Sanebimɔi Ni Biblia Lɛ Ehã Hetoo / Bɔlɛnamɔ / Mɛni Esa Akɛ Mafee Koni Mɛi Akatara Mihe Loo Amɛkafee Nibii Kɛtee Mibɔlɛnamɔ Henumɔ Shi?

Hetoo ni Biblia lɛ kɛhãa

Naa ŋaawoi kpakpai komɛi ni Biblia lɛ kɛhãa:

1. Tsɔɔmɔ akɛ nii otee tsumɔ. Okɛ mɛi ni okɛtsuɔ nii lɛ aye jogbaŋŋ yɛ bulɛ mli, shi nakai beiaŋ nɔŋŋ lɛ, kwɛmɔ ni okafee nɔ ko ni tsɔɔ akɛ oyɛ amɛbɔlɛnamɔ nifeemɔi lɛ ahe miishɛɛ.​—Mateo 10:16; Kolosebii 4:6.

2. Wo atade ni sa jogbaŋŋ, ni osaa ohe bɔ ni yɔɔ hiŋmɛi nɔ. Kɛ́ owo atade ni tɛŋɔ ogbɔmɔtso lɛ loo ehãa anaa ogbɔmɔtso lɛ hei komɛi ni esaaa akɛ anaa lɛ, ebaahã mɛi anu he akɛ ootao ni akɛ bo aná bɔlɛ. Biblia lɛ jieɔ yi akɛ akɛ “hiɛ ni gboɔ nɔ kɛ hiɛshikamɔ awula” he.​—1 Timoteo 2:9.

3. Okɛ hiɛshikamɔ ahala onanemɛi. Kɛ́ okɛ mɛi ni sumɔɔ ni asɛndi mɛseji loo afee nibii kɛtee amɛbɔlɛnamɔ henumɔ shi bɔɔ lɛ, ewaaa kwraa akɛ amɛkɛ bo hu baaye nakai.​—Abɛi 13:20.

4. Tsi ohe kɛje wiemɔ sha he. Kɛ́ oyɛ he ko ni aagba sane, ni sanegbaa lɛ tsɔ “hiɛgbeji awiemɔ, kwashiai awiemɔ, loo yakayaka wiemɔ ni akɛyeɔ fɛo lɛ,” shi jɛmɛ.​—Efesobii 5:4, God’s Word Bible.

5. Kwa shihilɛi ni baanyɛ ahã okɛ ohe awo efɔŋfeemɔ mli. Akɛ nɔkwɛmɔnɔ lɛ, kɛ́ okpa nitsumɔ, ni mɛi komɛi miitao ni omɛ ŋmɛlɛtswai abɔ, ni jeee yiŋtoo kpakpa ko hewɔ lɛ, kwɛmɔ ni okakpɛlɛ nɔ.​—Abɛi 22:3.

6. Feemɔ shiŋŋ, ni ohã ale osusumɔ. Kɛ́ mɔ ko mɔmɔ omli, ewie nɔ ko, loo efee nɔ ko koni ekɛtee obɔlɛnamɔ henumɔ shi lɛ, feemɔ shiŋŋ ni okɛɛ lɛ akɛ osumɔɔɔ nɔ ni efeɔ lɛ. (1 Korintobii 14:9) Akɛ nɔkwɛmɔnɔ lɛ, obaanyɛ okɛɛ lɛ akɛ: “Okɛ ohe miishɔɔ mi sɔŋŋ, ni minyaaa he kwraa. Kpa nɔ ni ofeɔ lɛ.” Obaanyɛ oŋma lɛta oyahã mɔ ni feɔ bo nakai lɛ, ni otsɔɔ lɛ nɔ ni efee, bɔ ni onu he ohã, kɛ bɔ ni obaasumɔ ni nibii aya lɛ be kroko. Feemɔ lɛ faŋŋ ohã lɛ akɛ, nɔ ni okɛɛ lɛ lɛ damɔ bɔ ni okpɛ oyiŋ akɛ obaahi shi ohã lɛ kɛ ojamɔ mli hemɔkɛyelii anɔ.​—1 Tesalonikabii 4:3-5.

7. Bi yelikɛbuamɔ. Kɛ́ mɔ lɛ kpaaa ohe taramɔ lɛ loo nibii ni efeɔ koni ekɛtee obɔlɛnamɔ henumɔ shi lɛ, bi yelikɛbuamɔ kɛjɛ onaanyo ko ni omuɔ ofɔ̃ɔ enɔ, owekunyo ko, loo mɔ ko ni okɛ lɛ tsuɔ nii loo mɔ ko ni yɔɔ niiashikpamɔ yɛ bɔ ni ayeɔ abuaa mɛi ni miitsɔ̃ shihilɛ nɛɛ eko mli lɛ dɛŋ. (Abɛi 27:9) Sɔlemɔ eye ebua mɛi pii ni aje gbɛ afee nibii koni akɛtee amɛbɔlɛnamɔ henumɔ shi lɛ. Kɛ́ osɔleko pɛŋ po lɛ, ná nɔmimaa akɛ kɛ́ osɔle lɛ, Yehowa, “miishɛjemɔ fɛɛ Nyɔŋmɔ lɛ,” baanyɛ aye ebua bo.​—2 Korintobii 1:3.

Nibii ni ajeɔ gbɛ afeɔ kɛteɔ mɛi abɔlɛnamɔ henumɔ ashi lɛ hãaa mɛi ni afeɔ amɛ nakai lɛ aná miishɛɛ yɛ amɛnitsumɔhei lɛ, shi Biblia lɛ baanyɛ aye abua.