Mɛ̃ɛ Yehowa

1. Mɛni ji kpokpaa wulu nɔ kpee lɛ saneyitso, ni mɛni hewɔ saneyitso nɛɛ sa jogbaŋŋ lɛ?

¹ Yesaia ŋma akɛ: “Yehowa lɛ, kojomɔ Nyɔŋmɔ ni; ajɔɔ mɛi fɛɛ ní mɛɔ lɛ lɛ!” (Yes. 30:18b) Ayɛ saji babaoo yɛ Biblia lɛ mli ní kɔɔ bɔ ni Nyɔŋmɔ kojo ehenyɛlɔi ní ekpɔ̃ etsuji anɔkwafoi lɛ ahe. Mɛni Yehowa tsuji ni yɔɔ ŋmɛnɛ lɛ kaseɔ kɛjɛɔ nakai saji lɛ amli? Mɛni wɔbaanyɛ wɔfee amrɔ nɛɛ kɛsaa wɔhe wɔto “Yehowa gbi wulu ní he yɔɔ gbeyei lɛ”? (Yoel 3:4, 5) “Kpɔ̃mɔ Ebɛŋkɛ!” Kpokpaa Wulu nɔ Kpee ni wɔbaafee lɛ baakanya wɔ koni wɔkɛ sanebimɔi nɛɛ ahesusumɔ apɛi wɔ diɛŋtsɛ wɔmli wɔkwɛ. Kpee lɛ baaye abua wɔ koni wɔmɛ Yehowa.

2. Mɛɛ gbɛ nɔ wɔɔtsɔ wɔtsɔɔ akɛ wɔhiɛ sɔɔ kpokpaa wulu nɔ kpee ni wɔbaafee lɛ?

² Ani oto gbɛjianɔ bɔni afee ni onyɛ oya gbii etɛ ni akɛbaafee kpee lɛ fɛɛ? Ákɛ nɔkwɛmɔnɔ lɛ, ani oyabi gbɛ yɛ nitsumɔ mli bɔni afee ni onyɛ oya kpee lɛ? Kaakɛɛ akɛ kɛ́ eshɛ be lɛ, obaaná gbɛ oya. Kɛwo sɔlemɔ mli, koni no sɛɛ lɛ, oyabi gbɛ. (Neh. 2:4, 5) Nakai nɔŋŋ esaaa akɛ wɔtsiɔ nibii tamɔ tsɔne ni wɔkɛbaaya, he ni wɔbaawɔ, kɛ nibii krokomɛi ni he hiaa tamɔ enɛɛmɛi lɛ ahe gbɛjianɔtoo lɛ wɔtoɔ sɛɛ. Wɔkɛ gbɛjianɔ kpakpa ni tamɔ nakai ni wɔtoɔ lɛ tsɔɔ hiɛsɔɔ ni mli kwɔ ni wɔyɔɔ kɛha Yehowa tsɔɔmɔi ni eto he gbɛjianɔ eha wɔ tamɔ okpɔlɔŋmɛɛ lɛ. Esa akɛ onukpai lɛ akwɛ koni amɛye amɛbua mɛi fɛɛ ni yelikɛbuamɔ he baahia amɛ bɔni afee ni amɛnyɛ amɛya kpee lɛ, titri lɛ asafoŋbii ni edara lɛ.—Gal. 6:10.

