Sanebimɔi Ni Jɛ Kanelɔi Adɛŋ

Mɛɛ be jeŋmaji lɛ baakɛɛ akɛ “Toiŋjɔlɛ kɛ shweshweeshwe”?

Tamɔ wɔna yɛ “Sanebimɔi Ni Jɛ Kanelɔi Adɛŋ” ni yɔɔ November 2025 Buu-Mɔɔ lɛ mli lɛ, etsɛŋ, Yehowa kɛ “eyiŋtoo” baawo “akolontoi nyɔŋma” lɛ, ni ji, nɔyelii fɛɛ ni yɔɔ je lɛ mli lɛ atsui mli. Ahã wɔle akɛ, ‘yiŋtoo’ nɛɛ ji, ni amɛkɛ amɛhewalɛ kɛ amɛhegbɛ lɛ ahã ‘kooloo awuiyelɔ ni tsuɔ waa’ lɛ, ni ji, Jeŋmaji Ekomefeemɔ lɛ. Kooloo awuiyelɔ ni tsuɔ waa nɛɛ nɔŋŋ ji “kooloo awuiyelɔ lɛ amaga lɛ.” (Kpo. 13:​14, 15; 17:​3, 16, 17) No sɛɛ lɛ, “akolontoi nyɔŋma” lɛ kɛ kooloo awuiyelɔ ni tsuɔ waa lɛ baakpãtã amale jamɔi fɛɛ ni yɔɔ je lɛ mli lɛ ahiɛ. Ani jeŋmaji lɛ baakɛɛ akɛ, “Toiŋjɔlɛ kɛ shweshweeshwe”a dani amɛbaakpãtã amale jamɔi fɛɛ ahiɛ, aloo amɛbaakpãtã amale jamɔi fɛɛ ahiɛ dani amɛbaakɛɛ akɛ, “Toiŋjɔlɛ kɛ shweshweeshwe”?—1 Tes. 5:3.

Yɛ kukufoo mli lɛ, wɔleee be tuuntu ni jeŋmaji lɛ baakɛɛ, “Toiŋjɔlɛ kɛ shweshweeshwe.” Eji wɔle kulɛ, ehe ehiaaa ni wɔhãa wɔhiɛ hiɔ wɔhe nɔ yɛ naagbee lɛ he. Shi tamɔ wɔle lɛ, Yesu wie shii abɔ akɛ, ehe baahia ni esɛɛnyiɛlɔi lɛ ‘aya nɔ abu.’ (Mat. 24:42; 25:13; 26:41) Agbɛnɛ, hã wɔpɛi nɔ ni Yehowa tsɔ bɔfo Paulo nɔ egba yɛ jeŋmaji lɛ ahe lɛ mli jogbaŋŋ wɔkwɛ.

Paulo gba akɛ: “Be mli ni amɛbaakɛɛ akɛ, ‘Toiŋjɔlɛ kɛ shweshweeshwe!’ lɛ, no mli nɔŋŋ ni hiɛkpatamɔ baabati amɛ shi trukaa.” (1 Tes. 5:​2, 3) Be ko ni eho lɛ, kɛ́ wɔmiigbala sane nɛɛ mli yɛ wɔwoji lɛ amli lɛ, wɔwieɔ akɛ, kɛ́ jeŋmaji lɛ kɛɛ, “Toiŋjɔlɛ kɛ shweshweeshwe” lɛ, no sɛɛ nɔŋŋ lɛ, amɛbaakpãtã Babilon Kpeteŋkpele lɛ hiɛ, ni no baatsɔɔ akɛ amanehulu kpeteŋkpele lɛ eje shishi. No hewɔ lɛ, wɔyanu shishi akɛ, kɛɛmɔ ni jeŋmaji lɛ baakɛɛ akɛ “Toiŋjɔlɛ kɛ shweshweeshwe” lɛ ni baahã wɔna akɛ amanehulu kpeteŋkpele lɛ yaaje shishi.

Shi be ni wɔsusu sane nɛɛ he ni wɔtao mli ekoŋŋ lɛ, wɔna akɛ, wɔnyɛŋ wɔwie doo akɛ nɛkɛ ji bɔ ni nibii baaya lɛ. Ekolɛ jeŋmaji lɛ baakpãtã Babilon Kpeteŋkpele lɛ hiɛ, dani amɛbaakɛɛ akɛ “Toiŋjɔlɛ kɛ shweshweeshwe!” Mɛni hewɔ wɔkɛɔ nakai? Naa yiŋtoi etɛ ahewɔ.

Amale jamɔ hɔ tai pii ni awu yɛ je lɛ mli lɛ asɛɛ. Biblia lɛ kɛɔ akɛ: “Emli [ni ji, “ashawo kpeteŋkpele lɛ,” loo Babilon Kpeteŋkpele lɛ mli] ana . . . mɛi fɛɛ ni agbe yɛ shikpɔŋ lɛ nɔ lɛ alá lɛ yɛ.” (Kpo. 17:​1, 5; 18:24) Kɛjɛ blema aahu kɛbashi ŋmɛnɛ lɛ, tai ni awuɔ yɛ je lɛ mli lɛ pii yɛ ni amale jamɔ he yɛ mli eko, ni kɛ́ aaye awui loo aashwie lá shi yakatswaa ni obote mli lɛ, bei pii lɛ, obaana akɛ amale jamɔ ni hɔ sɛɛ. Yɛ kukufoo mli lɛ, amale jamɔ hãaa mɛi ahi shi yɛ toiŋjɔlɛ mli ni amɛfee shweshweeshwe. Moŋ lɛ, ehã aawu tai babaoo ni aaye mɛi awui. No hewɔ lɛ, eyɛ mli akɛ wɔnyɛŋ wɔwie kɛ nɔmimaa moŋ, shi ebaanyɛ eba lɛ akɛ, jeŋmaji lɛ baakpãtã Babilon Kpeteŋkpele lɛ hiɛ dani amɛbaakɛɛ akɛ, “Toiŋjɔlɛ kɛ shweshweeshwe.”

