Obadia—Esa Akɛ Wɔshe Nyɔŋmɔ Gbeyei Tamɔ Lɛ

Biblia lɛ wie nuu ko ni atsɛɔ lɛ Obadia lɛ he. No mli lɛ, lɛ ekwɛɔ Maŋtsɛ Ahab ni yitsoŋ wa waa lɛ shĩabii lɛ anɔ. Ahab ŋmɛ gbɛ ni nibii gbohii ni afeɔ yɛ Baal jamɔ mli lɛ he shi waa yɛ Israel. Fɛɛ sɛɛ lɛ, Obadia she Yehowa gbeyei “kɛjɛ egbekɛbiiashi tɔ̃ɔ.” (1 Maŋ. 18:​1-13) No hewɔ lɛ, be ni Maŋnyɛ Yezebel fã akɛ agbe Yehowa gbalɔi lɛ fɛɛ lɛ, Obadia na akɛ esa akɛ efee ekãa ni efee nɔ ko kɛhere amɛyiwala. Obadia le akɛ, kɛ́ ekɛ Yehowa gbalɔ kome po to ni amɔ lɛ lɛ, abaagbe lɛ. Shi fɛɛ sɛɛ lɛ, ekɛ gbalɔi 100 sɔŋŋ to! No mli lɛ, hɔmɔ ko ni naa wa waa eba maŋ lɛ mli, ni no hewɔ lɛ, eyahãa amɛ niyenii hu. Be ni Obadia tsuɔ nibii nɛɛ fɛɛ lɛ, ehe bahia ni ekwɛ jogbaŋŋ koni amale gbalɔi ohai abɔ ni sɔmɔɔ Ahab kɛ Yezebel lɛ akana lɛ.—1 Maŋ. 18:19.

Mɛni wɔbaanyɛ wɔkase yɛ nuu ni sheɔ Nyɔŋmɔ gbeyei nɛɛ dɛŋ? Eyɛ mli akɛ Obadia sheɔ Ahab gbeyei moŋ, shi esheɔ Nyɔŋmɔ gbeyei kwraa fe Ahab. Enɛ ji nɔ ni hã efee ekãa ni ekɛ ewala wo oshãra mli kɛhere gbalɔi lɛ ayiwala lɛ. Wɔ hu esa akɛ wɔshe Yehowa gbeyei waa, titri lɛ, kɛ́ atsĩ asafo lɛ naa yɛ he ni wɔyɔɔ lɛ. Kɛ́ wɔsheɔ Yehowa gbeyei lɛ, no baaye abua wɔ ni wɔfee ekãa ni wɔye wɔbua wɔnyɛmimɛi ni awaa amɛ yi lɛ.