3. Mɛɛ sui esa akɛ Yehowa webii ajie lɛ kpo yɛ he ni afeɔ kpee lɛ yɛ lɛ?

³ Jeŋba Kpakpa Haa Awoɔ Nyɔŋmɔ Hiɛ Nyam: Kɛ́ wɔyabua wɔhe naa babaoo yɛ kpokpaa wulu nɔ kpeei ashishi lɛ, bɔ ni wɔbaa wɔjeŋ jogbaŋŋ lɛ yeɔ mɛi ni yɔɔ he ni afeɔ kpee lɛ yɛ lɛ odase. Mɛni enɛ biɔ ni wɔfee? Kɛ́ wɔtee hei tamɔ gbɔiatoohe, niyelihe, loo hei krokomɛi ni tamɔ nakai lɛ, esa akɛ wɔha mɛi ni wɔkɛshãraa yɛ jɛmɛ lɛ amii ashɛ amɛhe kɛtsɔ Kristofoi asui tamɔ tsuishitoo, mlijɔlɛ, henɔyeli, kɛ hiɛshikamɔ ní wɔɔjie lɛ kpo lɛ nɔ. (Gal. 5:22, 23; Fil. 4:5) Esa akɛ wɔteŋ mɔ fɛɛ mɔ ajie suɔmɔ ní “efeee nii ni esaaa, [nɔ ni] epeleee lɛ diɛŋtsɛ enɔ̃, [ni] emli wooo la” kpo. Kɛ́ nibii eyaaa nɔ jogbaŋŋ aloo wɔkɛ naagbai po kpe lɛ, wɔbaasumɔ koni ‘wɔfee nɔ fɛɛ nɔ kɛwo Nyɔŋmɔ hiɛ nyam.’—1 Kor. 10:31; 13:5.

4. Mɛɛ gbɛ nɔ fɔlɔi aaatsɔ aye abua amɛbii lɛ koni amɛjeŋba aha ajie Yehowa yi?

⁴ Beni afeɔ kpokpaa wulu nɔ kpee ko lɛ, gbɔiatoohe nɔkwɛlɔ ko ná Odasefoi oblahii kɛ oblayei komɛi ni yahi egbɔiatoohe lɛ ajeŋba kɛ amɛhesaamɔ he miishɛɛ jogbaŋŋ aahu ákɛ beni agbe kpee lɛ naa lɛ, ekɛɛ ená ni “daa lɛ, Yehowa Odasefoi baaba abahi egbɔiatoohe lɛ.” Kwɛ miishɛɛ sane ni enɛ ji! Enɛ tsɔɔ akɛ fɔlɔi ni yɔɔ wɔteŋ lɛ miitsɔse amɛbii lɛ ní amɛmiikwɛ amɛnɔ jogbaŋŋ. Ebafeŋ nɔ ni nilee yɔɔ mli akɛ fɔlɔi aaaha amɛbii lɛ pɛ ahi gbɔiatoohe ní mɔ ko kwɛɛɛ amɛnɔ. Esa akɛ hiŋmɛi ahi gbekɛbii ahe be fɛɛ be. (Abɛi 29:15) Eba akɛ amɛjeŋba kpakpa lɛ baaha ajie Yehowa yi ni eha etsui anyɔ emli!—Abɛi 27:11.

