Ani Nyɔŋmɔ Mami Ji Maria?

Hetoo ni Biblia lɛ kɛhãa

Dabi, Biblia lɛ etsɔɔɔ akɛ Nyɔŋmɔ mami ji Maria, ni etsɔɔɔ hu akɛ Kristofoi aja Maria loo amɛkɛ woo krɛdɛɛ ko ahã lɛ.a Susumɔ enɛ he okwɛ:

Maria ewieee kɔkɔɔkɔ akɛ eji Nyɔŋmɔ mami. Biblia lɛ tsɔɔ akɛ lɛ efɔ “Nyɔŋmɔ Bi lɛ,” jeee Nyɔŋmɔ diɛŋtsɛ.—Marko 1:1; Luka 1:32.
Yesu ewieee kɔkɔɔkɔ akɛ Nyɔŋmɔ mami ji Maria loo akɛ, akɛ woo krɛdɛɛ ko ahã lɛ. Anɔkwa, be ni yoo ko jie Maria yi yɛ hegbɛ ni nɔ bɛ ni eyɔɔ akɛ Yesu mami lɛ hewɔ lɛ, Yesu jaje yoo lɛ jwɛŋmɔ akɛ: “Dabi, jeee nakai, moŋ lɛ, mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ yɛ miishɛɛ!”—Luka 11:27, 28.
Wiemɔi ni ji, “Nyɔŋmɔ Mami” kɛ “Theotokos” lɛ (Mɔ Ni Fɔ Nyɔŋmɔ) bɛ Biblia lɛ mli.
Jeee Maria ji mɔ ni atsɛ lɛ yɛ Biblia lɛ mli akɛ “Ŋwɛi Maŋnyɛ” lɛ, moŋ lɛ, “Ŋwɛi Maŋnyɛ” lɛ ji amale nyɔŋmɔyoo ni Israelbii ni kwa Nyɔŋmɔ lɛ ja lɛ. (Yeremia 44:15-19) Eeenyɛ efee akɛ Ishtar (Astarte), ni ji Babiloniabii anyɔŋmɔyoo ko lɛ ji “Ŋwɛi Maŋnyɛ” lɛ.
Mra beiaŋ Kristofoi lɛ jaaa Maria, ni amɛkɛ woo krɛdɛɛ ko hu hãaa lɛ. Yinɔsaneŋmalɔ ko wie akɛ “kulɛ mra beiaŋ Kristofoi lɛ baakpoo nifeemɔ ni tamɔ jamɔ, ni ekolɛ amɛbaashe gbeyei akɛ kɛ́ amɛkɛ amɛjwɛŋmɔ tee Maria nɔ pii lɛ, mɛi baasusu akɛ amɛmiijá nyɔŋmɔyoo.”—In Quest of the Jewish Mary.
Biblia lɛ kɛɔ akɛ Nyɔŋmɔ bɛ shishijee ni ebɛ naagbee hu. (Lala 90:1, 2; Yesaia 40:28) Akɛni ebɛ shishijee hewɔ lɛ, anyɛŋ akɛɛ akɛ eyɛ mami. Kɛfata he lɛ, enyɛŋ eba lɛ akɛ Maria hiɛ Nyɔŋmɔ hɔ yɛ emusuŋ; Biblia lɛ feɔ lɛ faŋŋ akɛ ŋwɛi po edaaa hãaa lɛ.—1 Maŋtsɛmɛi 8:27.

Maria ji Yesu mami, jeee “Nyɔŋmɔ Mami”

Maria lɛ, afɔ lɛ akɛ Yudanyo, ni ejɛ Maŋtsɛ David wekutɔkpaa lɛ mli. (Luka 3:23-31) Nyɔŋmɔ dro lɛ yɛ ehemɔkɛyeli kɛ ehe ni etu ehã lɛ kwraa lɛ hewɔ. (Luka 1:28) Nyɔŋmɔ hala lɛ akɛ ebatsɔ Yesu mami. (Luka 1:31, 35) Maria kɛ ewu Yosef fɔ bii krokomɛi hu.—Marko 6:3.

