Sanebimɔi Ni Biblia Lɛ Ehã Hetoo / Abonsam Kɛ Daimonioi Lɛ / Ani Abonsam Baanyɛ Ekudɔ Adesai?

Hetoo ni Biblia lɛ kɛhãa

Abonsam kɛ daimonioi lɛ náa gbɔmɛi anɔ hewalɛ aahu akɛ, Biblia lɛ wie akɛ: “Mɔ Fɔŋ lɛ kudɔɔ jeŋ muu lɛ fɛɛ.” (1 Yohane 5:19, New Century Version) Biblia lɛ etsɔɔ gbɛi ni Abonsam tsɔɔ nɔ enáa mɛi anɔ hewalɛ.

• Lakamɔ. Biblia lɛ woɔ Kristofoi hewalɛ ni “amɛwu amɛshi Abonsam ŋaatsɔi fɔji lɛ.” (Efesobii 6:11, NCV ) Eŋaatsɔi lɛ ateŋ ekome ji, ni elaka mɛi koni amɛhe amɛye akɛ mɛi ni ekɛtsuɔ nii lɛ moŋ ji Nyɔŋmɔ sɔɔlɔi.​—2 Korintobii 11:13-15.

• Mumɔi kɛshãramɔ. Abonsam tsɔɔ mumɔi atsɛlɔi, klamɔfoi, kɛ ŋulamiiaŋkwɛlɔi anɔ elakaa mɛi. (5 Mose 18:10-12) Nibii ni hãa daimonioi nyɛɔ ekudɔɔ mɔ lɛ eko ji, tsofãi ni akɛtsuɔ nii yɛ gbɛ ni ejaaa nɔ, nɔ ni Blɔfo tsɛɔ lɛ hypnotism lɛ, kɛ gbɛi ni atsɔɔ nɔ ajwɛŋɔ sane nɔ ni hãa akɛ daimonioi shãraa.​—Luka 11:24-26.

• Amale jaamɔ. Jaamɔi ni tsɔɔ amale tsɔɔmɔi lɛ lakaa mɛi koni amɛkɛ Nyɔŋmɔ gbɛtsɔɔmɔi akatsu nii. (1 Korintobii 10:20) Biblia lɛ tsɛɔ amale tsɔɔmɔi loo hemɔkɛyelii nɛɛ akɛ “daimonioi atsɔɔmɔi.”​—1 Timoteo 4:1.

• Amɛnáa mɛi anɔ hewalɛ. Amaniɛbɔi komɛi yɛ Biblia lɛ mli ni tsɔɔ akɛ mumɔi fɔji ná mɛi komɛi anɔ hewalɛ. Yɛ shihilɛi lɛ ekomɛi amli lɛ, mɛi ni daimonioi ná amɛnɔ hewalɛ lɛ ahiŋmɛi shwila, amɛtɔ mu, loo amɛye amɛhe awui po.​—Mateo 12:22; Marko 5:2-5.

Nibii ni esa akɛ wɔfee koni Abonsam akaná wɔnɔ hewalɛ

Esaaa akɛ osheɔ gbeyei akɛ daimonioi baanyɛ akudɔ bo, ejaakɛ Biblia lɛ etsɔɔ nibii ni obaanyɛ ofee kɛtsĩ Abonsam gbɛ ni ekaná onɔ hewalɛ:

• Esa akɛ ole gbɛi anɔ ni Abonsam tsɔɔ enáa mɛi anɔ hewalɛ lɛ, koni ‘ole eŋaatsɔi lɛ.’​—2 Korintobii 2:11.

• Kasemɔ Biblia lɛ, ni okɛ nibii ni okaseɔ yɛ mli lɛ atsu nii. Kɛ́ okɛ Biblia mli shishitoo mlai tsu nii lɛ, ebaabu ohe koni Abonsam akaná onɔ hewalɛ.​—Efesobii 6:11-18.

• Shɛrɛmɔ nibii fɛɛ ni kɛ daimonioi anifeemɔi yɔɔ tsakpãa ko lɛ oshwie. (Bɔfoi 19:19) Nibii nɛɛ ekomɛi ji lalai, woji srɔtoi, mfonirii ni akɛkpɛtɛɔ shi, kɛ vidioi ni woɔ mumui kɛshãramɔ mli hewalɛ.