Teokrase Sɔɔmɔ Skul Lɛ Mlitĩi

Abaasusu sanebimɔi ni nyiɛ sɛɛ nɛɛ ahe yɛ Teokrase Sɔɔmɔ Skul lɛ mli yɛ otsi ni jeɔ shishi kɛjɛ October 30, afi 2006 lɛ mli kɛtsɔ sanebimɔi kɛ hetooi anɔ. Skul nɔkwɛlɔ lɛ kɛ minitii 30 baafee saji amlitĩi lɛ, ni ebaadamɔ nifeemɔi ni afee kɛjɛ September 4 lɛ kɛyashi October 30, afi 2006 otsi lɛ nɔ. [Kadimɔ: Hei ni atsɔɔɔ he ni sanebimɔi lɛ jɛ yɛ sanebimɔi lɛ anaagbee lɛ yɛ kɛha mɔ diɛŋtsɛ nii amli taomɔ koni ekɛtao hetooi lɛ.—Kwɛmɔ Sɔɔmɔ Skul wolo lɛ, bf. 36-37 lɛ mli.]

WIEMƆ SUI

1. Mɛni hewɔ ehe hiaa ni wɔŋmɛ pɛpɛɛpɛ kɛ́ wɔmiiwie lɛ, ni mɛɛ gbɛ nɔ wɔbaanyɛ wɔtsɔ wɔba yeyeeye ní wɔɔfee lɛ shi? [be-GA bf. 135 kk. 5–bf. 137 kk. 2, akrabatsai]

2. Kɛ́ abi wɔ wɔhemɔkɛyelii ahe sane lɛ, mɛni hewɔ esa akɛ wɔbɔ mɔdɛŋ wɔjɛ Biblia lɛ mli wɔha hetoo lɛ? [be-GA bf. 143 kk. 1-3]

3. Mɛɛ gbɛ nɔ wɔɔtsɔ wɔha wɔhe asa waa diɛŋtsɛ yɛ Biblia lɛ kɛ nitsumɔ mli? [be-GA bf. 144, akrabatsa]

4. Mɛni hewɔ ehe hiaa akɛ wɔkɛ Biblia lɛ afɔ nitsumɔ kɛ́ wɔmiitsɔɔ mɛi anii yɛ shiɛmɔ nitsumɔ lɛ mli lɛ, ni mɛɛ gbɛ nɔ wɔɔtsɔ wɔwo mɛi ahewalɛ ni amɛkɛtsu nii yɛ asafoŋ kpeei ashishi? [be-GA bf. 145-146, akrabatsai]

5. Mɛni ji otii enyɔ ni esa akɛ wɔshɛ he kɛ́ wɔmiikpa ŋmalɛ ko hiɛ? [be-GA bf. 147 kk. 2]

NIFEEMƆ NI JI 1

6. Mɛɛ shɛɛ sane ni he hiaa yɔɔ Lalai awolo lɛ mli? [si bf. 104 kk. 23]

7. Mɛɛ be aŋmala Abɛi awolo lɛ agbe naa, ni abua fɛɛ naa afee lɛ wolo kome? [si bf. 107 kk. 5]

8. Mɛni ji abɛ, ni mɛni hewɔ Hebri wiemɔ ni akɛtsɛ́ wolo lɛ sa jogbaŋŋ lɛ? [si bf. 107 kk. 6]

9. Mɛni hewalɛ ni awoɔ wɔ yɛ Abɛi 2:1-5 lɛ akɛ wɔya nɔ wɔtao nilee, sane shishinumɔ, kɛ sɛɛyoomɔ ‘tamɔ jwiɛtɛi, ní wɔtao tamɔ jwetrii ní aŋɔtee’ lɛ tsɔɔ? [be-GA bf. 38 kk. 4]

10. Abɛi awolo lɛ diɛŋtsɛ haa aleɔ yiŋtoo ni he yɔɔ sɛɛnamɔ hewɔ ni aŋma lɛ yɛ mɛɛ gbɛ nɔ? [si bf. 109 kk. 19]

DAA OTSI BIBLIA KANEMƆ

11. Mɛɛ gbɛ nɔ David ‘ninɛ̃ esusuma ni eha efee kpoo tamɔ bi ni atse lɛ fufɔ ni yɔɔ enyɛ ŋɔɔ,’ ni wɔbaanyɛ wɔkase lɛ yɛ mɛɛ gbɛ nɔ? (Lala 131:1-3)

12. Mɛɛ miishɛjemɔ abaanyɛ aná yɛ wiemɔi ni ajɛ mumɔŋ aŋma ni yɔɔ Lala 139:7-12 lɛ mli?

13. Mɛɛ nɔkwɛmɔnii komɛi atsĩ tã yɛ Lala 145 lɛ ni kɔɔ Yehowa dalɛ lɛ he wɔbaanyɛ wɔkɛjie eyi yɛ wɔsɔlemɔi amli kɛ agbɛnɛ hu yɛ shiɛmɔ nitsumɔ lɛ mli? (Lala 145:3)

14. Yehowa gbeyeishemɔ ji “nilee shishijee” kɛ “ŋaalee shishijee” yɛ mɛɛ gbɛ nɔ? (Abɛi 1:7; 9:10, NW)

15. Yɛ Abɛi 7:1, 2 lɛ, mɛni fata “miwiemɔi lɛ” kɛ “mikitãi lɛ” ahe?