Aafite Shikpɔŋ Lɛ​—Mɛni Biblia Lɛ Kɛɔ Yɛ He?

“Nibii komɛi ni adesai feɔ lɛ baahã etsɛŋ kwraa lɛ, kɔɔyɔɔŋ tsakemɔ kɛ mɛi awala awo oshara wuji amli. Nu baashiu maŋtiasei wuji. Kɔɔyɔɔŋ baadɔ yɛ hei komɛi bɔ ni anako enɔ dã. Nugbɔ baanɛ gbeyeigbeyei yɛ hei komɛi. Nuhɔmɔ baaba yɛ hei pii. Abaabule tsei kɛ kooloi henɔi srɔtoi akpekpei abɔ ashishi. Enɛ jeee sane ko ni aafo aatã loo aawo he. Eji nɔ ko ni jeŋ shikpámɔ ema nɔ mi akɛ ebaaba, kɛ́ nɔyelii tsakeee gbɛ nɔ ni amɛtsɔɔ amɛnáa petro, gaasi, ilɛktrisiti kɛ amɛhenɔi lɛ.”​—Wiemɔ ni António Guterres, ni eji Jeŋmaji Ekomefeemɔ lɛ sɛinɔtalɔ lɛ hã yɛ amaniɛbɔɔ ko ni kuu ko ni atsɛɔ lɛ Intergovernmental Panel on Climate Change lɛ kɛhã yɛ April 4, 2022 lɛ he.

“Jeŋ Shikpálɔi ebɔ kɔkɔ akɛ kɛ́ akwɛɛɛ ni ahi lɛ, yɛ afii fioo ni kã wɔhiɛ nɛɛ amli lɛ, kɔɔyɔɔŋ tsakemɔ baafite national park srɔtoi 423 ni yɔɔ United States lɛ fɛɛ, ejaakɛ kɛ́ kɔɔyɔɔ lɛ mli dɔ waa lɛ ebaanyɛ efite paaki srɔtoi nɛɛ. Nibii gbohii ni baanyɛ aba yɛ kɔɔyɔɔŋ tsakemɔ nɛɛ hewɔ lɛ, tamɔ amanehului ni awie he yɛ Biblia lɛ mli lɛ: la kɛ nugbɔ ni nɛɔ waa ni fiteɔ nii, nu hiɛ aisi ni miisere, ŋshɔ ni miiyi fe nine, kɛ jeŋ dɔlɛ ni naa wa.”​—“Flooding Chaos in Yellowstone, a Sign of Crises to Come,” The New York Times, June 15, 2022.

Ani abaanyɛ aná shikpɔŋ ni afiteɔ lɛ naa tsabaa? Kɛ́ nakai ni lɛ, namɔ baanyɛ aná enaa tsabaa? Naa nɔ diɛŋtsɛ ni Biblia lɛ kɛɔ yɛ he.

Biblia lɛ gba akɛ abaafite shikpɔŋ lɛ

Biblia lɛ gba akɛ Nyɔŋmɔ ‘baafite mɛi ni fiteɔ shikpɔŋ lɛ.’ (Kpojiemɔ 11:18) Ŋmalɛ nɛɛ tsɔɔ wɔ nibii etɛ komɛi:

1. 1. Adesai baafee nibii ni baafite shikpɔŋ lɛ waa.

2. 2. Shikpɔŋ ni afiteɔ lɛ sɛɛ baafo.

3. 3. Nyɔŋmɔ ji mɔ ni yɔɔ shikpɔŋ lɛ ni aafite lɛ naa tsabaa, jeee gbɔmɛi.

Bɔ fɛɛ bɔ ni fee lɛ, wɔsɛɛ lɛ nibii baahi yɛ shikpɔŋ lɛ nɔ

Biblia lɛ kɛɛ, “shikpɔŋ lɛ yɛ kɛmiiya naanɔ.” (Jajelɔ 1:4) Gbɔmɛi, kooloi, kɛ tsei baaya nɔ ahi nɔ be fɛɛ be.

• “Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”​—Lala 37:29.

Abaasaa wɔshikpɔŋ lɛ jogbaŋŋ ekoŋŋ.

• “Ŋa kɛ shikpɔŋ gbiŋ baanya, ni ŋa kpataa mii baashɛ ehe, ni ebaagba afoforo tamɔ safron fɔfɔi.”​—Yesaia 35:1.