5. Mɛɛ gbɛ nɔ wɔɔtsɔ wɔkɛ wɔtadewoo kɛ hesaamɔ awo Yehowa hiɛ nyam?

⁵ Atadewoo kɛ Hesaamɔ ni Yɔɔ Hiŋmɛi Nɔ: Wɔteŋ mɔ fɛɛ baanyɛ aha awie kpee lɛ he ekpakpa kɛtsɔ atadei komɛi ni eba nɔ ní bɛ hiŋmɛi nɔ ní wɔwoŋ kɛbaŋ kpee lɛ, kɛ hesaamɔi komɛi hu ni eba nɔ ní esaaa ní wɔkɛ wɔhe woŋ mli lɛ nɔ. Kɛ́ wɔmiiya he ni afeɔ kpee lɛ yɛ loo wɔjɛ jɛmɛ wɔmiiba, loo wɔyaaye wɔbua kɛsaa kpee lɛ shishi aloo wɔmiiya kpee lɛ, esa akɛ wɔtadewoo kɛ hesaamɔ lɛ afee nɔ ni yɔɔ hiŋmɛi nɔ. Ákɛ Nyɔŋmɔ tsuji lɛ, nɔ̃ titri ni kã wɔtsui nɔ ji ni wɔbaakwɛ koni akagbe Yehowa gbɛi lɛ he guɔ, shi jeee ni wɔbaafee wɔtsui naa nii. Kɛ́ enɛ yɛ wɔjwɛŋmɔ mli lɛ, no lɛ wɔkɛ atadei komɛi tamɔ trɔza ni nyɛmimɛi yei lɛ woɔ, atadei ni mɔɔ mɔ pampii, atadei ni yɔɔ kuku fe nine loo sliti ni agba he kakadaŋŋ ní kɛ́ mɔ ta shi lɛ ebɛ hiŋmɛi nɔ ní wɔnyɛŋ wɔwo kɛya asafoŋ kpeei lɛ baŋ kpee lɛ shishi. Eji weku yitsei lɛ asɔ̃ akɛ amɛkwɛ koni amɛweku lɛ mlibii lɛ kɛ hiɛ ni gboɔ nɔ̃ kɛ jwɛŋmɔ ni sa awula amɛhe be fɛɛ be.—1 Tim. 2:9.

6. Mɛni hewɔ esa akɛ wɔha wɔtadewoo kɛ hesaamɔ afee nɔ ni yɔɔ hiŋmɛi nɔ kɛ́ wɔbɛ kpee lɛ po shishi?

⁶ Ehe miihia hu koni wɔtadewoo kɛ hesaamɔ yɛ gbɔiatoohe, loo beni wɔyaahé nii yɛ shwapo mli, aloo beni wɔyaaye nii yɛ niyelihe ko lɛ afee nɔ ni yɔɔ hiŋmɛi nɔ. Kɛ́ akpa kpee lɛ ni wɔyaaye nii yɛ niyelihe ko lɛ, no lɛ ebaafee nɔ ni hi akɛ wɔkɛ atade ni wɔkɛtee kpee lɛ aaya. Kpee lɛ tsitsinaa-tsɛɛ nii ni wɔtsɛɔ lɛ haa wɔnáa hegbɛ wɔyeɔ trukaa odase.—2 Kor. 6:3, 4.

7. Mɛɛ gbɛ nɔ wɔɔtsɔ wɔye wɔbua koni nɔ fɛɛ nɔ aya nɔ jogbaŋŋ yɛ kpee lɛ shishi ní efee nɔ ni yɔɔ miishɛɛ? (Kwɛmɔ saneyitso ni ji “Kpokpaa Wulu nɔ Kpee He Kaimɔi” lɛ mli.)

⁷ Yesaia gba akɛ: “Yehowa miimɛ̃, koni eduro nyɛ, ni no hewɔ lɛ ewó ehe nɔ, koni ena nyɛ mɔbɔ.” (Yes. 30:18a) Esa akɛ bɔ ni wɔhiɛ sɔɔ mɔbɔnalɛ kɛ mlihilɛ ni esaaa wɔ ni Yehowa jieɔ lɛ kpo etsɔɔ wɔ lɛ atsirɛ wɔ koni wɔkɛ wɔjeŋba kɛ wɔtadewoo kɛ wɔhesaamɔ ajie eyi yɛ kpokpaa wulu nɔ kpee ni wɔbaaya lɛ shishi. Eba akɛ “Kpɔ̃mɔ Ebɛŋkɛ!” Kpokpaa Wulu nɔ Kpee ni wɔbaaya lɛ baaha ajie Nyɔŋmɔ yi ní asaŋ eye ebua wɔ koni wɔmɛ lɛ!

