Sɔlemɔ Ohã Onyɛmimɛi Kristofoi Lɛ

1. Mɛni hãa wɔnaa akɛ Yehowa shwɛɛɛ wɔsɔlemɔi lɛ ahe kwraa?

SƆLEMƆ ji hegbɛ kpele ni Yehowa kɛdro wɔ. Bo lɛ, susumɔ enɛ he okwɛ: Yehowa kɛ nitsumɔi komɛi ewo ŋwɛibɔfoi lɛ adɛŋ. (Lala 91:11) Agbɛnɛ hu, ekɛ nitsumɔi ni he hiaa waa ewo e-Bi lɛ dɛŋ. (Mat. 28:18) Shi ani ekɛwo mɔ ko dɛŋ akɛ kɛ́ wɔsɔle lɛ ebo wɔ toi? Dabi. Ekɛ nakai nitsumɔ lɛ woko mɔ ko dɛŋ. Yehowa, “Sɔlemɔ Toibolɔ” lɛ, diɛŋtsɛ boɔ wɔsɔlemɔi lɛ toi.—Lala 65:2.

2. Mɛɛ nɔkwɛmɔnɔ kpakpa bɔfo Paulo fee yɛ sɔlemɔ he?

² Eyɛ mli akɛ wɔbaanyɛ wɔsɔle wɔhã Yehowa yɛ wɔnaagbai lɛ ahe moŋ, shi esa akɛ wɔsɔle wɔhã mɛi krokomɛi hu. Nakai pɛpɛɛpɛ bɔfo Paulo fee. Akɛ nɔkwɛmɔnɔ lɛ, eŋma wolo eyahã asafo ni yɔɔ Efeso lɛ ni ekɛɛ amɛ akɛ: “Miyaa nɔ mitsĩɔ nyɛtã yɛ misɔlemɔi amli.” (Efe. 1:16) Paulo sɔle ehã aŋkroaŋkroi hu. Akɛ nɔkwɛmɔnɔ lɛ, ekɛɛ Timoteo akɛ: “Miida Nyɔŋmɔ . . . shi, . . . ni mikpaaa bo kaimɔ yɛ fai ni mikɛ hiɛdɔɔ kpaa jenamɔ kɛ jetsɛremɔ lɛ mli.” (2 Tim. 1:3) Paulo yɛ lɛ diɛŋtsɛ enaagbai ni ebaanyɛ esɔle yɛ he. (2 Kor. 11:23; 12:​7, 8) Shi fɛɛ sɛɛ lɛ, ehe be ni esɔle ehã mɛi krokomɛi.

3. Mɛni hewɔ bei komɛi lɛ, ewa kɛhã wɔ akɛ wɔbaasɔle wɔhã mɛi krokomɛi lɛ?

³ Bei komɛi lɛ, ewa kɛhã wɔ akɛ wɔbaasɔle wɔhã mɛi krokomɛi. Mɛni hewɔ? Nyɛmi yoo ko ni atsɛɔ lɛ Sabrinaa lɛ tsɔɔ yiŋtoo kome hewɔ. Ewie akɛ: “Bianɛ lɛ, shihilɛ lɛ mli ewa waa. No hewɔ lɛ, wɔnaagbai lɛ ehe wɔjwɛŋmɔ fɛɛ ni nomɛi pɛ ahe wɔsɔleɔ yɛ.” Ani nakai eji yɛ ogbɛfaŋ? Kɛ́ nakai eji lɛ, nikasemɔ nɛɛ baaye abua bo. Ebaahã (1) ona nɔ hewɔ ni ehe miihia ni osɔle ohã mɛi krokomɛi, kɛ (2) bɔ ni obaafee ofee nakai.

MƐNI HEWƆ ESA AKƐ OSƆLE OHÃ MƐI KROKOMƐI?

