Shiɛmɔyaa He Akɔntaabuu Ni Akɛhaaa Mra

Ale shiɛlɔi babaoo akɛ amɛkɛ amɛshiɛmɔyaa he akɔntaabuu haa mra yɛ nyɔŋ fɛɛ nyɔŋ naagbee. Shiɛlɔi ni tamɔ nakai lɛ sa yijiemɔ. Kɛlɛ, ayɔse akɛ daa nyɔŋ nɔ lɛ, shiɛlɔi aaafee 3,000 kɛ amɛshiɛmɔyaa he akɔntaabuu haaa mra ni akɛfata asafo muu lɛ fɛɛ nɔ̃ lɛ he. Ani obɔɔ mɔdɛŋ okɛ oshiɛmɔyaa he akɔntaabuu lɛ haa mra yɛ nyɔŋ fɛɛ nyɔŋ nɔ?

Aakai Asafo Woloŋ Nikasemɔ nɔkwɛlɔi lɛ koni amɛkɛ hiɛdɔɔ akwɛ ni mɛi fɛɛ ni yɔɔ amɛkuu lɛ mli lɛ aha woloŋmalɔ lɛ nine ashɛ amɛshiɛmɔyaa he akɔntaabuu lɛ nɔ yɛ be naa.

Kɛ́ shiɛlɔ ko kɛ ekɔntaabuu haaa mra lɛ, esa akɛ ahé ni akɛfata nyɔŋ ni nyiɛ sɛɛ lɛ nɔ̃ lɛ he ní akane mɔ lɛ shii enyɔ afata shiɛlɔi yɛ nakai nyɔŋ lɛ mli lɛ ahe. Esa akɛ onukpai lɛ akwɛ koni amɛye amɛbua shiɛlɔi ni ehe baahia ni aye abua amɛ koni amɛkɛ amɛkɔntaabuu aha yɛ be naa lɛ. Kɛfata he lɛ, kɛ́ shiɛlɔ ko miifã gbɛ lɛ, esa akɛ eha onukpai lɛ ale bɔ ni ebaafee koni eha amɛnine ashɛ ekɔntaabuu lɛ nɔ.

Esa akɛ Asafo Woloŋ Nikasemɔ nɔkwɛlɔi kɛ woloŋmalɔi lɛ akwɛ koni amɛhé akɔntaabuu ni akɛhaaa mra lɛ fɛɛ ni amɛbu he akɔntaa kɛfata nyɔŋ hee ni abote mli lɛ nɔ̃ lɛ he. Enɛ he miihia waa bɔni afee ni aná akɔntaabuu ni ja. Esa ákɛ akɛ akɔntaabuu lɛ amaje Betel dani gbi ni ji 6 yɛ nyɔŋ ni ayaabote mli lɛ aho. Kɛ́ akɔntaabuu lɛ kɛmajemɔ yakpe sɛɛ fe nine lɛ, no lɛ esa akɛ woloŋmalɔ lɛ afee fax kɛyaha “Report Desk” yɛ Betel loo etswa amɛ tɛlifon. Eji mɔ fɛɛ mɔ sɔ̃ akɛ ekɛ eshiɛmɔyaa he akɔntaabuu aha mra, ni wɔmiiwo nyɛ fɛɛ hewalɛ koni nyɛkɛ hiɛsɔɔ atsu sɔ̃ nɛɛ he nii.—Luka 9:10a.