Yehowa Ye Ebua Wɔ Ni Wɔnyɛ Wɔsɔmɔ Lɛ Yɛ He Fɛɛ He Ni Akɛ Wɔ Tee

Mats kɛ Ann-Catrin ná hegbɛ amɛtee Gilead Skul lɛ eko yɛ 1979, ni jɛmɛ awo amɛ ŋaa ni wɔtsɔ hiɛ wɔwie he lɛ yɛ. Ŋaawoo nɛɛ jɛ nyɛmi nuu ko ni tsɔɔ nii yɛ Gilead ni atsɛɔ lɛ Jack Redford lɛ ŋɔɔ. Be ni Mats kɛ Ann-Catrin gbe skul lɛ naa lɛ, amɛná hegbɛ amɛyasɔmɔ yɛ Iran, Mauritius, Myanmar, Tanzania, Uganda, kɛ Zaire, ni nyɛmi nuu lɛ ŋaawoo lɛ ye ebua amɛ waa. Yɛ mɛɛ gbɛ nɔ? Hã amɛ diɛŋtsɛ amɛgba wɔ.

Mats, nyɛgbaa wɔ bɔ ni fee ni nyɛba anɔkwale lɛ mli.

Mats: Be ni awuɔ Jeŋ Ta Ni Ji Enyɔ lɛ, Roman Katolik Sɔlemɔ lɛ fee nibii pii ni kɛ nibii ni amɛtsɔɔ mɛi yɛ amɛsɔlemɔ lɛ mli lɛ eyaaa kwraa. No mli lɛ, mipapa yɛ Poland, ni ena ekomɛi. Fɛɛ sɛɛ lɛ, ejieee ejwɛŋmɔ yɛ Nyɔŋmɔjamɔ nɔ. Nɔ ni efɔɔ wiemɔ moŋ ji akɛ, “Miheɔ miyeɔ akɛ, jamɔ ko kɛ̃ yɛ ni hiɔ shi yɛ nibii ni awie yɛ Biblia lɛ mli lɛ anaa!” Sɛɛ mli lɛ, miyana jamɔ ni mipapa wieɔ he lɛ. Bɔ ni eba lɛ ji, no mli lɛ mifɔɔ woji ni mɛi sumɔɔɔ dɔŋŋ hemɔ. Be ko yɛ April 1972 mli lɛ, mitee eko hemɔ ni miyana wolo bluu ko. Wolo lɛ yitso ji, Anɔkwale Ni Kɛ Mɔ Yaa Naanɔ Wala Mli Lɛ. Saneyitso lɛ ŋɔɔ minaa waa, no hewɔ lɛ mihé, ni nakai gbɛkɛ lɛ nɔŋŋ lɛ, mikane wolo muu lɛ fɛɛ. Be ni mikane migbe naa lɛ, mina akɛ mina anɔkwale lɛ.

Kɛjɛ nakai be lɛ kɛyaa lɛ, mikane Yehowa Odasefoi awoji babaoo ni miná Biblia mli saji ni gbaa minaa lɛ ahetoo. Minu he tamɔ nuu jarayelɔ ni Yesu wie ehe yɛ nɔkwɛmɔnɔ ko ni egba lɛ mli lɛ. Be ni nuu nɛɛ yana adiagba kome ni jara wa lɛ, eyahɔ̃ɔ nibii fɛɛ ni eyɔɔ lɛ ni ekɛyahé. Mi hu, no mli lɛ, oti ni mikɛma mihiɛ ji akɛ maya yunivɛsiti ni mabatsɔ datrɛfonyo. Shi be ni mibana anɔkwale lɛ, mijie no yɛ mijwɛŋmɔ mli kwraa ni mikpɛ miyiŋ akɛ masɔmɔ Yehowa. (Mat. 13:​45, 46) Mitee mihiɛ, ni yɛ December 10, 1972 lɛ, abaptisi mi.