4-5. Kɛ́ wɔsɔle wɔhã mɛi lɛ, mɛɛ gbɛ nɔ no baanyɛ aye abua amɛ? (Yakobo 5:16)

⁴ Kɛ́ wɔsɔle wɔhã mɛi lɛ, ebaanyɛ eye ebua amɛ. (Kanemɔ Yakobo 5:16.) Kɛ́ wɔsɔle wɔhã mɛi lɛ, ani ebaanyɛ etsu nɔ ko ehã amɛ? Hɛɛ, ebaanyɛ. Akɛ nɔkwɛmɔnɔ lɛ, no mli lɛ, Yesu le akɛ etsɛŋ bɔfo Petro baakwa lɛ, no hewɔ lɛ, esɔle ehã lɛ. Ekɛɛ lɛ akɛ: “Misɔle kɛkpa fai mihã bo koni ohemɔkɛyeli akatã.” (Luka 22:32) Paulo hu le akɛ, kɛ́ asɔle ahã mɛi lɛ, etsuɔ nii. No hewɔ lɛ, be ni awo lɛ tsuŋ yɛ Roma be ni efeko nɔ ko lɛ, eŋma wolo eyahã Filemon ni ekɛɛ lɛ akɛ: “Mihiɛ kã nɔ akɛ abaatsɔ nyɛsɔlemɔi lɛ anɔ akɛ mi ahã nyɛ ekoŋŋ.” (Flm. 22) Ni nakai pɛpɛɛpɛ eba lɛ. Etsɛɛɛ ni aŋmɛɛ Paulo he ni eyatsa eshiɛmɔ nitsumɔ lɛ nɔ.

⁵ Shi ani enɛ tsɔɔ akɛ, kɛ́ wɔ fɛɛ wɔsɔle yɛ sane pɔtɛɛ ko he wɔhã Yehowa lɛ, belɛ doo lɛ, esa akɛ etsu nɔ ko yɛ he ehã wɔ? Dabi. Kɛ̃lɛ, Yehowa kwɛɔ bɔ ni sane ni wɔsɔleɔ yɛ he lɛ kã wɔtsui nɔ waa hã, ni bei komɛi lɛ, ebaanyɛ edamɔ no nɔ ekpɛ eyiŋ akɛ ebaatsu nɔ ko yɛ he ehã wɔ. Enɛ ni wɔle lɛ baanyɛ atsirɛ wɔ ni wɔkɛ hiɛdɔɔ asɔle yɛ sane ko ni kã wɔtsui nɔ lɛ he, ni wɔná nɔmimaa akɛ, Yehowa baatsu nibii ahe nii.—Lala 37:5; 2 Kor. 1:11.

6. Kɛ́ wɔsɔle wɔhã mɛi lɛ, mɛɛ gbɛ nɔ no baanyɛ aye abua wɔ ni wɔmusuŋ atsɔ wɔ yɛ amɛhe? (1 Petro 3:8)

⁶ Kɛ́ wɔsɔle wɔhã mɛi lɛ, no baanyɛ aye abua wɔ ni wɔmusuŋ atsɔ wɔ yɛ amɛhe. (Kanemɔ 1 Petro 3:8.) Kɛ́ akɛɛ mɔ ko musuŋ tsɔɔ lɛ yɛ mɛi ahe lɛ, etsɔɔ akɛ kɛ́ ena akɛ mɔ ko miipiŋ lɛ, efeɔ nɔ ni ebaanyɛ kɛyeɔ ebuaa mɔ lɛ. (Mar. 1:​40, 41) Asafoŋ onukpa ko ni atsɛɔ lɛ Michael lɛ wie akɛ: “Kɛ́ misɔle mihã Yehowa yɛ naagbai ni nyɛmimɛi lɛ kɛkpeɔ lɛ ahe lɛ, ehãa minuɔ shihilɛ ni amɛtsɔɔ mli lɛ shishi jogbaŋŋ, ni enɛ hãa suɔmɔ ni miyɔɔ kɛhã amɛ lɛ mli waa. Ehãa wekukpaa ni yɔɔ mi kɛ amɛ teŋ lɛ hu mli waa, tsɛbelɛ amɛ lɛ, amɛleee po.” Asafoŋ onukpa ko ni atsɛɔ lɛ Richard lɛ hu tsɔɔ gbɛ kroko ni wɔnáa sɔlemɔ ni wɔsɔleɔ wɔhãa mɛi lɛ he sɛɛ. Ewie akɛ: “Kɛ́ wɔsɔle wɔhã mɔ ko lɛ, no tsirɛɔ wɔ ni wɔfee nɔ ko kɛye wɔbua mɔ lɛ.” Ewie kɛfata he akɛ: “Kɛ́ wɔfee nɔ ko kɛye wɔbua mɔ ni wɔsɔleɔ wɔhãa lɛ, yɛ gbɛ ko nɔ lɛ, wɔmiiye wɔmiibua kɛmiihã sɔlemɔ ni wɔsɔle wɔhã lɛ lɛ hetoo.”

