Sanebimɔ He
◼ Ani “tsulɔ anɔkwafo kɛ nilelɔ” lɛ kpɛlɛɔ Odasefoi komɛi ni amɛfee kui ni amɛkpeeɔ kɛtaoɔ Ŋmalɛi amli loo amɛtaa saji anaa yɛ Ŋmalɛi komɛi ahe lɛ nɔ?—Mat. 24:45, 47.
Dabi, ekpɛlɛɛɛ nɔ. Ni kɛlɛ, yɛ je lɛŋ hei srɔtoi lɛ, mɛi fioo komɛi ni kɛ asafo lɛ bɔɔ lɛ efee kui ní amɛ diɛŋtsɛ amɛtaoɔ Biblia mli saji amli. Mɛi komɛi etse kui koni amɛkase Hebri kɛ Hela wiemɔi ni akɛŋma Biblia lɛ bɔni afee ni amɛkwɛ akɛ New World Translation lɛ ja lo. Mɛi krokomɛi hu taoɔ jeŋ nilee he saji ni kɔɔ Biblia lɛ he lɛ amli. Amɛgbele Web sites kɛ hei ni anyɛɔ akɛ mɛi gbaa sane yɛ Intanɛt lɛ nɔ bɔni afee ni amɛnyɛ amɛkɛ mɛi krokomɛi agba amɛsusumɔi lɛ ahe sane. Amɛfee henaabuamɔi srɔtoi kɛha niiahesusumɔ hu, ni amɛkala woji ni amɛŋmalaa amɛ niiamlitaomɔi lɛ ahe saji yɛ mli koni amɛkɛ fata nɔ ni atsɔɔ yɛ Kristofoi akpeei ashishi kɛ wɔwoji lɛ amli lɛ ahe.
Yehowa webii ni yɔɔ je lɛŋ fɛɛ lɛ anine shɛɔ mumɔŋ tsɔsemɔ kɛ hewalɛwoo ni fá bɔ ni sa nɔ yɛ asafoŋ kpeei, kpokpaa nɔ kpeei, kɛ kpokpaa wuji anɔ kpeei ashishi, kɛ agbɛnɛ hu kɛtsɔ woji ni Yehowa asafo lɛ kalaa lɛ anɔ. Yehowa tsɔɔ emumɔ krɔŋkrɔŋ lɛ kɛ e-Wiemɔ ni ji anɔkwale lɛ nɔ ekɛ nibii ni he hiaa haa bɔni afee ni Nyɔŋmɔ webii lɛ fɛɛ ‘ayitsoŋ kɛ amɛjwɛŋmɔ afee ekome’ ní amɛya nɔ ‘amɛfĩ shi yɛ hemɔkɛyeli lɛ mli.’ (1 Kor. 1:10; Kol. 2:6, 7) Ekã shi faŋŋ akɛ wɔhiɛ sɔɔ mumɔŋ niyenii ni Yehowa kɛhaa wɔ yɛ naagbee gbii nɛɛ amli lɛ. Enɛ hewɔ lɛ, “tsulɔ anɔkwafo kɛ nilelɔ” lɛ ekpɛlɛɛɛ woji, kpeei, loo Web sites ni jeee tsulɔ kuu lɛ fee loo amɛ amɛto he gbɛjianɔ ní amɛkwɛɔ nɔ lɛ nɔ.—Mat. 24:45-47.
Eji nɔ ni hi jogbaŋŋ akɛ aŋkroaŋkroi kɛ amɛjwɛŋmɔŋ nyɛmɔi aaatsu nii kɛfĩ sanekpakpa lɛ sɛɛ. Shi kɛlɛ, esaaa akɛ mɔ ko kɛ enifeemɔ gbalaa mɛi ajwɛŋmɔ kɛjɛɔ nibii ni Yesu Kristo tsɔɔ esafo lɛ nɔ etsuɔ yɛ shikpɔŋ lɛ nɔ ŋmɛnɛ lɛ nɔ. Yɛ klɛŋklɛŋ afii 100 lɛ mli lɛ, bɔfo Paulo bɔ kɔkɔ eshi he ní akɛaawo saji ni haa etɔɔ mɔ ní fiteɔ mɔ be lɛ amli, tamɔ ‘weku shishitsɔɔmɔ tsralaa sɛɛ ni aaadi, ejaakɛ enɛɛmɛi kɛ ŋwanejee baa fe Nyɔŋmɔ tsumaa ní yɔɔ hemɔkɛyeli mli lɛ.’ (1 Tim. 1:3-7) Esa akɛ Kristofoi fɛɛ abɔ mɔdɛŋ ni ‘amɛtsi amɛhe kɛjɛ kwashiai aŋwanejei kɛ weku shishitsɔɔmɔi kɛ béi kɛ mla he nɔmɔi ahe, ejaakɛ amɛhe bɛ sɛɛnamɔ ni amɛjeee fɛi hu.’—Tito 3:9.
Wɔmiijie yi wɔmiiha mɛi ni miisumɔ ni amɛkase Biblia lɛ kɛya hiɛ, ní amɛtao Biblia mli saji amli lɛ koni amɛkase Insight on the Scriptures, “All Scripture Is Inspired of God and Beneficial,” kɛ woji krokomɛi tamɔ gbalɛ woji ni yɔɔ Biblia lɛ mli tamɔ Daniel, Yesaia, kɛ Kpojiemɔ woji lɛ. Woji nɛɛ haa wɔ nibii babaoo ni wɔbaanyɛ wɔdamɔ nɔ wɔkase Biblia lɛ ni wɔjwɛŋ nɔ, koni wɔnyɛ ‘wɔyimɔ obɔ̃bɔ̃ kɛ Nyɔŋmɔ suɔmɔnaa nii alee yɛ mumɔŋ nilee kɛ shishinamɔ fɛɛ mli; koni wɔnyiɛ bɔ ni sa Yehowa hiɛ ni asa ehiɛ kwraa, ni wɔwo yibii yɛ nitsumɔ kpakpa fɛɛ nitsumɔ kpakpa mli.’—Kol. 1:9, 10.