Yɛ afi kome pɛ mli lɛ, mifɔlɔi kɛ minyɛmi nuu fioo lɛ hu hã akɛ amɛ kase Biblia lɛ ni abaptisi amɛ. Yɛ July 1973 lɛ, mibɔi gbɛgbamɔ nitsumɔ lɛ. No mli lɛ, wɔyɛ gbɛgbalɔi ni yɔɔ ekãa yɛ wɔsafo lɛ mli, ni atsɛɔ amɛteŋ mɔ kome Ann-Catrin. Ehe yɛ fɛo waa, ni esumɔɔ Yehowa. Wɔbasumɔ wɔhe, ni yɛ 1975 lɛ, wɔbote gbalashihilɛ mli. Wɔhi Strömsund yɛ Sweden afii ejwɛ. Jɛmɛ yɛ fɛfɛo waa, ni mɛi sumɔɔ ni akɛ amɛ akase Biblia lɛ.

Ann-Catrin: Mipapa bana anɔkwale lɛ be ni eshwɛ fioo ni ebaagbe yunivɛsiti naa yɛ Stockholm. No mli lɛ, miye nyɔji etɛ pɛ, shi ekɛ mi yaa asafoŋ kpeei kɛ shiɛmɔ. Enɛ eyaŋɔɔɔ mimami naa kwraa, ni efee bɔ fɛɛ bɔ ni ebaanyɛ koni ehã mipapa ana akɛ Yehowa Odasefoi atsɔɔmɔi lɛ ejaaa, shi enáaa nɔ ko ni ekɛbaafi nɔ ni ewieɔ lɛ sɛɛ. Sɛɛ mli lɛ, lɛ hu ehã abaptisi lɛ. Be ni miye afii 13 lɛ, abaptisi mi, ni be ni miye afii 16 lɛ, mibɔi gbɛgbamɔ nitsumɔ lɛ. Miyasɔmɔ yɛ Umeå; no mli lɛ, shiɛlɔi ahe miihia waa yɛ jɛmɛ. Sɛɛ mli lɛ, mibatsɔ gbɛgbalɔ krɛdɛɛ.

Be ni mi kɛ Mats bote gbalashihilɛ mli lɛ sɛɛ lɛ, wɔye wɔbua mɛi babaoo kɛba anɔkwale lɛ mli, ni enɛ hã wɔná miishɛɛ waa. Mɛi ni wɔye wɔbua lɛ ateŋ mɔ kome ji oblayoo ko ni atsɛɔ lɛ Maivor. No mli lɛ, eetsu nitsumɔ ni baanyɛ ahã ehe gbɛ́i ni ená shika waa, shi ekpa bɔ ni afee ni enyɛ ekɛ ebe pii asɔmɔ Yehowa. Sɛɛ mli lɛ, ekɛ minyɛmi yoo fioo lɛ fɛɛ bɔi gbɛgbamɔ nitsumɔ lɛ. Yɛ 1984 lɛ, amɛtee Gilead, ni sɛɛ mli lɛ, amɛyasɔmɔ yɛ Ecuador akɛ maŋsɛɛ sɔɔlɔi.

Mɛɛ gbɛ nɔ nyɛkɛ ŋaa ni awo nyɛ akɛ “he fɛɛ he ni Yehowa kɛ nyɛ baaya lɛ, nyɛjɛa nyɛtsui muu fɛɛ mli nyɛsɔmɔa lɛ yɛ jɛmɛ” lɛ tsu nii yɛ nyɛmaŋsɛɛ sɔɔmɔ nitsumɔ lɛ mli?

Mats: Ahã wɔyasɔmɔ yɛ hei srɔtoi. Shi nɔ kome ni ye ebua wɔ waa ji, be fɛɛ be lɛ wɔbɔɔ mɔdɛŋ akɛ wɔbaakase Yesu; titri lɛ bɔ ni ebaa ehe shi lɛ. (Kol. 2:​6, 7) Akɛ nɔkwɛmɔnɔ lɛ, yɛ nɔ najiaŋ ni wɔbaahã nyɛmimɛi lɛ akase bɔ ni wɔfeɔ wɔnii wɔhãa lɛ, wɔmia wɔhiɛ akɛ wɔbaanu nɔ hewɔ ni amɛfeɔ amɛnii yɛ gbɛ pɔtɛɛ ko nɔ lɛ shishi. Wɔmia wɔhiɛ akɛ wɔbaakase bɔ ni amɛsusuɔ nii ahe amɛhãa kɛ bɔ ni amɛhiɔ shi amɛhãa lɛ. Wɔkase Yesu, ni enɛ hewɔ lɛ, eyawaaa tsɔ kɛhãaa wɔ akɛ wɔbaatsake wɔhe wɔwo shihilɛi srɔtoi amli, ni no hã wɔná miishɛɛ yɛ wɔsɔɔmɔ nitsumɔ lɛ mli.—Lala 1:​2, 3.