7. Kɛ́ wɔsɔle wɔhã mɛi lɛ, mɛɛ gbɛ nɔ no yeɔ ebuaa wɔ ni wɔnáa jwɛŋmɔ ni ja yɛ wɔnaagbai lɛ ahe? (Filipibii 2:​3, 4) (Kwɛmɔ mfonirii lɛ hu.)

⁷ Kɛ́ wɔsɔle wɔhã mɛi lɛ, no baanyɛ aye abua wɔ ni wɔná jwɛŋmɔ ni ja yɛ wɔnaagbai lɛ ahe. (Kanemɔ Filipibii 2:​3, 4.) Satan Abonsam ni yeɔ je lɛ nɔ, ni enɛ hewɔ lɛ, wɔteŋ mɔ fɛɛ mɔ kɛ naagba ko kɛ̃ miikpe ŋmɛnɛ. (1 Yoh. 5:19; Kpo. 12:12) Kɛ́ be fɛɛ be lɛ, wɔsɔleɔ wɔhãa mɛi lɛ, no baahã wɔkai akɛ ‘wɔnyɛmimɛi asafo muu lɛ fɛɛ ni yɔɔ je lɛ mli lɛ hu kɛ amanehului miikpe.’ (1 Pet. 5:9) Nyɛmi yoo gbɛgbalɔ ko ni atsɛɔ lɛ Katherine lɛ wie akɛ: “Kɛ́ misɔle mihã mɛi lɛ, ehãa mikaiɔ akɛ, nyɛmimɛi krokomɛi hu kɛ naagbai miikpe. Enɛ yeɔ ebuaa mi ni mihaooo tsɔ yɛ minaagbai lɛ ahe.”

NAMƐI OBAANYƐ OSƆLE OHÃ?

8. Namɛi wɔbaanyɛ wɔsɔle wɔhã?

⁸ Namɛi wɔbaanyɛ wɔsɔle wɔhã? Wɔbaanyɛ wɔsɔle wɔhã nyɛmimɛi fɛɛ ni kɛ naagba pɔtɛɛ ko miikpe. Akɛ nɔkwɛmɔnɔ lɛ, wɔbaanyɛ wɔsɔle wɔhã nyɛmimɛi ni helai miigba amɛnaa, oblahii kɛ oblayei ni amɛskulbii yeɔ amɛhe fɛo ni amɛnyɛɔ amɛnɔ ni amɛfee nibii ni ehiii, loo nyɛmimɛi ni kɛ gbɔlɛ mli naagbai miikpe. Agbɛnɛ hu, wɔnyɛmimɛi lɛ ateŋ mɛi babaoo yɛ ni amɛwekumɛi loo amralofoi lɛ miiwa amɛ yi. (Mat. 10:​18, 36; Bɔf. 12:5) Kɛfata he lɛ, nyɛmimɛi komɛi ejo foi kɛshi amɛshĩai yɛ basabasafeemɔ ni miiya nɔ yɛ he ni amɛyɔɔ lɛ hewɔ. Nyɛmimɛi komɛi hu yɛ ni adebɔɔ naa oshãrai enina amɛ. Ekolɛ wɔleee nyɛmimɛi nɛɛ. Shi kɛ́ wɔsɔle wɔhã amɛ lɛ, no tsɔɔ akɛ wɔmiibo famɔ ni Yesu kɛhã akɛ ‘wɔsumɔsumɔɔ wɔhe’ lɛ toi.—Yoh. 13:34.

