Bɔ Ni Obaafee Onu Nɔkwɛmɔnii Ni Yɔɔ Biblia Lɛ Mli Lɛ Ashishi

Bei pii lɛ, Biblia lɛ kɛ nɔkwɛmɔnii tsuɔ nii koni wɔnyɛ wɔnu sane ko shishi. Kɛ̃lɛ, mɛi pii nuuu nɔkwɛmɔnii nɛɛ ashishi. (Mat. 13:13) No hewɔ lɛ, mɛni baanyɛ aye abua bo ni onu nɔkwɛmɔnii ni yɔɔ Biblia lɛ mli lɛ ashishi jogbaŋŋ? Kaa nibii ni nyiɛ sɛɛ nɛɛ okwɛ:

• Taomɔ sane titri ni awieɔ he lɛ kɛ nɔ ni akɛtoɔ he lɛ. Akɛ nɔkwɛmɔnɔ lɛ, Kpojiemɔ 3:3 lɛ kɛ bɔ ni Yesu baaba lɛ (sane titri ni awieɔ he lɛ) to bɔ ni julɔ baa he (nɔ ni akɛtoɔ he lɛ).

• Susumɔ tsakpaa ni yɔɔ sane titri ni awieɔ he lɛ, kɛ nɔ ni akɛtoɔ he lɛ teŋ. Kwɛmɔ akɛ obaana nɔ hewɔ ni akɛ sane ko miito nɔ ko he kɛ tsakpaa ni yɔɔ sane lɛ kɛ nɔ ni akɛtoɔ he lɛ teŋ.

• Bɔɔ mɔdɛŋ akɛ nɔ ni okase lɛ kɛ oti ni yɔɔ nɔkwɛmɔnii ni akɛtsu nii lɛ mli lɛ kpãa gbee. Bei pii lɛ, tsakpaa ni yɔɔ sane ni awieɔ he lɛ kɛ nɔkwɛmɔnii ni akɛtsu nii lɛ teŋ lɛ baanyɛ ahã omu sane naa yɛ gbɛ ni ejaaa nɔ. Yɛ nɔkwɛmɔnɔ ni wɔwie he kɛtsɔ hiɛ lɛ mli lɛ, Yesu etsɔɔɔ akɛ eeba ebaju diɛŋtsɛ. Moŋ lɛ, nɔ ni etsɔɔ ji akɛ, bɔ ni julɔ baa be ni mɔ ko kpaaa lɛ gbɛ lɛ, nakai nɔŋŋ lɛ hu ebaaba be ni mɔ ko kpaaa lɛ gbɛ. Yesu etsɔɔɔ be tuuntu ni ebaaba.