Ann-Catrin: Kɛ́ afã tso ko ni ayadu yɛ he kroko lɛ, ehe bahiaa ni ená hulu koni enyɛ eda. Nakai nɔŋŋ be fɛɛ be ni abaajie wɔ kɛjɛ he kome kɛya he kroko lɛ, Yehowa batsɔɔ tamɔ “hulu” kɛhãa wɔ. (Lala 84:11) Ehãa wɔnáa nyɛmimɛi ni sumɔɔ wɔ. Akɛ nɔkwɛmɔnɔ lɛ, be ni akɛ wɔ tee Tehran, yɛ Iran lɛ, wɔyasɔmɔ yɛ asafo bibioo ko mli. Nyɛmimɛi ni yɔɔ asafo nɛɛ mli lɛ feɔ mɔ gbɔ waa ni amɛhãa mɔ nɔ hu. Enɛ hã wɔkai mɛi komɛi ni awie amɛhe yɛ Biblia lɛ mli ni fee mɛi gbɔ lɛ. Shi yɛ July 1980 lɛ, amralofoi lɛ tsĩ Yehowa Odasefoi anitsumɔ lɛ naa, ni ahã wɔ gbii enyɔ ni wɔkɛshi maŋ lɛ nɔ. Edɔ wɔ waa, ejaakɛ no mli lɛ jɛmɛ ebaŋɔɔ wɔnaa ni wɔsumɔɔɔ ni wɔshiɔ. Akɛ wɔ tee Zaire (ni ŋmɛnɛ lɛ atsɛɔ lɛ Democratic Republic of the Congo lɛ) yɛ Afrika.

Klɛŋklɛŋ be ni miná mile akɛ wɔmiiya Afrika lɛ, mifó, ejaakɛ no mli lɛ, minu akɛ onufui yɛ jɛmɛ ni helai hu yɛ jɛmɛ, ni enɛ hã gbeyei mɔ mi waa. Shi wɔnanemɛi enyɔ komɛi ni eyasɔmɔ yɛ jɛmɛ afii pii lɛ kɛɛ wɔ akɛ: “Nyɛkashea gbeyei! Wɔle akɛ nyɛyako Afrika dã, shi wɔheɔ wɔyeɔ waa akɛ kɛ́ nyɛtee lɛ nyɛbaaná miishɛɛ.” Ni nakai pɛpɛɛpɛ eba lɛ! Nyɛmimɛi ni yɔɔ Afrika lɛ ahe yɛ miishɛɛ ni amɛsumɔɔ gbɔmɔ hu. Wɔhi Zaire afii ekpaa, kɛkɛ ni amralofoi lɛ tsĩ wɔnitsumɔ lɛ naa, enɛ hewɔ lɛ ehe bahia ni wɔshi jɛmɛ. Misɔle akɛ, “Yehowa, ofainɛ kaahã wɔshi Afrika.” Be ni misɔle migbe naa lɛ, mibɔi mihe ŋmɔɔ, ejaakɛ no mli lɛ miishe gbeyei akɛ maba Afrika, shi bianɛ lɛ, misumɔɔɔ ni mishiɔ.

Mɛɛ jɔɔmɔi nyɛná yɛ Yehowa sɔɔmɔ lɛ mli?