9. Mɛni hewɔ esa akɛ wɔsɔle wɔhã mɛi ni nyiɛɔ hiɛ yɛ asafo lɛ mli lɛ kɛ amɛŋamɛi lɛ?

⁹ Wɔbaanyɛ wɔsɔle wɔhã mɛi ni nyiɛɔ hiɛ yɛ Yehowa asafo lɛ mli lɛ hu. Mɛi nɛɛ ateŋ mɛi komɛi ji, Gbɛtsɔɔmɔ Kuu lɛ kɛ amɛyelikɛbualɔi, Nitsumɔhe Nine Ajinafoi Akui, mɛi ni kwɛɔ nitsumɔi srɔtoi ni atsuɔ yɛ Betel lɛ anɔ, kpokpaa nɔkwɛlɔi, asafoŋ onukpai, kɛ asafoŋ sɔɔlɔi. Nyɛmimɛi nɛɛ ateŋ mɛi babaoo kɛ naagbai miikpe, shi fɛɛ sɛɛ lɛ, amɛtsuɔ nii waa kɛyeɔ amɛbuaa wɔ. (2 Kor. 12:15) Akɛ nɔkwɛmɔnɔ lɛ, kpokpaa nɔkwɛlɔ ko ni atsɛɔ lɛ Mark lɛ wie akɛ: “Mifɔlɔi egbɔlɔ, ni amɛbɛ hewalɛ. No hewɔ lɛ, egbaa minaa waa akɛ, mi kɛ amɛ teŋ ejekɛ waa. Eyɛ mli akɛ minyɛmi yoo lɛ kɛ ewu lɛ kwɛɔ amɛ moŋ, shi edɔɔ mi waa akɛ mibɛ jɛmɛ ni maye mabua amɛ tamɔ bɔ ni mitaoɔ ni mafee lɛ.” Kɛ́ wɔle naagbai ni nyɛmimɛi nɛɛ kɛkpeɔ lɛ jio, wɔleee jio, esa akɛ wɔya nɔ wɔsɔle wɔhã amɛ. (1 Tes. 5:​12, 13) Agbɛnɛ hu, esa akɛ wɔsɔle wɔhã nyɛmimɛi nɛɛ aŋamɛi, ejaakɛ amɛyeɔ amɛbuaa amɛwumɛi lɛ ni no hãa amɛwumɛi lɛ yaa nɔ amɛtsuɔ nitsumɔi ni akɛwo amɛdɛŋ lɛ.

10-11. Kɛ́ wɔsɔle wɔhã wɔnyɛmimɛi lɛ akɛ kuu lɛ, ani Yehowa boɔ toi? Mɛni hewɔ okɛɔ nakai?

¹⁰ Tamɔ bɔ ni wɔbana lɛ, bei pii kɛ́ wɔmiisɔle lɛ, wɔsɔleɔ wɔhãa wɔnyɛmimɛi lɛ akɛ kuu. Akɛ nɔkwɛmɔnɔ lɛ, wɔsɔleɔ wɔhãa Yehowa ni eye ebua nyɛmimɛi ni awo amɛ tsuŋ lɛ loo ni eshɛje nyɛmimɛi ni agboi yɛ amɛnɔ lɛ amii ni wɔtsĩii mɔ pɔtɛɛ ko tã. Asafoŋ onukpa ko ni atsɛɔ lɛ Donald lɛ wie akɛ, “Nyɛmimɛi babaoo kɛ naagbai miikpe, ni bei komɛi lɛ, wɔsɔleɔ wɔhãa amɛ fɛɛ akɛ kuu.”