[Akrabatsa ni yɔɔ baafa 6]

Kpokpaa Wulu nɔ Kpee He Kaimɔi

◼ Nifeemɔ Bei: Abaaje kpee lɛ shishi leebi ŋmɛlɛ 9:30 gbii etɛ lɛ fɛɛ. Kɛ́ eshwɛ fioo ni abaaje kpee lɛ shishi lɛ, sɛinɔtalɔ lɛ baayata wiemɔ kpoku lɛ nɔ, ni abaatswa Maŋtsɛyeli lalai fioo kɛtsɔ hiɛ. Kɛ́ aje lalai ni atswaa kɛtsɔɔ hiɛ lɛ ashishi pɛ lɛ, esa akɛ wɔteŋ mɔ fɛɛ mɔ atao he ko ata bɔni afee ni aje kpee lɛ shishi yɛ gbɛ ni yɔɔ nyam nɔ. Sohaa lɛ, abaakpa gbɛkɛ ŋmɛji 5:15, ni Hɔɔ lɛ, abaakpa gbɛkɛ ŋmɛji 5:05, ni Hɔgbaa lɛ, abaakpa gbɛkɛ ŋmɛji 4:10.

◼ Tsɔnei Amaamɔhe: Tsɔnei Amaamɔhe: Kɛ́ jeee wɔhe ni miiye loo naagba ko ni tamɔ nakai lɛ, no lɛ ebaahi akɛ be fɛɛ be lɛ wɔɔta he ni w?baanu wiemɔ ni ahaa lɛ moŋ fe nɔ ni wɔɔyata tsɔne ni wɔkɛba lɛ mli ejaakɛ kɛ́ wɔta mli lɛ no baanyɛ aha wɔwɔ̃ aloo nibii krokomɛi baanyɛ agbala wɔjwɛŋmɔ kɛje wiemɔ ni ahaa lɛ nɔ. Kɛ́ wɔta mɛi lɛ ateŋ lɛ, wɔjwɛŋmɔ nyiɛɔ wiemɔ ni ahaa lɛ sɛɛ, ni wɔkɛ nakai feemɔ tsɔɔ akɛ wɔhiɛ sɔɔ mumɔŋ niyenii kpakpa ni Yehowa eto he gbɛjianɔ eha lɛ.

◼ Sɛi ni Ashiɔ Ahaa Mɛi: Mɛi ni kɛ bo ta tsɔne mli kɛba aloo amɛkɛbo jɛ shĩa kɛba lɛ pɛ esa akɛ oshi sɛi ohã.

◼ Shwane Niyenii: Ofainɛ okɛ niyenii ni obaaye shwane ajɛ shĩa kɛba moŋ fe nɔ ni kɛ́ eshɛ shwane lɛ, obaashi kpee lɛ shishi akɛ oyaahé niyenii, ais krim, loo nu. Obaanyɛ okɛ nibii ni akɛ niyenii woɔ mli ní daraaa tsɔ ní baaya sɛi lɛ shishi aba. Ofainɛ, okɛ nibii ní dara ni akɛ mɛi pii aniyenii woɔ mli, nibii ni akɛ glase fee, loo dãa ni naa wa akaba kpee lɛ shishi.

◼ Woji ni Abaajie lɛ Kpo: Nyɔŋmɔ Wiemɔ lɛ woɔ wɔ ŋaa koni ‘wɔfee wɔnii fɛɛ yɛ suɔmɔ mli.’ (1 Kor. 16:14) Kɛ́ wɔsumɔɔ mɛi ní wɔsusuɔ amɛhe hu lɛ, no lɛ kɛ́ ajie wolo ko kpo yɛ kpee lɛ shishi lɛ, wɔwoŋ foi gidigidi ni wɔtsirɛ mɛi bɔni afee ni wɔfee mɔ klɛŋklɛŋ ni baayadamɔ shi kɛhé wolo lɛ eko. Kɛyashi abaalá naagbee lala ni asɔle lɛ, esaaa akɛ mɔ ko teɔ shi yɛ he ni eta lɛ eyadamɔɔ shi akɛ eyaahé wolo lɛ eko. Kɛ́ asɔle ni akpa lɛ, esa akɛ mɔ fɛɛ mɔ kɛ tsuishitoo anyiɛ kɛya he ni ahaa wolo lɛ yɛ lɛ ni eyahé eko. Kɛ́ wɔkɛ henɔyeli tsu nii ni asaŋ wɔto wɔtsui shi yɛ gbɛ ni tamɔ nakai nɔ lɛ, no haa anaa akɛ wɔji Kristofoi ni edara yɛ Nyɔŋmɔ he nilee gbɛfaŋ, ni agbɛnɛ hu ehaa anaa akɛ wɔsumɔsumɔɔ wɔhe ákɛ nyɛmimɛi.—Yoh. 13:35.

