Mɛi Heee Maŋkwralɔi Amɛyeee Dɔŋŋ​—⁠Mɛni Biblia Lɛ Kɛɔ Yɛ He?

Yɛ afi 2024 mli lɛ, abaafɔ̃ oshikii babaoo yɛ je lɛŋ hei srɔtoi fe afii ni eho lɛ fɛɛ. Kɛ̃lɛ, mɛi babaoo heee maŋkwralɔi lɛ amɛyeee.

• Be ni abibii Americabii pii asusumɔ yɛ pɔlitis he lɛ, amɛtsɔɔ mli akɛ “maŋkwralɔi lɛ babaoo foɔ amɛ pɛ amɛnɔ mli” moŋ fe ni amɛbaafee nibii ni maŋbii lɛ baaná he sɛɛ.a​—Pew Research Center, September 19, 2023.

Oblahii kɛ oblayei babaoo hu heee maŋkwralɔi lɛ amɛyeee.

• “Oblahii kɛ oblayei lɛ sumɔɔ ni atsu naagbai ni yɔɔ lɛ ahe nii, shi amɛtsɔɔ akɛ maŋkwralɔi lɛ gbaaa amɛhe naa yɛ bɔ ni abaafee atsu naagbai lɛ ahe nii lɛ he.”​—The New York Times, January 29, 2024.

• “Niiamlitaomɔ ko ni afee lɛ tsɔɔ akɛ, oblahii kɛ oblayei lɛ heɔ mɛi ni ehe gbɛ́i ni kɛ vidioi kɛ saji woɔ soshia media nɔ lɛ amɛyeɔ kwraa fe maŋkwralɔi lɛ.”​—The Korea Times, January 22, 2024.

Ani wɔbaanyɛ wɔhe wɔye akɛ maŋkwralɔi lɛ baahã wɔná shihilɛ kpakpa wɔsɛɛ? Namɔ wɔbaanyɛ wɔhe wɔye?

Kaahe mɔ fɛɛ mɔ oye kɛkɛ

Ehi akɛ mɛi baakwɛ jogbaŋŋ yɛ mɛi ni amɛheɔ amɛyeɔ lɛ ahe. Biblia lɛ kɛɛ “mɔ ni jwɛŋmɔ esako lɛ heɔ wiemɔ fɛɛ wiemɔ eyeɔ, shi hiɛtɛ̃lɔ kwɛɔ enajifaamɔi jogbaŋŋ.”​—Abɛi 14:15.

• Kɛ́ ootao ona nɔ ni baaye abua bo ni ole kɛji sane ko ja loo ejaaa lɛ, kanemɔ sane ni ji “Buu Ohe Kɛje Saji Ni Ejaaa Lɛ Ahe.”

Kɛfata he lɛ, maŋkwralɔi ni hiɛ yiŋtoo kpakpa ni yeɔ anɔkwa lɛ po nyɛŋ afee nibii fɛɛ ni amɛmiisumɔ ni amɛfee lɛ. Enɛ hewɔ lɛ Biblia lɛ bɔɔ wɔ kɔkɔ akɛ:

• “Nyɛkɛ nyɛhiɛ akafɔ̃a lumɛi anɔ, loo gbɔmɔ bi ko, ni yiwalaheremɔ ko bɛ edɛŋ lɛ nɔ.”​—Lala 146:3.

Hiɛnyiɛlɔ ni obaanyɛ ohe lɛ oye

Biblia lɛ tsɔɔ akɛ Nyɔŋmɔ ehala Yesu Kristo akɛ hiɛnyiɛlɔ ni sa jogbaŋŋ ni abaanyɛ ahe lɛ aye hu. (Luka 1:32, 33) Yesu ji Nyɔŋmɔ Maŋtsɛyeli lɛ nɔ Maŋtsɛ, ni maŋtsɛyeli nɛɛ yeɔ nɔ kɛjɛɔ ŋwɛi.​—Mateo 6:10.

• Kasemɔ koni ole nɔ hewɔ ni obaanyɛ ohe Yesu oye kɛ nɔ ni ebaafee koni etsu naagbai ni wɔkɛkpeɔ lɛ he nii. Kanemɔ saji ni ji “Namɔ Ji Nyɔŋmɔ Maŋtsɛyeli Lɛ Nɔ Maŋtsɛ?” kɛ “Mɛni Nyɔŋmɔ Maŋtsɛyeli Lɛ Baatsu?”