Bɔ Ni Obaafee Oná Yesu Afɔleshãa Lɛ He Sɛɛ
Shi kome yɛ daa afi mli lɛ, Yehowa Odasefoi kɛ mɛi akpekpei abɔ ni amɛfɔ̃ɔ amɛ nine lɛ feɔ ekome kɛkpeɔ yɛ je lɛŋ hei srɔtoi fɛɛ kɛyeɔ Yesu gbele lɛ Kaimɔ gbi jurɔ lɛ, taakɛ Yesu fã ni afee lɛ. (Luka 22:19) Nifeemɔ nɛɛ yeɔ ebuaa wɔ ni wɔhiɛ sɔɔ bɔ ni Yesu kɛ ewala bashã afɔle ehã adesai lɛ waa. Kɛfata he lɛ, eyeɔ ebuaa wɔ ni wɔnaa bɔ ni afɔle ni ekɛ ewala shã ehã wɔ lɛ baanyɛ aná wɔshihilɛ nɔ hewalɛ bianɛ kɛ wɔsɛɛ fɛɛ.—Yohane 3:16.
Kɛ́ onyɛ otee Kaimɔ lɛ nyɛsɛɛ nɛɛ jio, oyanyɛɛɛ oya jio lɛ, mɛni esa akɛ ofee koni onyɛ oná gbo ni Yesu bagbo ekɛshã afɔle ehã adesai lɛ he sɛɛ? Yesu tsɔɔ nibii enyɔ komɛi ni he hiaa waa ni esa akɛ wɔfee:
1. Kasemɔ Nyɔŋmɔ kɛ Yesu he nii. Yesu sɔle ekɛɛ etsɛ ni yɔɔ ŋwɛi lɛ akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.”—Yohane 17:3.
2. Okɛ nibii ni okaseɔ lɛ atsu nii. Yesu ma nɔ mi akɛ, esa akɛ wɔkɛ nibii ni etsɔɔ lɛ atsu nii yɛ wɔshihilɛ mli loo wɔhi shi yɛ naa. Akɛ nɔkwɛmɔnɔ lɛ, be ni eeba e-Gɔŋ nɔ Shiɛmɔ ni ehé gbɛ́i waa lɛ naagbee lɛ, ejie mɔ fɛɛ mɔ ni ‘nuɔ lɛ, Yesu lɛ wiemɔi lɛ ni ekɛtsuɔ nii’ lɛ yi. (Luka 6:46-48) Nakai nɔŋŋ be kroko hu lɛ ewie akɛ: “Kɛji nyɛle nibii nɛɛ ni nyɛkɛtsu nii lɛ, nyɛyɛ miishɛɛ.”—Yohane 13:17.
Ani obaasumɔ ni ole Nyɔŋmɔ kɛ Yesu he nibii krokomɛi? Ani ootao oná ŋaawoi ni baaye abua bo koni onyɛ okɛ nibii ni okaseɔ lɛ atsu nii loo ohi shi yɛ naa? Naa nibii komɛi ni baanyɛ aye abua bo.
Biblia mli nikasemɔ
Biblia mli nikasemɔ ni wɔkɛ mɛi feɔ tamɔ sanegbaa ni wɔheee nɔ ko lɛ eye ebua mɛi babaoo ni amɛle nibii ni Biblia lɛ tsɔɔ, ni amɛkɛtsuɔ nii yɛ amɛshihilɛ mli.
Yaa wɛbsaiti nɛɛ nɔ fã ni ji Biblia Kasemɔ Ni Mɔ Ko Baawa Bo lɛ koni ole Biblia mli nikasemɔ nɛɛ he saji krokomɛi.
Kwɛmɔ vidio ni ji Okɛ Biblia Mli Nikasemɔ Jurɔ lɛ koni ona bɔ ni Yehowa Odasefoi kɛ mɛi kaseɔ Biblia lɛ amɛhãa.
Kpeei ni Yehowa Odasefoi feɔ
Daa otsi lɛ, Yehowa Odasefoi kpeɔ shii enyɔ yɛ amɛjamɔhe ko ni atsɛɔ lɛ Maŋtsɛyeli Asa lɛ nɔ. Kɛ́ wɔtee kpeei nɛɛ, wɔkaseɔ Biblia lɛ ni atsɔɔ wɔ bɔ ni wɔkɛ nibii ni wɔkaseɔ lɛ baatsu nii yɛ wɔshihilɛ mli.
Mɔ fɛɛ mɔ yɛ hegbɛ akɛ ebaa kpee nɛɛ eko; jeee ja Yehowa Odasefonyo ji bo dani obaanyɛ oba kpee nɛɛ eko. Bɔ ni shihilɛ lɛ yɔɔ yɛ he ni oyɔɔ lɛ baatsɔɔ kɛji oya kpee lɛ hiɛ kɛ hiɛ yɛ Maŋtsɛyeli Asa lɛ nɔ loo otsɔ videoconference nɔ okɔnɛti.
Kwɛmɔ vidio ni ji Mɛni Yaa Nɔ Yɛ Maŋtsɛyeli Asa Lɛ Nɔ? lɛ koni ona bɔ ni nibii baaya lɛ ahã kɛ́ otee kpeei nɛɛ.
Yaa wɛbsaiti nɛɛ nɔ fã ni ji Asafoŋ Kpeei Ni Yehowa Odasefoi Feɔ lɛ kɛtao he ko ni bɛŋkɛ bo ni afeɔ kpeei nɛɛ yɛ.
Saji kɛ vidioi ni yɔɔ wɔwɛbsaiti lɛ nɔ
Saji kɛ vidioi babaoo ni yɔɔ wɛbsaiti nɛɛ nɔ lɛ baanyɛ aye abua bo ko ni ole Yesu tsɔɔmɔi lɛ, kɛ ewala ni ekɛshã afɔle lɛ he saji babaoo.
Akɛ nɔkwɛmɔnɔ lɛ, kɛ́ ootao ole bɔ ni mɛi akpekpei babaoo baanyɛ aná mɔ kome gbele he sɛɛ lɛ, kanemɔ saji ni ji “Mɛɛ Gbɛ Nɔ Yesu Hereɔ Mɛi Ayiwala?” kɛ “Mɛni Hewɔ Yesu Na Amanehulu Ni Egbo Lɛ?” loo kwɛmɔ vidio ni ji Mɛni Hewɔ Yesu Gbo? lɛ.