Mats: Ekomɛi ji, maŋsɛɛ sɔɔlɔi ni jɛ hei srɔtoi ebatsɔmɔ wɔnanemɛi. Agbɛnɛ hu, yɛ hei komɛi ni wɔtee lɛ, wɔteŋ mɔ fɛɛ mɔ ná Biblia mli nikaselɔi aaafee 20 sɔŋŋ, ni enɛ hã wɔná miishɛɛ waa! Kɛfata he lɛ, mikaiɔ suɔmɔ ni nyɛmimɛi ni yɔɔ Afrika lɛ jie kpo amɛtsɔɔ wɔ kɛ gbɔ ni amɛfee wɔ lɛ waa. Akɛ nɔkwɛmɔnɔ lɛ, be ni wɔsaraa asafoi ni yɔɔ Tanzania lɛ, wɔwɔɔ wɔtsɔne lɛ mli, ni nyɛmimɛi lɛ kwɛɔ ni wɔnáa nibii fɛɛ ni he hiaa wɔ lɛ, eyɛ mli akɛ amɛ diɛŋtsɛ lɛ, amɛmiiye ohia. (2 Kor. 8:3) Nɔ ko ni mi kɛ Ann-Catrin feɔ daa gbɛkɛ ni wɔshwɛɛɛ he kwraa ji, wɔgbaa nibii ni tee nɔ yɛ gbi lɛ mli lɛ he sane ni wɔdaa Yehowa shi akɛ eye ebua wɔ yɛ gbi lɛ mli.

Ann-Catrin: Yɛ migbɛfaŋ lɛ, mibale nyɛmimɛi ni yɔɔ je lɛŋ hei srɔtoi ni enɛ ehã miná miishɛɛ waa. Wɔkase wiemɔi srɔtoi pii. Ekomɛi ji: Farsi, French, Luganda, kɛ Swahili, ni wɔkase bɔ ni nyɛmimɛi lɛ hiɔ shi amɛhãa lɛ. Wɔye wɔbua mɛi hei ni ba asafo lɛ mli lɛ, wɔná nanemɛi kpakpai, ni wɔkɛ amɛ fee ekome kɛsɔmɔ Yehowa.—Zef. 3:9.

Agbɛnɛ hu, wɔna Yehowa adebɔɔ nibii fɛfɛji srɔtoisrɔtoi. Kɛfata he lɛ, be fɛɛ be ni abaakɛɛ wɔyasɔmɔ yɛ he ko lɛ, wɔnuɔ he akɛ Yehowa nyiɛ wɔhiɛ ni eetsɔɔ wɔ gbɛ. Yehowa ehã wɔná niiashikpamɔi ni kulɛ, wɔ diɛŋtsɛ wɔnyɛŋ wɔná kɔkɔɔkɔ!

Mɛɛ naagbai nyɛkɛkpe? Ni te nyɛtsu he nii nyɛhã tɛŋŋ?

Mats: Helai srɔtoi, ni maleria fata he lɛ, mɔmɔ wɔ, ni ehe bahia ni afee Ann-Catrin opireshɛŋ trukaa nɔ ni fe shi kome. Agbɛnɛ hu, be ni wɔfɔlɔi bɔi daramɔ yɛ afii amli lɛ, wɔye wɔtsui yɛ bɔ ni wɔbaafee wɔkwɛ amɛ lɛ he. Shi minyɛmi nuu fioo lɛ kɛ Ann-Catrin nyɛmimɛi bibii lɛ kwɛ amɛ amɛhã wɔ, ni wɔhiɛ sɔɔ amɛ waa yɛ enɛ hewɔ. Amɛto amɛtsui shi amɛhã wɔfɔlɔi lɛ, ni amɛhã amɛna akɛ amɛsumɔɔ amɛ waa ni amɛyɛ he miishɛɛ akɛ amɛbaakwɛ amɛ. (1 Tim. 5:4) Wɔfee nɔ fɛɛ nɔ ni wɔbaanyɛ kɛye wɔbua wɔfɔlɔi lɛ, eyɛ mli akɛ wɔbɛ amɛmasɛi, shi bei komɛi lɛ, edɔɔ wɔ akɛ wɔnyɛɛɛ wɔye wɔbua amɛ waa tamɔ bɔ ni wɔná kulɛ wɔbaafee lɛ.

