Ani Esa Akɛ Ashwa Nyɔŋmɔ Yɛ Wɔnɔnai Lɛ Ahewɔ?

Hetoo ni Biblia lɛ kɛhãa

Biblia lɛ kɛ nɔmimaa hãa hetoo akɛ dabi! Nɔnai fataaa Yehowa Nyɔŋmɔ yiŋtoo kɛhã adesai lɛ he. Kɛ̃lɛ, klɛŋklɛŋ adesai enyɔ lɛ tse Nyɔŋmɔ nɔyeli lɛ hiɛ atua, ni amɛhala akɛ amɛbaahi shi yɛ amɛ diɛŋtsɛ amɛjalɛ tɛi ni kɔɔ nɔ ni ja kɛ nɔ ni ejaaa he lɛ naa. Amɛtse amɛhe kɛje Nyɔŋmɔ he, ni amɛkɛ nɔnai ni jɛ mli kɛba lɛ kpe.

Ŋmɛnɛ lɛ, wɔmiikpa gbɛ gbonyo ni amɛkɔ lɛ mli yibii. No hewɔ lɛ, enyɛŋ eba kɔkɔɔkɔ akɛ Nyɔŋmɔ ji mɔ ni hãa adesai naa nɔ lɛ.

Biblia lɛ kɛɔ akɛ: “Kɛ́ mɔ ko kɛ jaramɔ shihilɛ ko miikpe lɛ, ekakɛɛ akɛ: “Nyɔŋmɔ miika mi.” Ejaakɛ anyɛŋ akɛ nibii fɔji aka Nyɔŋmɔ, ni asaŋ lɛ diɛŋtsɛ hu ekaaa mɔ ko.” (Yakobo 1:13) Mɔ fɛɛ mɔ baanyɛ ekɛ nɔnaa akpe—mɛi po ni yɔɔ Nyɔŋmɔ hiɛ duromɔ lɛ hu fata he.