¹¹ Kɛ́ wɔsɔle wɔhã wɔnyɛmimɛi lɛ akɛ kuu lɛ, ani Yehowa boɔ toi? Hɛɛ, eboɔ toi! Wɔleee nɔ tuuntu ni he hiaa wɔnyɛmimɛi lɛ ateŋ mɔ fɛɛ mɔ, no hewɔ lɛ, naagba bɛ he kwraa akɛ wɔbaasɔle wɔhã amɛ akɛ kuu. (Yoh. 17:20; Efe. 6:18) Kɛ́ wɔfee nakai lɛ, etsɔɔ akɛ ‘wɔsumɔɔ nyɛmimɛi asafo muu lɛ fɛɛ.’—1 Pet. 2:17.

SƆLEMƆ OHÃ AŊKROAŊKROI

12. Kɛ́ wɔkɛ wɔhiɛ fɔ̃ shi lɛ, mɛɛ gbɛ nɔ no baanyɛ atsirɛ wɔ ni wɔtsĩ nyɛmimɛi komɛi agbɛ́i tã ni wɔsɔle wɔhã amɛ?

¹² Okɛ ohiɛ afɔ̃ shi. Nɔ kroko ni wɔbaanyɛ wɔfee ji, wɔbaanyɛ wɔtsĩ nyɛmimɛi komɛi agbɛ́i tã ni wɔsɔle wɔhã amɛ. Ani nyɛmi ko yɛ osafo lɛ mli ni miiye hela ko ni naa wa waa? Ani oblanyo ko loo oblayoo ko yɛ osafo lɛ mli ni nijiaŋ eje wui akɛni eskulbii lɛ miinyɛ enɔ ni efee nɔ ko ni ehiii lɛ hewɔ? Ani nyɛmi ko ni ekome ekwɛɔ ebii lɛ miimia ehiɛ ni ekwɛ amɛ “yɛ Yehowa tsɔsemɔ kɛ eŋaawoo lɛ mli”? (Efe. 6:4) Kɛ́ okɛ ohiɛ fɔ̃ shi lɛ, obaana nibii amli ni nyɛmimɛi lɛ tsɔɔ lɛ, ni no baahã onu he ohã amɛ, ni osumɔ amɛ waa. Enɛ baatsirɛ bo ni osɔle ohã amɛ.b—Rom. 12:15.

13. Mɛni baanyɛ aye abua wɔ ni wɔtsĩ nyɛmimɛi ni wɔleee amɛ po lɛ agbɛ́i tã ni wɔsɔle wɔhã amɛ?

¹³ Tsĩi mɛi krokomɛi agbɛ́i tã ni osɔle ohã amɛ. Wɔbaanyɛ wɔtsĩ nyɛmimɛi ni wɔleee amɛ po lɛ agbɛ́i tã ni wɔsɔle wɔhã amɛ. Akɛ nɔkwɛmɔnɔ lɛ, obaanyɛ otsĩ nyɛmimɛi ni awo amɛ tsuŋ yɛ hei tamɔ Crimea, Eritrea, Russia, kɛ Singapore lɛ agbɛ́i tã ni osɔle ohã amɛ. Obaanyɛ ona amɛgbɛ́i yɛ jw.org lɛ nɔ.c Kpokpaa nɔkwɛlɔ ko ni atsɛɔ lɛ Brian lɛ wie akɛ: “Kɛ́ miŋma nyɛmi ko ni awo lɛ tsuŋ lɛ gbɛ́i mifɔ̃ shi ni mitsɛ ni eje kpo yɛ minaa lɛ, no yeɔ ebuaa mi ni minyɛɔ mikaiɔ mɔ lɛ ni misɔleɔ mihãa lɛ.”