Ann-Catrin: Yɛ 1983 be ni wɔsɔmɔɔ yɛ Zaire lɛ, mimusuŋ tsɔ waa, ni yɛ nakai beiaŋ nɔŋŋ lɛ miishwe ni ehiii nɔ ko feemɔ. Datrɛfonyo lɛ kɛɛ Mats akɛ, “Okɛ oŋa lɛ ashi maŋ nɛɛ mli ŋmɛnɛ nɔŋŋ, kɛjeee nakai lɛ, ebaagbo!” Enɔ jetsɛremɔ lɛ, ɛroplen kome pɛ wɔná ni miiya Sweden, ni eji plen ni akɛwóɔ jatsu. No hewɔ lɛ, wɔta no mli kɛtee Sweden.

Mats: Wɔyanu he akɛ, wɔnyɛŋ wɔsɔmɔ akɛ maŋsɛɛ sɔɔlɔi dɔŋŋ, ni enɛ hã wɔfó waa. Eyɛ mli akɛ datrɛfonyo lɛ yasusu akɛ Ann-Catrin he waŋ lɛ moŋ, shi ehe wa lɛ, ni afi sɛɛ lɛ, wɔku wɔsɛɛ kɛba Zaire. Wɔyasɔmɔ yɛ asafo bibioo ko ni wieɔ Swahili lɛ mli yɛ Lubumbashi.

Ann-Catrin: Be ni wɔyɔɔ Lubumbashi lɛ, mibaná musu, shi musu lɛ fite. Eyɛ mli akɛ no mli lɛ, wɔfeko wɔjwɛŋmɔ akɛ wɔbaafɔ moŋ, shi be ni wɔbi lɛ lɛ gbo lɛ, mitsui kumɔ waa. Yɛ nakai be lɛ mli lɛ, wɔsɔɔmɔ nitsumɔ lɛ shwere waa, ni wɔnu he tamɔ nɔ ni Yehowa miitsɔ enɛ nɔ eeshɛje wɔmii. Wɔná Biblia mli nikaselɔi pii fe bei fɛɛ ni eho. Agbɛnɛ hu, yɛ nɔ ni shɛɛɛ afi mli lɛ, shiɛlɔi ni yɔɔ wɔsafo lɛ mli lɛ ayifalɛ lɛ tee hiɛ kɛjɛ 35 kɛyashɛ 70, ni mɛi ni baa asafoŋ kpeei lɛ ayifalɛ lɛ tee hiɛ kɛjɛ 40 kɛyashi 220. Wɔtsu nii waa yɛ shiɛmɔ nitsumɔ lɛ mli ni Yehowa jɔɔ wɔnitsumɔ lɛ nɔ. Enɛ hã miná miishɛɛ waa. Fɛɛ sɛɛ lɛ, bei komɛi lɛ, wɔwieɔ wɔbi ni wɔsumɔɔ lɛ waa lɛ sane. Wɔmiikpa be ni Yehowa baatsa wɔtsuii ni ekumɔ lɛ ehã wɔ kwraa yɛ Paradeiso lɛ mli lɛ gbɛ.

Mats: Sɛɛ mli lɛ, Ann-Catrin bagbɔjɔ, ni be fɛɛ be lɛ etɔ lɛ. Yɛ nakai be lɛ mli nɔŋŋ lɛ, mibaná mile akɛ miná kansa yɛ mimusuŋnii lɛ he ni ehe baahia ni afee mi opireshɛŋ wulu ko. Shi ŋmɛnɛ lɛ, mihe ewa mi, ni Ann-Catrin hu miitsu nɔ ni ehewalɛ baaŋmɛ lɛ gbɛ ni etsu yɛ Yehowa sɔɔmɔ lɛ mli.

Wɔbana akɛ, jeee wɔ pɛ wɔkɛ naagbai miikpe. Be ni aka akɛ abaabule Tutsibii ni yɔɔ Rwanda lɛ ashishi yɛ 1994 lɛ, nyɛmimɛi babaoo yaba abo yɛ abobalɔi ansarai srɔtoi amli. Be ni nibii amli jɔ fioo lɛ, wɔyasara nyɛmimɛi nɛɛ. Wɔna akɛ, nsarai lɛ amli shihilɛ wa waa diɛŋtsɛ, shi fɛɛ sɛɛ lɛ, nyɛmimɛi lɛ hiɛ amɛhemɔkɛyeli lɛ mli, amɛmiifi shi yɛ Yehowa sɔɔmɔ lɛ mli, ni amɛhiɛ kpako gbɔfeemɔ nɔ. Enɛ hã wɔna akɛ, ekɔɔɔ he eko naagbai ni wɔkɛbaakpe lɛ, Yehowa baaye ebua wɔ.—Lala 55:22.

