Sɔɔmɔ Kpee He Gbɛjianɔtoo
Otsi ni Jeɔ Shishi March 14
Min. 10: Asafoŋ adafitswai. Adafitswai ni ahala kɛjɛ Wɔ Maŋtsɛyeli Sɔɔmɔ lɛ mli. Wo mɛi fɛɛ hewalɛ koni amɛkwɛ vidio ni ji David—He Trusted in God (David—Ekɛ Ehe Fɔ̃ Nyɔŋmɔ Nɔ) lɛ kɛsaa amɛhe kɛha Sɔɔmɔ Kpee ni abaafee yɛ April 4 otsi lɛ mli lɛ. Ha akɛ gbɛtsɔɔmɔi ni yɔɔ baafa 8 lɛ atsu nii ni akɛfee nɔkwɛmɔnii ni tsɔɔ bɔ ni abaafee akɛ March 1 Buu-Mɔɔ kɛ March 8 Awake! lɛ aha. Yɛ shiɛmɔ wiemɔ lɛ naamuamɔ mli lɛ, ha akɛ Kaimɔ He Ninefɔɔ woji lɛ atsu nii kɛkai shiatsɛ lɛ yɛ Kaimɔ he gbi jurɔ ni abaaye lɛ he.
Min. 20: Okɛ Wolo Hee Bibioo lɛ Atsu Nii Kɛtee Miishɛɛ Shi. Wiemɔ kɛ toibolɔi ni akɛaagba sane ni sɔɔmɔ nitsumɔ nɔkwɛlɔ lɛ baatsu he nii. Esa akɛ wɔku wɔsɛɛ wɔyasara mɔ fɛɛ mɔ ni wɔha lɛ Nyɛyaa nɔ Nyɛshia Kpe! wolo bibioo lɛ eko lɛ koni wɔtsu miishɛɛ ni ajie lɛ kpo lɛ he nii. Okɛ emli saji ni ato naa yɛ baafa 2 lɛ atsu nii koni okɛ wolo bibioo lɛ he hiɛkpamɔ wiemɔ kuku ko aha, ni okɛgbala jwɛŋmɔ kɛya saji kukuji (ni aŋmala yɛ niŋmaai ni mli ti lɛ ashishi lɛ) anɔ. Abaanyɛ akɛ saji nɛɛ atsu nii kɛfee sɛɛkuu-kɛsaramɔi kukuji ni mɔɔ shi. Ákɛ nɔkwɛmɔnɔ lɛ, kɛ́ akɛ baafa 3-4 lɛ tsu nii yɛ klɛŋklɛŋ saramɔ lɛ mli lɛ, abaanyɛ akɛ fã ni ji “Ani Nyɔŋmɔ Susuɔ Mɔ He Lɛɛlɛŋ?” ni yɔɔ baafa 5 lɛ afee sɛɛkuu-kɛsaramɔ. Okɛ toibolɔi lɛ agba gbɛ nɔ ni abaatsɔ afee enɛ lɛ he sane. Tĩi fãi krokomɛi lɛ amli, tamɔ nɔ ni yɔɔ baafa 6-8 kɛ 17-18 loo ekrokomɛi ni sa kɛha nyɛshikpɔŋkuku lɛ. Ha akɛ fãi lɛ ateŋ ekome afee sɛɛkuu-kɛsaramɔ he nɔkwɛmɔnɔ. Esa akɛ akane ŋmalɛi ni aŋmalako amɛmli wiemɔi lɛ ateŋ ekome loo nɔ ni fa fe nakai koni asusu he. Shiɛlɔ lɛ agbala jwɛŋmɔ kɛya fã kroko ni abaanyɛ asusu he yɛ saramɔ ni baanyiɛ sɛɛ lɛ mli lɛ nɔ kɛmu naa.
Min. 15: Yelikɛbuamɔ ni Akɛha Koni Ewo Wɔ Hewalɛ. Okɛ nɔ ni shɛɛɛ miniti kome akpa wiemɔ lɛ hiɛ, koni no sɛɛ lɛ okɛ toibolɔi lɛ agba 2005 Yearbook lɛ he sane. Yehowa nifeemɔ ni yɔɔ naakpɛɛ yɛ ŋmɛnɛŋmɛnɛ beaŋ lɛ ní wɔɔjwɛŋ nɔ lɛ baaha wɔtsi wɔbɛŋkɛ lɛ kɛ wɔnyɛmimɛi ni yɔɔ jeŋ fɛɛ lɛ kpaakpa. (Lala 77:13-15) Ewajeɔ wɔ koni wɔte shi wɔwo Abonsam, ni wɔfee “shiŋŋ yɛ hemɔkɛyeli lɛ mli.” (1 Pet. 5:8, 9) Ehaa mɛi heei náa hiɛsɔɔ amɛhaa Yehowa gbɛjianɔtoo lɛ. Ha toibolɔi lɛ atsɔɔ 2005 Yearbook lɛ mli saji loo “Wolo ni Jɛ Nɔyeli Kuu lɛ Dɛŋ” lɛ mli saji ni amɛná ekanemɔ he miishɛɛ. Tsɔ hiɛ oto gbɛjianɔ koni mɔ kome loo mɛi enyɔ atsɔɔ bɔ ni amɛ diɛŋtsɛ amɛtoɔ gbɛjianɔ ni amɛkaneɔ Yearbook lɛ.
Lala 137 kɛ naagbee sɔlemɔ.
Otsi ni Jeɔ Shishi March 21
Min. 10: Asafoŋ adafitswai. Tĩi akrabatsa ni yitso ji “Ye Obua Koni Aya nɔ Aye Amɛ Odase” ni yɔɔ baafa 4 lɛ mli saji otii lɛ amli. Wo mɛi fɛɛ hewalɛ koni kɛ́ ehe bahia lɛ, amɛŋmala Please Follow Up (S-43) wolo lɛ nɔ nii amrɔ nɔŋŋ.