◼ Oniatsumɔ: Afiteɔ shika saŋŋ kɛtoɔ kpokpaa wulu nɔ kpee he gbɛjianɔ. Wɔbaanyɛ wɔtsɔɔ bɔ ni wɔhiɛ sɔɔ kpee lɛ kɛtsɔ wɔsuɔmɔ mli ni wɔɔjɛ wɔtsu onia yɛ wɔ-Maŋtsɛyeli Asa lɛ nɔ aloo yɛ kpee lɛ shishi kɛfĩ jeŋ muu fɛɛ nitsumɔ lɛ sɛɛ. Kɛ́ mɔ kɛ tsɛk miitsu onia yɛ kpee lɛ shishi lɛ, no lɛ esa akɛ eŋma “Watch Tower Convention” yɛ nɔ ákɛ mɛi ni esa akɛ awo shika lɛ aha.

◼ Osharai kɛ Hela loo Pilamɔ ní Baa Trukaa: Kɛ́ hela tswa mɔ ko trukaa yɛ kpee lɛ shishi lɛ, ofainɛ wo mɛi ni kwɛɔ shitaramɔ nɔ lɛ ateŋ mɔ ni bɛŋkɛ bo lɛ toi nɔ. Lɛ hu ebaaha mɛi ni yɔɔ Tsofahemɔhe lɛ ale enɛ amrɔ nɔŋŋ ní amɛtsu wɔnyɛmimɛi ni tsuɔ nii yɛ jɛmɛ lɛ ateŋ mɔ ko koni ebakwɛ yelikɛbuamɔ ni abaanyɛ akɛha mɔ lɛ.

◼ Wiemɔi ni Amɔmɔɔ loo Vidio Mfonirishamɔ: Esaaa ákɛ mɔ ko kɛ etsɔne ni akɛmɔmɔɔ wiemɔi loo evidio kpãa tsaa sarawa hewalɛ kpãa kɛ wiemɔ kpãai ni yɔɔ kpee lɛ shishi lɛ ahe, ni kɛ́ mɔ baamɔmɔ wiemɔ loo ebaasha vidio lɛ, esa akɛ efee nakai yɛ gbɛ ni gbaŋ mɛi krokomɛi ni eba kpee lɛ anaa.

◼ Mfonirishamɔ: Kɛ́ kpee lɛ miiya nɔ ni oosumɔ ni osha mfoniri lɛ, no lɛ okɛ mfonirishamɔ tsɔnei ni kpɛ́ɔ la akɛfee nakai. Mɛi komɛi shaa mfoniri ni sɛɛ mli lɛ, amɛbahɔ̃ɔ amɛhaa mɛi ni eba kpee lɛ. Akɛni wɔsumɔɔɔ ni wɔkɛ jarayeli saji baa teokrase henaabuamɔi ashishi hewɔ lɛ, esaaa akɛ wɔshaa mfoniri ni wɔheɔ shika. Kɛfata he lɛ, esaaa akɛ wɔtsɛ́ɔ mɛi ni shaa mfoniri amɛheɔ shika lɛ kɛbaa kpee lɛ shishi koni amɛbasha nyɛmimɛi mfoniri kɛye jara.—w84 7/1 bf. 25; kɛfata he lɛ kwɛmɔ Gbɛjianɔ, baafa 142, kuku 3 lɛ mli.