Ann-Catrin: Wɔkɛ naagba kroko kpe be ni ajɔɔ Uganda nitsumɔhe nine lɛ nɔ yɛ 2007 lɛ. Be ni agbe nifeemɔ lɛ naa lɛ, wɔ kɛ maŋsɛɛ sɔɔlɔi kɛ Betelbii komɛi, ni wɔ fɛɛ wɔyi aaafee 25 lɛ, ta tsɔne ko mli kɛmiiya Nairobi, yɛ Kenya. Be ni eshwɛ fioo ni wɔbaashɛ Kenya bɔda lɛ naa lɛ, tsɔne wulu ko je egbɛ nɔ ni ekɛ wɔtsɔne lɛ bakpe. Draiva lɛ kɛ wɔnyɛmimɛi enumɔ gboi yɛ jɛmɛ nɔŋŋ, ni akɛ nyɛmi yoo ko ni pila waa lɛ hu tee helatsamɔhe lɛ, shi sɛɛ mli lɛ, egbo. Wɔmiishwe waa ni wɔna wɔnyɛmimɛi nɛɛ ekoŋŋ!—Hiob 14:​13-15.

Mi hu mipila, shi fiofio lɛ, ebahi. Nɔ moŋ ni bafee naagba ji akɛ, mi kɛ Mats kɛ nyɛmimɛi ni ná oshãra lɛ ateŋ mɛi babaoo yɛ ni kɛ́ wɔyɛ nɔŋŋ lɛ, kɛkɛ lɛ oshãra lɛ ebatɛŋ yɛ wɔhiɛ, ni enɛ hã wɔhao waa. Yɛ migbɛfaŋ lɛ, nyɔɔŋteŋ ji be ni efeɔ mi. Kɛ́ eba nɛkɛ lɛ, mihɛleɔ shi shi kome, ni mitsui tswaa waa tamɔ nɔ ni miná tsui hela. Eyɛ gbeyei waa. Shi be fɛɛ be ni ebaaba lɛ nakai lɛ, wɔsɔleɔ waa wɔhãa Yehowa ni wɔkaneɔ ŋmalɛi komɛi ni wɔsumɔɔ waa lɛ, ni no yeɔ ebuaa wɔ. Agbɛnɛ hu, wɔyana datrɛfoi ni yeɔ amɛbuaa mɛi ni ehao waa lɛ, ni no hu ye ebua wɔ. Bianɛ lɛ, wɔnaagba lɛ eba shi bɔ ni sa, ni wɔsɔleɔ wɔhãa Yehowa ni ewa wɔ ni wɔnyɛ wɔye wɔbua mɛi ni kɛ naagba nɛɛ eko miikpe lɛ.

Mɛɛ gbɛ nɔ Yehowa ye ebua nyɛ yɛ naagbai srɔtoi ni nyɛkɛkpe lɛ amli?

Mats: Ayɛ wiemɔ ko ni awieɔ yɛ Swahili mli ni shishi ji, “Ahiɛ wɔ tamɔ wuɔ wɔlɔ.” Bɔ ni kɛ́ mɔ ko hiɛ wuɔ wɔlɔ lɛ, ekwɛɔ lɛ jogbaŋŋ koni ekajwa lɛ, nakai nɔŋŋ Yehowa kwɛ wɔ jogbaŋŋ ni eye ebua wɔ yɛ he fɛɛ he ni wɔyasɔmɔ yɛ lɛ. Wɔná nibii ni he hiaa wɔ lɛ be fɛɛ be, ni bei komɛi po lɛ, wɔná ni eteke nɔ. Bɔ ni Gbɛtsɔɔmɔ Kuu lɛ nuɔ he ehãa wɔ lɛ ji nɔ kroko ni ehã wɔna akɛ Yehowa sumɔɔ wɔ ni efiɔ wɔsɛɛ.

