Mɛɛ Gbɛ Nɔ Yesu Hereɔ Mɛi Ayiwala?
Hetoo ni Biblia lɛ kɛhãa
Yesu here adesai ni yeɔ Nyɔŋmɔ anɔkwa lɛ ayiwala be ni ekɛ ewala hã akɛ kpɔmɔ afɔle lɛ. (Mateo 20:28) No hewɔ lɛ, Biblia lɛ tsɛɔ lɛ “je lɛ Yiwalaherelɔ.” (1 Yohane 4:14) Ekɛɔ hu akɛ: “Yiwalaheremɔ ko bɛ mɔ kroko mli, ejaakɛ gbɛ́i kroko bɛ ŋwɛi shishi ni akɛhã yɛ gbɔmɛi ateŋ ni esa akɛ atsɔ nɔ ahere wɔyiwala.”—Bɔfoi 4:12.
Yesu ‘sa enaa gbele ehã mɔ fɛɛ mɔ’ ni heɔ enɔ eyeɔ lɛ. (Hebribii 2:9; Yohane 3:16) No sɛɛ lɛ, “Nyɔŋmɔ tee lɛ shi kɛjɛ gbohii ateŋ,” ni eku esɛɛ kɛtee ŋwɛi akɛ mumɔŋ bɔɔ nɔ. (Bɔfoi 3:15) Akɛni Yesu yɛ ŋwɛi hewɔ lɛ, “enyɛɔ ehereɔ mɛi ni tsɔɔ enɔ amɛbɛŋkɛɔ Nyɔŋmɔ lɛ ayiwala kwraa, ejaakɛ ehiɛ kã daa koni ekpa fai ehã amɛ.”—Hebribii 7:25.
Mɛni hewɔ ehe miihia ni Yesu akpa fai ehã wɔ lɛ?
Eshafeelɔi ji wɔ fɛɛ. (Romabii 3:23) Esha hãa gbɛ bakãa wɔ kɛ Nyɔŋmɔ teŋ, ni no hewɔ wɔgboiɔ lɛ. (Romabii 6:23) Shi Yesu sɔmɔɔ akɛ “mlidamɔlɔ” ehãa mɛi ni jieɔ hemɔkɛyeli kpo yɛ ekpɔmɔ afɔle lɛ mli lɛ. (1 Yohane 2:1, shishigbɛ niŋmaa) Ekpaa Nyɔŋmɔ fai ehãa amɛ, koni Nyɔŋmɔ abo amɛsɔlemɔi atoi, ni edamɔ Yesu afɔleshaa gbele lɛ nɔ ekɛ amɛhe eshai lɛ ake amɛ. (Mateo 1:21; Romabii 8:34) Nyɔŋmɔ boɔ fai ni Yesu kpaa nɛɛ toi ejaakɛ ekɛ esuɔmɔnaa nii kpãa gbee. Nyɔŋmɔ tsu Yesu kɛba shikpɔŋ lɛ nɔ “koni atsɔ enɔ ahere je lɛ yiwala.”—Yohane 3:17.
Ani hemɔkɛyeli ni wɔbaaná yɛ Yesu mli lɛ pɛ ji nɔ ni baahã ahere wɔyiwala?
Dabi. Eyɛ mli akɛ esa akɛ wɔhe Yesu nɔ wɔye koni ahere wɔyiwala moŋ, shi no pɛ kɛkɛ faaa. (Bɔfoi 16:30, 31) Biblia lɛ kɛɛ: “Bɔ ni gbɔmɔtso ni mumɔ bɛ mli lɛ ji gbonyo lɛ, nakai nɔŋŋ hu hemɔkɛyeli ni nitsumɔi fataaa he lɛ ji hemɔkɛyeli ni egbo.” (Yakobo 2:26) No hewɔ lɛ, dani abaahere wɔyiwala lɛ, esa akɛ:
Wɔkase Yesu kɛ e-Tsɛ Yehowa he nii.—Yohane 17:3.
Wɔná hemɔkɛyeli ni mli wa yɛ amɛmli.—Yohane 12:44; 14:1.
Wɔbo amɛgbɛtsɔɔmɔi atoi kɛtsɔɔ akɛ wɔyɛ hemɔkɛyeli. (Luka 6:46; 1 Yohane 2:17) Yesu kɛɛ akɛ jeee mɔ fɛɛ mɔ ni tsɛɔ lɛ “Nuŋtsɔ” lɛ, abaahere eyiwala, shi moŋ, mɛi ni “feɔ e-Tsɛ ni yɔɔ ŋwɛi lɛ suɔmɔnaa nii lɛ pɛ.”—Mateo 7:21.
Wɔya nɔ wɔjie hemɔkɛyeli kpo kɛ́ wɔkɛ naagbai kpe po. Yesu fee enɛ faŋŋ, ewie akɛ: “Mɔ ni baafi shi kɛbaaya naagbee lɛ, lɛ eyiwala abaahere.”—Mateo 24:13.