◼ Tɛlifon kɛ Amɛhenɔi: Esa akɛ akwɛ koni ekagbala mɛi ajwɛŋmɔ.

◼ Ní Aata Shi Kutuu ákɛ Weku: Esa akɛ fɔlɔi kɛ amɛbii atara shi beni kpee lɛ yaa nɔ lɛ, moŋ fe nɔ ni amɛaaha amɛbii lɛ kɛ gbekɛbii loo oblahii kɛ oblayei bibii krokomɛi sɔŋŋ aaayatara shi yɛ he kome. Fɔlɔi ni le naagbai ni enɛ kɛbaa lɛ kwɛɔ ni amɛbii lɛ boɔ nifeemɔ lɛ toi ni amɛŋmalaa saji otii amɛshwieɔ shi.

◼ Follow-Up Wolo Lɛ: Kɛ́ aye mɔ ko trukaa odase yɛ he ni afeɔ kpee lɛ yɛ ni ejie miishɛɛ kpo lɛ, no lɛ esa akɛ aŋmala mɔ lɛ he sane yɛ Please Follow Up (S-43) wolo lɛ nɔ. Esa akɛ shiɛlɔi kɛ Follow Up wolo lɛ enyɔ ko awo amɛbaagi mli kɛ amɛmiiba kpee lɛ. Mɔ nine baanyɛ ashɛ wolo nɛɛ eko nɔ yɛ kpee lɛ shishi kɛ́ etee Woji Ahemɔhe (Book Room Department) lɛ. Kɛ́ okɛ wolo nɛɛ eko tsu nii ni oŋmala nɔ nii ogbe naa lɛ, obaanyɛ oyashi oha mɛi ni yɔɔ Woji Ahemɔhe lɛ aloo okɛha nyɛsafoŋ woloŋmalɔ lɛ kɛ́ otee shĩa koni atsu he nii.—Kwɛmɔ March 2005 Wɔ Maŋtsɛyeli Sɔɔmɔ lɛ bf. 4 lɛ mli.

◼ Wɔɔhe: (1) Kɛ́ oyahai he ni owɔɔ lɛ, no lɛ ofainɛ okɛ mɛi ni fa fe bɔ ni akpaa gbɛ akawɔ jɛi. (2) Kɛ́ mɔ ko ni kɛ etsũ ha bo ni owɔ mli lɛ, kaawie bɔ ni tsũ lɛ yɔɔ ha lɛ he tsɔ, ni kaagbɛ nibii oshwã mli hu, shi moŋ kwramɔ jɛmɛ falefale kɛtsɔɔ akɛ osusuɔ mɔ lɛ he. (3) Nyɛmimɛi yei kɛ nyɛmimɛi hii akawɔ tsũ kome mli ja amɛji wekumɛi. (4) Kɛ́ akpɛlɛɛɛ ni ahoɔ nii yɛ tsũ lɛ mli lɛ, no lɛ kaafee nakai. (5) Ákɛ mɔ ni baa ejeŋ jogbaŋŋ lɛ, kaayadamɔ agbo naa oju ohe. Kɛ́ hejuuhe bɛ jɛi lɛ, no lɛ obaanyɛ okɛ saa loo mama afee hejuuhe fioo ni oju ohe yɛ mli. (6) Ákɛ Kristofoi lɛ, esaaa akɛ wɔkɛ nibii ni atoɔ he gbɛjianɔ ahaa gbɔi lɛ tsuɔ nii bɔ ni esaaa. (7) Yɛ okɛ mɛi ni tsuɔ nii yɛ gbɔiatoohe ni oyɔɔ lɛ aloo weku ni oyahi amɛŋɔɔ lɛ anifeemɔ mli lɛ, jiemɔ mumɔ lɛ yibii akpo otsɔɔ amɛ.