Kɛ́ Misɔle Lɛ, Ani Nyɔŋmɔ Baaye Abua Mi?

Hetoo ni Biblia lɛ kɛhãa

Hɛɛ, Nyɔŋmɔ yeɔ ebuaa mɛi ni jɛɔ anɔkwayeli mli amɛbiɔ nibii ni kɛ esuɔmɔnaa nii kpãa gbee lɛ. Kɛ́ osɔleko dã po lɛ, Biblia mli nɔkwɛmɔnii ni tsɔɔ mɛi ni sɔle akɛ, “Nyɔŋmɔ, ye obua mi,” lɛ baawo bo hewalɛ koni osɔle. Sɔlemɔi lɛ ekomɛi nɛ:

• “Ye obua mi, Yehowa, mi-Nyɔŋmɔ! Omɔbɔnalɛ naa lɛ heremɔ miyiwala.”—Lala 109:26.

• “Ohiafo ji mi, ni mibɛ nɔ ko: O Nyɔŋmɔ, ye obua mi.”—Lala 69:6, Douay Version.

Yɛ anɔkwale mli lɛ, mɔ ni ŋma nakai wiemɔi lɛ ná hemɔkɛyeli ni mli wa yɛ Nyɔŋmɔ mli. Kɛlɛ, Nyɔŋmɔ boɔ mɛi fɛɛ ni baa eŋɔɔ kɛ jwɛŋmɔ ni ja lɛ atoi, tamɔ “mɛi ni hiɛnɔkamɔ etã” aloo “mɛi ni werɛ eho amɛhe” lɛ nɛkɛ.—Lala 34:18 Ga Biblia hee.

Esaaa akɛ onuɔ he akɛ Nyɔŋmɔ kɛ bo teŋ jekɛ, no hewɔ lɛ, onaagbai lɛ jeee ehe sane. Biblia lɛ kɛɛ: “Yehowa yɛ ŋwɛi shɔŋŋ moŋ, shi kɛlɛ ehiɛ kã heshibalɔ he; shi hewolɔ lɛ, eyoɔ lɛ yɛ shɔŋŋ.” (Lala 138:6) Anɔkwa, be ko lɛ, Yesu kɛɛ ekaselɔi lɛ akɛ: “Shi nyɛyiteŋtsɔi po lɛ akane fɛɛ.” (Mateo 10:30) Nyɔŋmɔ le ohe nibii fɛɛ fitsofitso bɔ ni bo po ojwɛŋmɔ shɛɛɛ he. Belɛ enyiɛ nɔŋŋ ni kɛ́ osɔle koni eye ebua bo kɛkpee onaagbai lɛ anaa lɛ, eboŋ bo toi!—1 Petro 5:7.