14-15. Mɛni baaye abua wɔ ni wɔna nibii pɔtɛi ni wɔbaanyɛ wɔtsĩ tã kɛ́ wɔmiisɔle wɔmiihã wɔnyɛmimɛi lɛ?

¹⁴ Tsĩi nibii pɔtɛi komɛi atã yɛ osɔlemɔ lɛ mli. Michael, ni wɔtsĩ etã yɛ kuku ekpaa lɛ mli lɛ, wie akɛ: “Kɛ́ mikane nyɛmimɛi ni awo amɛ tsuŋ lɛ ahe sane yɛ jw.org lɛ nɔ lɛ, mibɔɔ mɔdɛŋ akɛ manu he tamɔ nɔ ni mi ni awo mi tsuŋ lɛ. Mile akɛ kɛ́ mi ni awo mi tsuŋ lɛ, maye mitsui waa yɛ miŋa he, ni masumɔ ni enine ashɛ nibii fɛɛ ni he baahia lɛ lɛ nɔ. Enɛ yeɔ ebuaa mi ni kɛ́ miisɔle miihã nyɛmimɛi ni awo amɛ tsuŋ ni yɔɔ ŋamɛi lɛ, mitsĩɔ nibii pɔtɛi komɛi tã yɛ misɔlemɔ lɛ mli mihãa amɛ.”—Heb. 13:​3, shn.

¹⁵ Kɛ́ wɔsusu nibii ni wɔnyɛmimɛi ni awo amɛ tsuŋ lɛ tsɔɔ mli daa gbi lɛ ahe lɛ, no baanyɛ aye abua wɔ ni wɔna nibii pɔtɛi ni wɔbaanyɛ wɔtsĩ tã kɛ́ wɔmiisɔle wɔmiihã amɛ. Akɛ nɔkwɛmɔnɔ lɛ, wɔbaanyɛ wɔsɔle wɔhã bulɔi ni kwɛɔ amɛnɔ lɛ koni amɛkɛ amɛ aye yɛ mlihilɛ mli. Agbɛnɛ hu, wɔbaanyɛ wɔsɔle ni amralofoi lɛ aŋmɛ wɔnyɛmimɛi lɛ gbɛ ni amɛnyɛ amɛsɔmɔ Yehowa. (1 Tim. 2:​1, 2) Wɔbaanyɛ wɔsɔle ni nyɛmimɛi ni awo amɛ tsuŋ lɛ anɔkwɛmɔnɔ kpakpa lɛ awo asafoi ni yɔɔ jɛmɛ lɛ hewalɛ, loo koni mɛi ni jeee Odasefoi lɛ ana nyɛmimɛi lɛ ajeŋba kpakpa lɛ ni amɛbo sane kpakpa lɛ toi. (1 Pet. 2:12) Nakai nɔŋŋ kɛ́ wɔsusu nibii ni wɔnyɛmimɛi ni kɛ naagbai krokomɛi miikpe lɛ tsɔɔ mli daa gbi lɛ ahe lɛ, ebaaye ebua wɔ ni wɔna nibii ni wɔbaanyɛ wɔtsĩ tã kɛ́ wɔmiisɔle wɔmiihã amɛ. Kɛ́ wɔkɛ wɔhiɛ fɔ̃ shi, wɔtsĩ wɔnyɛmimɛi lɛ agbɛ́i tã ni wɔsɔle wɔhã amɛ, ni wɔtsĩ nibii pɔtɛi ni wɔbaasumɔ ni Yehowa afee ahã amɛ lɛ tã lɛ, no baatsɔɔ akɛ ‘suɔmɔ ni wɔkɛsumɔɔ wɔnyɛmimɛi lɛ fa babaoo.’—1 Tes. 3:12.