Nɔ ni baaba kɛ́ jeŋmaji lɛ kɛɛ “Toiŋjɔlɛ kɛ shweshweeshwe!” Paulo wie akɛ, kɛ́ jeŋmaji lɛ kɛɛ “Toiŋjɔlɛ kɛ shweshweeshwe” lɛ, “no mli nɔŋŋ ni hiɛkpatamɔ baabati amɛ shi trukaa.” (1 Tes. 5:3) No hewɔ lɛ, etamɔ nɔ ni kɛ́ jeŋmaji lɛ kɛɛ akɛ “Toiŋjɔlɛ kɛ shweshweeshwe” lɛ, be eshwieŋ mli kwraa ni abaakpãtã amɛhiɛ. Shi kɛ́ amɛbaakɛɛ “Toiŋjɔlɛ kɛ shweshweeshwe” dani amɛyakpãtã Babilon Kpeteŋkpele lɛ hiɛ lɛ, no lɛ, be baashwie mli. No hewɔ lɛ, etamɔ nɔ ni amɛbaakpãtã Babilon Kpeteŋkpele lɛ hiɛ dani amɛbaakɛɛ akɛ, “Toiŋjɔlɛ kɛ shweshweeshwe.”

Bɔ ni Yehowa webii lɛ baafee amɛnii amɛhã kɛ́ jeŋmaji lɛ kɛɛ “Toiŋjɔlɛ kɛ shweshweeshwe!” Paulo wie akɛ: “Nyɛmimɛi, nyɛ lɛ, nyɛbɛ duŋ mli ni gbi lɛ baabati nyɛ shi tamɔ bɔ ni jetsɛremɔ batiɔ julɔi ashi lɛ.” (1 Tes. 5:4) Kɛ́ jeŋmaji lɛ kpãtã Babilon Kpeteŋkpele lɛ hiɛ dani amɛkɛɛ, “Toiŋjɔlɛ kɛ shweshweeshwe” lɛ, no lɛ, Yehowa webii baana faŋŋ akɛ, jeŋmaji lɛ ahiɛkpatamɔ lɛ eshɛ etã. Shi jeŋmaji lɛ enaŋ lɛ nakai. No hewɔ lɛ, hiɛkpatamɔ lɛ baati amɛ shi trukaa tamɔ julɔ.

No hewɔ lɛ, bianɛ lɛ, te wɔmuɔ sane lɛ naa tɛŋŋ? Wɔle akɛ etsɛŋ, “akolontoi nyɔŋma” lɛ kɛ amɛhewalɛ kɛ amɛhegbɛ lɛ baahã kooloo awuiyelɔ ni tsuɔ waa lɛ. Kɛkɛ lɛ, amɛkɛ kooloo awuiyelɔ lɛ efee ekome kɛkpãtã amale jamɔi fɛɛ ni yɔɔ je lɛ mli lɛ ahiɛ. Enɛ ji nɔ ni baatsɔɔ akɛ amanehulu kpeteŋkpele lɛ eje shishi. Wɔle hu akɛ, kɛ́ eshɛ he ko lɛ, jeŋmaji lɛ baakɛɛ akɛ, “Toiŋjɔlɛ kɛ shweshweeshwe!” Shi wɔleee be tuuntu ni amɛbaakɛɛ nakai. Wɔbana akɛ, ebaanyɛ eba lɛ akɛ, (1) amɛbaakɛɛ “Toiŋjɔlɛ kɛ shweshweeshwe!” dani amɛbaakpãtã amale jamɔi lɛ ahiɛ. Aloo, (2) amɛbaakpãtã amale jamɔi lɛ ahiɛ dani amɛbaakɛɛ akɛ, “Toiŋjɔlɛ kɛ shweshweeshwe!” Kɛ́ be lɛ shɛ lɛ, nɔ fɛɛ nɔ baafee faŋŋ kɛhã wɔ. Bei pii lɛ, nakai Biblia mli gbalɛi yɔɔ; be ni amɛmiiba mli loo be ni amɛba mli amɛgbe naa dani wɔnuɔ shishi jogbaŋŋ.—Okɛto Yohane 12:16 lɛ he.

Yɛ anɔkwale mli lɛ, jeee be pɔtɛɛ ni jeŋmaji lɛ baakɛɛ akɛ “Toiŋjɔlɛ kɛ shweshweeshwe!” lɛ ji nɔ ni he hiaa waa bianɛ. Nɔ moŋ ni he hiaa ji, ni wɔbaaye Yehowa anɔkwa. No hewɔ lɛ, esa akɛ ‘wɔya nɔ wɔshi kpe ni wɔhã wɔhiɛ ahi wɔhe nɔ’ koni gbi lɛ akabati wɔ shi trukaa, ekɔɔɔ he eko bɔ ni nibii baaya lɛ ahã.—1 Tes. 5:6.