Min. 15: “Ní Wɔɔfee Biblia Mli Nikasemɔi ni Yaa Hiɛ—Fã 7.” Kɛ́ oosaa ohe kɛha fã nɛɛ, kwɛmɔ July 15, 2002 Buu-Mɔɔ lɛ baafa 27, kuku 5-6 lɛ mli.
Min. 20: “Aagbala Jwɛŋmɔ Babaoo Kɛmiiba Biblia lɛ Nɔ!”
Lala 132 kɛ naagbee sɔlemɔ.
Otsi ni Jeɔ Shishi March 28
Min. 10: Asafoŋ adafitswai. Kanemɔ shika he akɔntaabuu lɛ ni otsĩ shika ni akɛke ni Asafo lɛ etsɔɔ akɛ enine eshɛ nɔ lɛ tã otsɔɔ. Kaimɔ mɛi fɛɛ koni amɛkwɛ vidio ni ji David—He Trusted in God (David—Ekɛ Ehe Fɔ̃ Nyɔŋmɔ Nɔ) lɛ kɛsaa amɛhe kɛha Sɔɔmɔ Kpee ni abaafee wɔsɛɛ otsi lɛ. Wo mɛi fɛɛ hewalɛ ni amɛfɔ̃ mɛi ni yɔɔ wiemɔ lɛ he miishɛɛ lɛ nine koni amɛbabo maŋshiɛmɔ krɛdɛɛ ni abaaha yɛ April 10 lɛ toi. Tsɔɔmɔ wolo ni akɛbaaha yɛ April kɛ May mli.
Min. 15: “Okɛ Shiɛmɔ Wiemɔi Srɔtoi ni Mɔɔ Shi Atsu Nii.” Nɔ ni aŋma ahɔ mli yɛ baafa 6 lɛ mli sane ni akɛ toibolɔi lɛ aaagba. Ha afee nɔkwɛmɔnɔ ni tsɔɔ bɔ ni abaanyɛ akɛ shiɛmɔ wiemɔ nɛɛ atsu nii koni akɛ wolo ni akɛhaa yɛ nyɔŋ lɛ mli lɛ aha. Ha shiɛlɔ lɛ akane ŋmalɛ kome ni wieɔ naagba ni shiatsɛ lɛ tsĩ tã lɛ he.
Min. 20: “Okɛ Woji Tɛtrɛbii lɛ Atsu Nii yɛ Oshiɛmɔ Nitsumɔ lɛ Mli.” Ha sane lɛ akɔ asafo lɛ he beni agbaa kuku 3 kɛ 4 lɛ he sane lɛ. Okɛ shiɛlɔ kome loo mɛi enyɔ ni bɔɔ mɔdɛŋ waa kɛ woji tɛtrɛbii lɛ kɛhamɔ yɛ nitsumɔhei, gbɛjegbɛi anɔ, yɛ maŋ lɛŋ hei srɔtoi loo beni amɛyeɔ trukaa odase lɛ agba sane kuku. Bi koni amɛtsɔɔ bɔ ni amɛfeɔ amɛkɛ woji tɛtrɛbii lɛ haa yɛ shihilɛi nɛɛ amli. Ha akɛ gbɛtsɔɔmɔi ni yɔɔ baafa 8 lɛ atsu nii ni akɛfee nɔkwɛmɔnii ni tsɔɔ bɔ ni abaafee akɛ March 15 Buu-Mɔɔ kɛ March 22 Awake! lɛ aha.
Lala 116 kɛ naagbee sɔlemɔ.
Otsi ni Jeɔ Shishi April 4
Min. 5: Asafoŋ adafitswai.
Min. 15: Nyɛsumɔa Nyɛhe. (Yohane 13:35) Wiemɔ ni onukpa ko baaha ni damɔ February 1, 2003 Buu-Mɔɔ lɛ baafa 15-18, kuku 10-21 lɛ nɔ. Taakɛ atsɔɔ yɛ adafitswaa ni tsɔɔ woji ni akɛbaaha yɛ April kɛ May lɛ mli lɛ, aawo wɔ hewalɛ ni wɔbɔ mɔdɛŋ koni wɔkɛ mɛi ni ekase Nilee wolo lɛ kɛ Taoɔ wolo bibioo lɛ momo lɛ aje Biblia mli nikasemɔi ashishi. Maa bɔ ni shiɛlɔi baanyɛ amɛkɛ onukpai lɛ atsu nii yɛ ekomefeemɔ mli kɛye abua mɛi ni egbɔjɔ lɛ nɔ mi.
Min. 25: “Vidio ko ni Emli Saji Ahe Yɔɔ Sɛɛnamɔ Be Fɛɛ Be.” Kanemɔ Lala 91:2 kɛ 31:15 lɛ, ni owie eko fɛɛ eko he kuku. No sɛɛ lɛ okɛ sanebimɔi fɛɛ kɛha David vidio lɛ ni yɔɔ kuku enyɔ lɛ kɛ nɔ ni yɔɔ kuku etɛ lɛ mli lɛ atsu nii ni okɛ toibolɔi lɛ abɔi sanegbaa amrɔ nɔŋŋ. Kanemɔ Lala 56:12 lɛ kɛmu sane lɛ naa.
Lala 36 kɛ naagbee sɔlemɔ.
[Shishigbɛ niŋmai]
Okɛ nɔ ni shɛɛɛ miniti kome akpa wiemɔ lɛ hiɛ, ni okɛ sanebimɔ kɛ hetoo he sanegbaa anyiɛ sɛɛ.