyɛmɔ ko ni yɔɔ naakpɛɛ ni mra beiaŋ Kristofoi lɛ ná kɛwie wiemɔ srɔto ko klɛŋklɛŋ kwraa be ni amɛkaseko. (Bɔfoi 10:46, New International Version) Mɛi fɛɛ ni yɔɔ jɛmɛ lɛ nu nɔ ni wielɔ lɛ wieɔ lɛ shishi jogbaŋŋ, ni etɔɔɔ amɛ. (Bɔfoi 2:4-8) Tongues wiemɔ ji mumɔ krɔŋkrɔŋ lɛ nikeenii ni Nyɔŋmɔ kɛhã klɛŋklɛŋ afii 100 lɛ mli Kristofoi lɛ ateŋ ekome.​—Hebribii 2:4; 1 Korintobii 12:4, 30.

• Nɛgbɛ tongues wiemɔ lɛ je shishi yɛ, ni mɛɛ be eje shishi?

• Mɛɛ yiŋtoo hewɔ awie tongues lɛ?

• Ani atsɔɔ akɛ abaaya nɔ awie tongues?

• Mɛɛ be tongues wiemɔ sɛɛ fo?

• Ni tongues ni mɛi wieɔ ŋmɛnɛ lɛ hu?

• Te abaafee tɛŋŋ ayɔse anɔkwa Kristofoi?

Nɛgbɛ tongues wiemɔ lɛ je shishi yɛ, ni mɛɛ be eje shishi?

Naakpɛɛ nii nɛɛ je shishi klɛŋklɛŋ kwraa leebi ko yɛ Yerusalem, yɛ Yudafoi A-Pentekoste Gbi Jurɔ lɛ nɔ, yɛ afi 33 Ŋ.B. No mli lɛ, Yesu kaselɔi aaafee 120 ekpe, “ni mumɔ krɔŋkrɔŋ bayimɔ amɛ fɛɛ obɔbɔ, ni amɛbɔi wiemɔi srɔtoisrɔtoi wiemɔ.” (Bɔfoi 1:15; 2:1-4) Mɛi babaoo ko ni “jɛ jeŋmaji fɛɛ ni yɔɔ ŋwɛi shishi lɛ anɔ lɛ” babua amɛhe naa, ni “amɛteŋ mɔ fɛɛ mɔ nu ni amɛmiiwie lɛ diɛŋtsɛ emaŋ wiemɔ.”​—Bɔfoi 2:5, 6.

Mɛɛ yiŋtoo hewɔ awie tongues lɛ?

1. Koni akɛtsɔɔ akɛ Nyɔŋmɔ miifi Kristofoi lɛ asɛɛ. Bei ni eho lɛ amli lɛ, Nyɔŋmɔ tsɔ naakpɛɛ nii anɔ etsɔɔ akɛ, eefi anɔkwafoi komɛi asɛɛ, ni amɛteŋ mɔ kome ji Mose. (2 Mose 4:1-9, 29-31; 4 Mose 17:10) Wiemɔi srɔtoi ni awie yɛ be kome too mli lɛ tsu yiŋtoo ko tamɔ nakai he nii, kɛtsɔɔ akɛ Nyɔŋmɔ miifi Kristofoi asafo hee ni ato shishi lɛ sɛɛ. Bɔfo Paulo ŋma akɛ: “Wiemɔi srɔtoi jeee okadi kɛhã mɛi ni heɔ Nuŋtsɔ lɛ nɔ amɛyeɔ lɛ, shi moŋ kɛhã mɛi ni heee yeee lɛ.”​—1 Korintobii 14:22.

2. Koni Kristofoi lɛ anyɛ amɛye odase fitsofitso. Mɛi ni nu ni Yesu sɛɛnyiɛlɔi lɛ miiwie yɛ Pentekoste gbi lɛ nɔ lɛ kɛɛ akɛ: “Wɔmiinu ni amɛmiiwie Nyɔŋmɔ nibii wuji lɛ ahe yɛ wɔwiemɔi amli.” (Bɔfoi 2:11) No hewɔ lɛ, yiŋtoo titri kroko hewɔ ni afee naakpɛɛ nii nɛɛ ji, koni ‘akɛye odase fitsofitso kɛfee mɛi ni jɛ jeŋmaji lɛ fɛɛ amli lɛ kaselɔi’ taakɛ Yesu fã ekaselɔi ni amɛfee lɛ. (Bɔfoi 10:42; Mateo 28:19) Abaptisi mɛi ni na naakpɛɛ nii nɛɛ, ní amɛbo odase ni aye lɛ toi lɛ ateŋ mɛi aaafee 3,000 nakai gbi lɛ, ni amɛbatsɔmɔ kaselɔi.​—Bɔfoi 2:41.