Eyɛ mli akɛ Biblia lɛ tsɔɔ akɛ Maria batsɔ Yesu kaselɔ moŋ, shi awieee ehe saji tsɔ yɛ Biblia lɛ mli.—Bɔfoi 1:14.

Mɛni hewɔ mɛi komɛi buɔ Maria akɛ Nyɔmɔ mami lɛ?

Be klɛŋklɛŋ kwraa ni ayɔse akɛ mɛi kɛ woo krɛdɛɛ miihã Maria lɛ je shishi yɛ afii 300 Ŋ.B. afii lɛ naagbee gbɛ. Nakai beiaŋ ji be ni Katolik Sɔlemɔ lɛ batsɔ Maŋ jamɔ yɛ maji ni Roma Nɔyeli lɛ yeɔ nɔ lɛ amli. Enɛ hã mɛi fɛɛ ni jaa amagai lɛ bɔi amɛhe Kristofoi tsɛmɔ. No mli lɛ, sɔlemɔ lɛ ekpɛlɛ Triniti tsɔɔmɔ ni damɔɔɔ Biblia lɛ nɔ lɛ nɔ.

Triniti tsɔɔmɔ lɛ hã mɛi babaoo ni yɔɔ sɔlemɔ lɛ mli lɛ mu sane naa akɛ, kɛ́ Yesu ji Nyɔŋmɔ lɛ, no lɛ, eyɛ faŋŋ akɛ Maria ji Nyɔŋmɔ mami. Yɛ afi 431 Ŋ.B. lɛ, sɔlemɔ lɛ fee kpee ko yɛ Efeso ni amɛwie yɛ faŋŋ mli akɛ Maria ji “Nyɔŋmɔ Mami.” Be ni afee kpee nɛɛ agbe naa lɛ, woo krɛdɛɛ ni akɛhãa Maria lɛ (Mariolatry) bahe shi waa agbɛnɛ. Ni be ni wɔŋjalɔi lɛ kɛ amɛhe badɔmɔ sɔlemɔ lɛ, fiofio lɛ amɛkɛ Maria, ni amɛtsɛɔ lɛ oblayoo fro lɛ he mfonirii kɛ okadii baye amɛnyɔŋmɔyei ni akɛɛ amɛhãa afɔɔ lɛ, tamɔ Artemis (ni Romabii lɛ tsɛɔ lɛ Diana lɛ) kɛ Isis lɛ anajiaŋ.

Yɛ afi 432 Ŋ.B. lɛ, Pope Sixtus III lɛ fã ni amã sɔlemɔ shĩa yɛ Rome ni akɛwo “Nyɔŋmɔ Mami” hiɛ nyam. Amã sɔlemɔ shĩa nɛɛ yɛ he ko ni bɛŋkɛ he ni kulɛ Romabii lɛ anyɔŋmɔyoo ko ni atsɛɔ lɛ Lucina lɛ gbatsu ni amã kɛwo ehiɛ nyam lɛ yɔɔ lɛ; aheɔ ayeɔ akɛ nyɔŋmɔyoo nɛɛ nyɛɔ ehãa afɔɔ. Enɛ ni amɛfee lɛ hã amɛkɛ wɔŋjamɔ bawo Kristendom jamɔ lɛ mli. Woloŋmalɔ ko wie akɛ sɔlemɔ shĩa ni amã nɛɛ ji “okadi ni yɔɔ faŋŋ akɛ Katolik sɔlemɔ lɛ etsake Mami Kpele, ni atsɛɔ lɛ Lucina, lɛ jamɔ lɛ hiɛ ni ebatsɔ Maria jamɔ.”—Mary—The Complete Resource.

a Jamɔi babaoo tsɔɔ akɛ Nyɔŋmɔ mami ji Maria. Amɛteŋ mɛi komɛi tsɛɔ lɛ “Ŋwɛi Maŋnyɛ” loo Theotokos, Greek wiemɔ ni shishi ji, “Mɔ Ni Fɔ Nyɔŋmɔ.”