NÁ JWƐŊMƆ NI JA YƐ NIBII NI OSƆLEƆ YƐ HE LƐ AHE

16. Mɛni baaye abua wɔ ni wɔná jwɛŋmɔ ni ja yɛ sɔlemɔ he? (Mateo 6:8)

¹⁶ Wɔbana akɛ, kɛ́ wɔsɔle wɔhã wɔnyɛmimɛi lɛ, etsuɔ nii. Shi esa akɛ wɔná jwɛŋmɔ ni ja yɛ sɔlemɔ he. Kɛ́ wɔmiisɔle lɛ, esa akɛ wɔhã ehi wɔjwɛŋmɔ mli akɛ, nɔ ni wɔkɛɔ Yehowa lɛ, ele fɛɛ momo, ni wɔŋaawoo hu he ehiaaa lɛ. Kɛ́ nɔ ko he miihia nyɛmi ko lɛ, Yehowa le; be ni wɔ loo nyɛmi lɛ diɛŋtsɛ po náko ale lɛ, ele. (Kanemɔ Mateo 6:8.) Kɛ́ nakai ni lɛ, mɛni hewɔ esa akɛ wɔsɔle wɔhã mɛi krokomɛi? Yɛ nibii ni wɔsusu he yɛ nikasemɔ nɛɛ mli lɛ asɛɛ lɛ, kɛ́ wɔsɔle wɔhã mɛi lɛ, etsɔɔ akɛ wɔsusuɔ amɛhe. Wɔsumɔɔ wɔnyɛmimɛi lɛ, ni enɛ ji nɔ ni tsirɛɔ wɔ ni wɔsɔleɔ wɔhãa amɛ lɛ. Kɛ́ Yehowa na akɛ wɔsumɔɔ wɔnyɛmimɛi lɛ, emii shɛɔ ehe waa, ejaakɛ no hãa enaa akɛ wɔmiikase lɛ.

17-18. Kɛ́ wɔsɔle wɔhã wɔnyɛmimɛi Kristofoi lɛ, mɛni no tsɔɔ yɛ wɔhe? Okɛ nɔkwɛmɔnɔ ko atsɔɔ mli.

¹⁷ Kɛ́ wɔsɔle wɔhã mɛi yɛ amɛnaagbai lɛ ahe ni naagba lɛ eyaaa po lɛ, sɔlemɔ ni wɔsɔleɔ wɔhãa amɛ lɛ tsɔɔ akɛ wɔsumɔɔ amɛ, ni Yehowa naa enɛ. Naa enɛ he nɔkwɛmɔnɔ ko: Ŋɔɔ lɛ akɛ, weku ko yɛ bii bibii enyɔ; nuu kome kɛ yoo kome. Nuu lɛ kã shi ni ebɛ hewalɛ. Yoo lɛ yakɛɛ epapa akɛ: “Ofainɛ ye obua minyɛmi nuu lɛ. Ebɛ hewalɛ kwraa!” Papa lɛ miifee nɔ ko yɛ ebi lɛ lɛ hela lɛ he momo; esumɔɔ ebi lɛ lɛ ni eesumɔ ni ekwɛ lɛ jogbaŋŋ. Shi ebaaná miishɛɛ akɛ ebiyoo lɛ susuɔ enyɛmi nuu lɛ he waa ni eekpa lɛ fai ni eye ebua lɛ.

¹⁸ Tamɔ wɔna yɛ nikasemɔ nɛɛ mli lɛ, Yehowa miisumɔ ni wɔsusu wɔnyɛmimɛi lɛ ahe ni wɔsɔle wɔhã amɛ. Kɛ́ wɔfee nakai lɛ, etsɔɔ akɛ wɔsumɔɔ wɔnyɛmimɛi lɛ, amɛsane kã wɔtsui nɔ, ni wɔfóoo wɔ pɛ wɔnɔ mli; ni Yehowa naa enɛ. (2 Tes. 1:3; Heb. 6:10) Wɔna hu akɛ, kɛ́ wɔsɔle wɔhã wɔnyɛmimɛi, etsuɔ nii. No hewɔ lɛ, nyɛhãa wɔsɔlea wɔhãa wɔnyɛmimɛi lɛ be fɛɛ be.