Mɛni Biblia Lɛ Kɛɔ Yɛ Oweletɔɔ He?
Hetoo ni Biblia lɛ kɛhãa
Eyɛ mli akɛ mɔ ko baanyɛ enu he akɛ eyɛ hegbɛ akɛ etɔɔ owele moŋ nɛ, shi nakai feemɔ teɔ shi ewoɔ ŋaa ni Biblia lɛ woɔ akɛ: “Kaakɛɛ akɛ: “Mafee lɛ tamɔ bɔ ni efee mi lɛ; mato lɛ nɔ ni efee mi lɛ najiaŋ.” (Abɛi 24:29) Ŋaawoi komɛi yɛ Biblia lɛ mli ni eye ebua mɛi babaoo ni amɛwo amɛhe ŋaa akɛ, amɛtɔŋ owele dɔŋŋ.
Nɔ ni abaasusu he yɛ sane nɛɛ mli
Mɛni hewɔ eji tɔ̃mɔ akɛ obaatɔ owele lɛ?
Kɛ́ mɔ ko tɔ̃ onɔ loo eye bo awui lɛ, ewaaa akɛ omli baafu ni obaasumɔ ni agbala mɔ lɛ toi yɛ nɔ ni efee lɛ hewɔ. Kɛ̃lɛ, akɛ obaafee mɔ lɛ eko otse loo obaatɔ owele lɛ, ekɛ nɔ ni Biblia lɛ kɛɔ lɛ kpãaa gbee. Mɛni hewɔ?
Kɛ́ mɛi tɔ amɛhe owele lɛ, Nyɔŋmɔ náaa he miishɛɛ. Yehowaa wie yɛ Biblia lɛ mli akɛ: “Minɔ ji oweletɔɔ lɛ; mi mato najiaŋ.” (Romabii 12:19) Biblia lɛ woɔ mɛi ni atɔ̃ amɛnɔ loo akɛ amɛyeee jogbaŋŋ lɛ ŋaa akɛ, kɛ́ ebaahi lɛ amɛfee bɔ fɛɛ bɔ ni amɛbaanyɛ ni amɛtsɔ toiŋjɔlɛ gbɛi anɔ amɛtsu naagba lɛ he nii, moŋ fe ni amɛbaatɔ owele. (Romabii 12:18) Shi kɛ́ atɔ̃ mɔ ko nɔ, ni mɔ tsɔ toiŋjɔlɛ gbɛi fɛɛ anɔ akɛ ebaatsu naagba lɛ he nii shi eyahiii feemɔ loo gbɛ ko bɛ ni ebaatsɔ nɔ efee nakai lɛ, mɛni esa akɛ efee? Biblia lɛ woɔ wɔ ŋaa ni wɔná hekɛnɔfɔ̃ɔ akɛ Yehowa baatsu jalɛsane ni ayeee fɛɛ ahe nii.—Lala 42:10, 11.
Mɛɛ gbɛ nɔ Nyɔŋmɔ hãa agbalaa mɛi atoi?
Ŋmɛnɛ lɛ, Nyɔŋmɔ ŋmɛɔ adesai anɔyelii gbɛ koni amɛgbala efɔŋfeelɔi atoi. (Romabii 13:1-4) Wɔsɛɛ lɛ, Yehowa baakojo mɛi fɛɛ ni feɔ yiwalɛ nii loo nibii ni ehiii lɛ, ni ebaajie piŋmɔ kɛje shihilɛ mli kwraa.—Yesaia 11:4.
Te mafee tɛŋŋ maye henumɔ ni mináa akɛ esa akɛ matɔ owele lɛ nɔ?
Kaafee nɔ ko be ni omli efu. (Abɛi 17:27) Mɛi ni kɛ mlifu tsuɔ saji ahe nii lɛ, sɛɛ mli lɛ, amɛshwaa amɛhe. Shi mɛi ni toɔ amɛtsui shi kɛsusuɔ nii ahe dani amɛfeɔ nɔ ko lɛ, bei pii lɛ, amɛkpɛɔ yiŋ ni ja jogbaŋŋ.—Abɛi 29:11.
Taomɔ anɔkwale ni yɔɔ sane lɛ mli. (Abɛi 18:13) Ebaahi jogbaŋŋ akɛ mɔ ni atɔ̃ enɔ lɛ baabi ehe akɛ, ‘Ani eenyɛ eba akɛ yiŋtoi komɛi ahewɔ mɔ lɛ fee nɔ ni efee lɛ, shi mi ni mileee? Ani mɔ lɛ kɛ nɔnyɛɛ ko miikpe? Aloo efee nakai be mli ni ehiɛ bɛ ehe nɔ?’ Bei komɛi lɛ, wɔbaasusu akɛ mɔ ko je gbɛ etɔ̃ wɔnɔ, shi ekolɛ, ejeee gbɛ ni efee.
Susumɔi ni ejaaa ni ahiɛ yɛ oweletɔɔ he
Susumɔ ni ejaaa: Be ni Biblia lɛ kɛɛ, akɛ “hiŋmɛi ato hiŋmɛi najiaŋ” lɛ, no mli lɛ eetsɔɔ akɛ esa akɛ wɔtɔ owele.—3 Mose 24:20, Contemporary English Version.
Anɔkwa sane: Mla ni akɛhã blema Israelbii lɛ ni tsɔɔ akɛ, akɛ “hiŋmɛi ato hiŋmɛi najiaŋ” lɛ ejieee yi akɛ kɛ́ afee mɔ ko nɔ ko lɛ, mɔ lɛ diɛŋtsɛ atɔ owele. Moŋ lɛ, mla nɛɛ ye ebua kojolɔi lɛ koni amɛgbala efɔŋfeelɔ lɛ toi bɔ ni sa efɔŋfeelɔ lɛ, yɛ nɔ ni efee lɛ naa.b—5 Mose 19:15-21.
Anɔkwa sane: Kɛ́ atutua mɔ ko lɛ, mɔ lɛ yɛ hegbɛ ni efãa ehe loo ebiɔ yelikɛbuamɔ yɛ amralo lɛ dɛŋ. Kɛ̃lɛ, Biblia lɛ kɛɛ, wɔfee bɔ fɛɛ bɔ ni wɔbaanyɛ koni wɔkɛ mɔ ko akanɔ.—Abɛi 17:14.
a Yehowa ji Nyɔŋmɔ gbɛ́i, taakɛ ejeɔ kpo yɛ Biblia lɛ mli lɛ.