Ani atsɔɔ akɛ abaaya nɔ awie tongues?

Dabi. Akɛ mumɔ krɔŋkrɔŋ lɛ nikeenii, ni tongues ni awie lɛ fata he lɛ, hã akɛ nɔ ko ni baahi shi be kukuoo, no ji esɛɛ baafo. Biblia lɛ gba akɛ: “Kɛ́ gbalɛ nikeenii ni lɛ, amɛsɛɛ baafo; kɛ́ wiemɔi srɔtoi ni lɛ, amɛsɛɛ baafo.”​—1 Korintobii 13:8.

Mɛɛ be tongues wiemɔ lɛ sɛɛ fo?

Kristofoi komɛi ni ná mumɔ krɔŋkrɔŋ lɛ nikeenii lɛ anine shɛ nɔ yɛ Yesu bɔfoi lɛ ahiɛ, bei pii lɛ, bɔfoi lɛ kɛ amɛniji ŋmɛlɛɔ Kristofoi nɛɛ anɔ kɛkɛ lɛ amɛná. (Bɔfoi 8:​18; 10:44-​46) Etamɔ nɔ ni mɛi ni nine shɛ mumɔ krɔŋkrɔŋ lɛ nikeenii lɛ anɔ kɛjɛ bɔfoi lɛ adɛŋ lɛ, kɛ nikeenii lɛ hãaa mɛi krokomɛi. (Bɔfoi 8:​5-7, 14-​17) Akɛ nɔkwɛmɔnɔ lɛ, amralo ko baanyɛ ahã mɔ ko laisɛnsi ni akɛdraiviɔ, shi mɔ ni akɛ laisɛnsi ehã lɛ bɛ mla naa hegbɛ akɛ ebaahã mɔ ko laisɛnsi. Etamɔ nɔ ni tongues wiemɔ lɛ sɛɛ fo be ni bɔfoi lɛ, kɛ mɛi ni nine shɛ mumɔ krɔŋkrɔŋ lɛ nikeenii lɛ nɔ kɛjɛ bɔfoi lɛ adɛŋ lɛ gboi lɛ.

Ni tongues ni mɛi wieɔ ŋmɛnɛ lɛ hu?

Etamɔ nɔ ni naakpɛɛ nikeenii ni ji tongues wiemɔ lɛ ba naagbee aaafee klɛŋklɛŋ afii 100 Ŋ.B. naagbee gbɛ. Mɔ ko bɛ ŋmɛnɛ ni ebaanyɛ ekɛɛ yɛ gbɛ ni ja nɔ akɛ eewie tongues diɛŋtsɛ ni awie yɛ Biblia beiaŋ lɛ eko yɛ Nyɔŋmɔ hewalɛ naa.a

Te abaafee tɛŋŋ ayɔse anɔkwa Kristofoi?

Yesu kɛɛ, suɔmɔ krɔŋŋ ji nɔ ni akɛbaayɔse ekaselɔi lɛ. (Yohane 13:34, 35) Nakai nɔŋŋ bɔfo Paulo tsɔɔ akɛ, suɔmɔ baafee nɔ titri ni akɛbaayɔse anɔkwa Kristofoi kɛya naanɔ. (1 Korintobii 13:​1, 8) Etsɔɔ akɛ, Nyɔŋmɔ mumɔ lɛ baawo sui komɛi yɛ Kristofoi lɛ amli, ni nakai sui lɛ, kɛ́ abua fɛɛ naa lɛ atsɛɔ lɛ “yibii ni mumɔ lɛ woɔ,” ni suɔmɔ ji sui nɛɛ ateŋ klɛŋklɛŋ nɔ.​—Galatiabii 5:​22, 23.