Sanebimɔi Ni Biblia Lɛ Ehã Hetoo / Abonsam Kɛ Daimonioi Lɛ / Ani Abonsam Ji Mɔ Ko Ni Yɔɔ Diɛŋtsɛ?

Hetoo ni Biblia lɛ kɛhãa

Hɛɛ, Abonsam ji mɔ ko ni yɔɔ diɛŋtsɛ. Lɛ ji “je lɛ nɔyelɔ” kɛ mumɔŋ bɔɔ nɔ ko ni tse Nyɔŋmɔ hiɛ atua. (Yohane 14:30; Efesobii 6:11, 12) Ŋmalɛi ni nyiɛ sɛɛ nɛɛ hãa wɔnaa bɔ ni Biblia lɛ tsɔɔ mɔ ni Abonsam ji kɛ gbɛ́i srɔtoi ni akɛ tsɛ lɛ:

• Satan, eshishi ji “Shiteekɛwolɔ.”​—Hiob 1:6.

• Abonsam, eshishi ji “Mɔheguɔgbelɔ.”​—Kpojiemɔ 12:9.

• Onufu, ni akɛtsu nii yɛ Biblia lɛ mli lɛ tsɔɔ “Mɔ Ni Lakaa Mɔ.”​—2 Korintobii 11:3.

• Mɔ Ni Kaa Mɔ.​—Mateo 4:3.

• Amalelɔ.​—Yohane 8:44 .

Jeee adesa ko loo efɔŋfeemɔ su ko

Mɛi komɛi kɛɔ akɛ gbɔmɛi nɔŋŋ ji Abonsam loo akɛ Abonsam ji efɔŋ su ko ni yɔɔ wɔ mli. Shi Biblia lɛ ebɔ sanegbaa ko ni tee nɔ yɛ Yehowa kɛ Satan teŋ lɛ he amaniɛ. Nakai sanegbaa lɛ tee nɔ yɛ ŋwɛi, no hewɔ lɛ, no mli lɛ jeee gbɔmɛi Nyɔŋmɔ kɛ amɛ wieɔ lɛ; moŋ lɛ no mli lɛ, mumɔŋ bɔɔnɔ ko ekɛwieɔ lɛ. (Hiob 2:1-6) Nakai nɔŋŋ sanegbaa ko tee nɔ yɛ Satan kɛ Yesu teŋ. (Mateo 4:8-10; 1 Yohane 3:5) No hewɔ lɛ, Biblia lɛ miitsɔɔ akɛ Abonsam ji mɔ ko ni yɔɔ diɛŋtsɛ, shi jeee efɔŋfeemɔ su ko kɛkɛ.

Ani esa akɛ efee wɔ naakpɛɛ akɛ mɛi babaoo heee amɛyeee akɛ Abonsam ji mɔ ko ni yɔɔ diɛŋtsɛ? Dabi kwraa, ejaakɛ Biblia lɛ wie akɛ Satan kɛ lakamɔ tsuɔ eyiŋtoi ahe nii. (2 Tesalonikabii 2:9, 10) Elakamɔi lɛ ateŋ ekome ni ekɛtsu nii ni eye omanye waa ji, mɔdɛŋ ni ebɔ akɛ eshwila mɛi pii ajwɛŋmɔ koni akana lɛ akɛ mɔ ko ni yɔɔ diɛŋtsɛ lɛ.​—2 Korintobii 4:4.

Susumɔi krokomɛi ni ejaaa ni kɔɔ Abonsam he

Anɔkwa sane: Hebri wiemɔ ni atsɔɔ shishi yɛ Biblia komɛi amli akɛ Lusifa lɛ shishi ji “mɔ ni kpɛɔ heŋŋ.” (Yesaia 14:12) Sane he ni awieɔ dani akɛ wiemɔ nɛɛ tsu nii lɛ tsɔɔ akɛ, aawie maŋtsɛmɛi aweku ko ni jɛ Babilon, ni Nyɔŋmɔ baakpãta amɛhiɛ yɛ amɛhenɔwomɔ hewɔ lɛ ahe. (Yesaia 14:4, 13-20) Akɛ wiemɔ ni ji “mɔ ni kpɛɔ heŋŋ” lɛ tsu nii kɛye Babilon maŋtsɛyeli lɛ he fɛo be ni akpãta ehiɛ lɛ.

Anɔkwa sane: Abonsam ji Nyɔŋmɔ henyɛlɔ, shi jeee etsulɔ. Satan Abonsam teɔ shi ewoɔ mɛi ni sɔmɔɔ Nyɔŋmɔ lɛ, ni ewieɔ eshiɔ amɛ.​—1 Petro 5:8; Kpojiemɔ 12:10 .