Benaia—Feemɔ Ekãa Ni Oye Anɔkwa Tamɔ Lɛ

Benaia ji tawulɔ ni yɔɔ ekãa waa, ni esɔmɔ Maŋtsɛ David, ni sɛɛ mli lɛ, esɔmɔ Maŋtsɛ Solomon hu. Benaia papa lɛ, osɔfo ni. No mli lɛ, efɔɔɔ kaa akɛ osɔfoi kɛ Levibii baaya ta, aahu ni amɛbaakase bɔ ni akɛ tawuu nii tsuɔ nii ahãa. Shi Benaia tee ta ni ekɛ tawuu nii hu tsu nii. Nibii komɛi ni efee lɛ hãa wɔnaa akɛ eyɛ ekãa waa. Akɛ nɔkwɛmɔnɔ lɛ, be ko lɛ, ebote nubu ko mli ni eyagbe jata. Be ko hu lɛ, ekɛ nuu ko ni kwɔ ni ti waa lɛ nɔ, ni egbe lɛ. David he Benaia eye aahu akɛ, ehala lɛ koni ekwɛ mɛi ni buɔ ehe lɛ anɔ.—2 Sam. 23:​20-23.

Be ni Absalom kɛ Adonia tse David hiɛ atua lɛ, Benaia tee nɔ ekpɛtɛ David ni eye lɛ anɔkwa. (2 Sam. 8:18; 15:18; 1 Maŋ. 1:8) Yɛ David gbɔlɛ beiaŋ be ni eetao awó Solomon maŋtsɛ lɛ, Benaia fata mɛi ni ye ebua lɛ ni enyɛ efee nakai lɛ ahe. (1 Maŋ. 1:​32-40) Benaia tseee mɛi ni Yehowa ehala koni amɛnyiɛ emaŋ lɛ hiɛ lɛ ahiɛ atua, tamɔ mɛi komɛi fee lɛ. Moŋ lɛ, eye amɛ kɛ Yehowa, mɔ ni hala amɛ lɛ, fɛɛ anɔkwa.

Wɔ hu ehe miihia ni wɔná ekãa koni wɔnyɛ wɔwu wɔshi Satan kɛ esɛɛnyiɛlɔi lɛ. Agbɛnɛ hu, esa akɛ wɔtswa wɔfai shi akɛ, wɔbaahi shi bɔ ni sa Yehowa hiɛ. (Efe. 6:11; 1 Pet. 5:​8, 9) Ni kɛ́ mɔ ko ni wɔle lɛ kpa Yehowa sɔɔmɔ po lɛ, wɔ lɛ, wɔkpaŋ. Moŋ lɛ, wɔbaaya nɔ wɔye Yehowa anɔkwa, ejaakɛ wɔle akɛ, kɛ́ wɔfee nakai lɛ, Yehowa baajɔɔ wɔ.—2 Sam. 22:26.