Sanebimɔi Ni Biblia Lɛ Ehã Hetoo / Bɔlɛnamɔ / Mɛni Biblia Lɛ Kɛɔ Yɛ Ponografi He? Ani Tɔ̃mɔ Yɛ Cybersex He?

Hetoo ni Biblia lɛ kɛhãa

Biblia lɛ etsĩii ponografi, saji ni teɔ bɔlɛnamɔ akɔnɔ shi ni akɛmajeɔ mɛi kɛtsɔ Intanɛt lɛ nɔ, loo amɛhenɔi lɛ atã. Kɛ̃lɛ, Biblia lɛ hãa wɔnaa bɔ ni Nyɔŋmɔ naa bɔlɛnamɔ nifeemɔi ni yaa nɔ yɛ gbalashihilɛ sɛɛ, loo susumɔi ni ejaaa ni mɛi hiɛ yɛ bɔlɛnamɔ he lɛ ehãa. Susumɔ ŋmalɛi ni nyiɛ sɛɛ nɛɛ ahe okwɛ:

• “No hewɔ lɛ, nyɛgbea nyɛgbɔmɔtso lɛ henii ni yɔɔ shikpɔŋ lɛ nɔ lɛ, ni ji ajwamaŋbɔɔ, muji nii, bɔlɛnamɔ he akɔnɔ ni anyɛɛɛ nɔ aye.” (Kolosebii 3:5) Kɛ́ mɔ ko kwɛ ponografi lɛ, egbeee egbɔmɔtso lɛ henii lɛ, moŋ lɛ eteɔ ebɔlɛnamɔ akɔnɔi ashi. Ehãaa mɔ lɛ he atse yɛ Nyɔŋmɔ hiɛ.

• “Mɔ fɛɛ mɔ ni yaa nɔ ekwɛɔ yoo ni enáa ehe akɔnɔ lɛ, ekɛ lɛ efite gbãla momo yɛ etsui mli.” (Mateo 5:​28) Kɛ́ mɔ ko kwɛ mfonirii loo vidioi ni tsɔɔ mɛi ni miiná bɔlɛ lɛ, eteɔ susumɔi ni ejaaa ashi, ni ehãa mɔ lɛ kɛ ehe woɔ nifeemɔi gbohii amli.

• “Ajwamaŋbɔɔ kɛ muji nii srɔtoi fɛɛ kɛ amimyeli lɛ, akatsĩ tã po yɛ nyɛteŋ.” (Efesobii 5:3) Esaaa ni wɔwieɔ bɔlɛnamɔ saji ni wɔkɛteɔ bɔlɛnamɔ akɔnɔ shi aahu po ni wɔbaakwɛ ehe mfoniri loo vidio loo wɔbaakane ehe saji.

• “Anaa heloo lɛ nitsumɔi lɛ faŋŋ, ni nomɛi ji ajwamaŋbɔɔ, muji nii, . . . kɛ nibii ni tamɔ enɛɛmɛi. Miikɛɛ nyɛ miifɔ̃ shi, tamɔ bɔ ni mibɔ nyɛ kɔkɔ momo lɛ, akɛ mɛi ni yaa nɔ amɛfeɔ nɛkɛ nibii nɛɛ anine shɛŋ Nyɔŋmɔ Maŋtsɛyeli lɛ nɔ.” (Galatiabii 5:19-21) Nyɔŋmɔ naa mɛi ni kwɛɔ ponografi loo amɛkɛ amɛhe woɔ Intanɛt lɛ nɔ bɔlɛnamɔ, fon nɔ bɔlɛnamɔ, loo bɔlɛnamɔ he mɛseji ni akɛsɛndiɔ kɛ nibii ni tamɔ nakai amli lɛ akɛ amɛkɛ amɛhe miiwo muji nii amli, ni amɛjeŋba ekpɔtɔ. Kɛ́ nifeemɔi nɛɛ batsɔ wɔsu lɛ, ehãŋ Nyɔŋmɔ aná wɔhe miishɛɛ.