Ann-Catrin: Masumɔ ni mawie shihilɛ ko ni wɔkɛkpe ni Yehowa ye ebua wɔ yɛ mli lɛ he. Gbi ko lɛ, atswa mi akɛ mipapa bɛ hewalɛ kwraa yɛ Sweden ni akɛ lɛ etee helatsamɔhe lɛ. No mli lɛ, maleria ko emɔ Mats waa ni kpaako ehe miijɔ lɛ, ni wɔbɛ shika ni wɔkɛbaawó plen kɛya Sweden. No hewɔ lɛ, wɔkpɛ wɔyiŋ akɛ wɔbaahɔ̃ɔ wɔtsɔne lɛ. Shi no sɛɛ etsɛɛɛ nɔŋŋ lɛ, atswa wɔ shii enyɔ sɔŋŋ. Klɛŋklɛŋ nɔ lɛ jɛ nyɛmi nuu ko kɛ eŋa ni enu wɔsane lɛ ŋɔɔ. Amɛkɛɛ wɔ akɛ amɛbaanyɛ amɛwo wɔteŋ mɔ kome plen shika kɛye amɛbua wɔ. Nɔ ni ji enyɔ lɛ jɛ nyɛmi yoo ko ni eda yɛ afii amli lɛ ŋɔɔ. No mli lɛ, etsu susu ewo adeka ko ni eŋma yɛ he akɛ, “Kɛhã Mɛi Ni Yelikɛbuamɔ He Miihia Amɛ” lɛ mli, ni ekɛɛ eesumɔ ni ekɛye ebua wɔ. No hewɔ lɛ, yɛ minitii fioo pɛ mli lɛ, Yehowa ye ebua wɔ ni wɔná shika ni wɔkɛbaawó plen kɛya Sweden!—Heb. 13:6.

Mɛni nyɛkase yɛ afii 50 ni nyɛkɛtsu be fɛɛ sɔɔmɔ nitsumɔ lɛ mli?

Ann-Catrin: Mibana akɛ, ‘kɛ́ wɔhi shi kpoo ni wɔkɛ wɔhiɛ fɔ̃ Yehowa nɔ lɛ,’ wɔbaaná hewalɛ kɛkpee wɔnaagbai lɛ anaa. Kɛ́ wɔkɛ wɔhiɛ fɔ̃ Yehowa nɔ lɛ, enaa wɔnaagbai lɛ tamɔ lɛ enaagbai, ni etsuɔ he nii ehãa wɔ. (Yes. 30:15; 2 Kro. 20:​15, 17) He fɛɛ he ni ahã wɔyasɔmɔ yɛ lɛ, wɔjɛ wɔtsui mli fɛɛ wɔtsu nitsumɔ lɛ, ni enɛ ehã wɔná jɔɔmɔi babaoo ni kulɛ wɔnyɛŋ wɔná kɔkɔɔkɔ eji wɔbɛ be fɛɛ sɔɔmɔ lɛ mli.

Mats: Nɔ titri ni mikase ji akɛ, yɛ shihilɛ fɛɛ shihilɛ mli lɛ, esa akɛ mikɛ mihiɛ afɔ̃ Yehowa nɔ ni makwɛ bɔ ni ebaatsu nibii ahe nii ehã. (Lala 37:5) Eyeɔ ebuaa mi be fɛɛ be tamɔ bɔ ni ewo shi akɛ ebaafee lɛ. Bianɛ lɛ, wɔmiisɔmɔ yɛ Myanmar Betel ni Yehowa miiye eebua wɔ lolo.

Wɔsɔlemɔ ji akɛ, Yehowa baaye ebua oblahii kɛ oblayei fɛɛ ni miisumɔ ni amɛtsu babaoo yɛ esɔɔmɔ lɛ mli lɛ, tamɔ eye ebua wɔ lɛ. Wɔheɔ wɔyeɔ waa akɛ, kɛ́ amɛŋmɛ Yehowa gbɛ ni eye ebua amɛ, ni amɛjɛ amɛtsui muu fɛɛ mli amɛsɔmɔ lɛ yɛ he fɛɛ he ni akɛ amɛ baaya lɛ, amɛbaaná miishɛɛ waa.